Hwaaɓoɔ kaa a mɛinɛɛ kɛnɛ yii Zehova aa gɛ guɔ. Pələi gwa mɛinɛɛ tii hon na yili maamɛni wala-walaa mɔɔn ɲɛi mu ? Ee ! Yili maamɛni wala-walaa ɲɛi mu kpɔ kɛnɛ (Ɉakə 1:26 ɓo). Yili ɓa gwa pɛli Zehova maawiɛi ləi a gu hwaa pələ ?

1. Mɛinɛɛ ɲɛi Zehova ə gɛ guɔ a hwaaɓoɔ gwa pɛli ɉon ɉii ləi ?

Biblə kaa kɛi ma “ ká kɛ ká keeni hwaŋalɔi a yələ kəlee, káá ká keeni liikpələ ” (Tesalonikə dɔlɔɔ 5:11). Ə́ nuta kɔlɔn yii maakpaan gaa hwaŋalɔ ɓa ? Ya pɛli vaŋalɔi ləi ? Ya pɛli ə́ nɛ ma yɛ́ ma ya maaliihɛlɛn ɉee, ə lɛɛ duwɔ pələ yii nwɛli kaa yɛ́ ə́ mo ma. Ə́ vɛlisɛɛ ta kɔlɔn yii a pɛli ə nuta hwaŋalɔ ? Vɛlisɛɛɠaai da pɛli di nua hwaŋalɔ di tamaai. Ə́ kili lɛɛ ɉu yɛ́ ma yii gu kaa pai moi ya lɔ hwəi maamɛni wala-walaa, kəlaa pələi gu kaa pai moi la yili ɓə nwɔnɔ maamɛni wala-walaa. Yili ɓa gɛ pələ kwɛli ma yɛ́ hwaa a nɛlɛɛ ə lɛɛ a wɛlikɛmaalaa (Hanwon 15:1).

2. Hwaaa pələ huwu ləkɛɛɠaa ɓə maahonɛɛli ə kulɔ kilistalon na ?

Biblə kaa kɛi ma : “ Woo ɲɔn nɔpee ta ho kulɔ ka la ” (Efɛsə 4:​29 ɓo). Yili mukulaa ɓaa maahonɛɛli gu ho lalan ɓili, awala kɛtii gu ho mɛni ta ɓo nuta ɓa yii a nwana ma. Ə lɛɛ nwɔnɔ maahonɛɛli gu ho nuta laa pələ ɓo a ɲɔnwɔɔn ə lɛɛ gu ho laapuɉu kɛ (Hanwon 16:28 ɓo).

3. Gwa tɛɛ ləi gu hwaawoo ə kɛ a bɛliɛ ɉu ə lɛɛ yɛ nua hwaŋalɔ ?

Kɛlɛ-kɛlɛ hu mɛnii a kɛ gu kwəi ya ɓə gwa mo (Lukə 6:45). Yili ɓa maanɛɛ gu gu kiliŋahiɛ pələ hutɔɔ ə gɛ yii nɛlɛɛ guɔ gu kiliŋahiɛ ma, yii ɉaŋaa, yii bɛliɛ ɉu, yii nu a pɛli nwɛli la kɛi da yii kpɔ maatɛnɛ kaa ma (Filipə 4:8). Ə gɛ giliŋahiɛ lɛlɛɛɠaa tii yɛ pɛli kɛi guɔ maanɛɛ gu gu pə́lə́ kɛ pə́lə́ɠaa həɠə ɉu a nɛlɛɛ da gu ɓəlaa (Hanwon 13:20). Yii nwɔnɔ a pɛli kpɔnmaa tɛɛ gu pɔ yaa ɓaa gu gbea toloo gu kiliŋahiɛ gu gaa yii gu hwaawoo a pɛli gɛi nu takpɛliɠaa diɛ. Biblə kaa kɛi ma : “ Hwaa pulu-pulu a kɛɛ kala lɔ yɛ ɓowa kwɛa kəlaa kilimaanua woo kaa a kɔ́lɔi pɔnɔ hali ” (Hanwon 12:18).

 Ə́ WƆ MƐNIKƆLƆNŊAA TA PƐLƐ MA

4. Ə́ hwaa woo yɛlɛkɛ

Gwa pɛli gu mɛni ta ɓo a lowai taɠaa, pulu ɓa mɛnii tii ə hee gu hu kpɔ kɛnɛ (Ɉakə 3:2). Galatə 5:22, 23 ɓo, ə lɛɛ ka lono kɛ gɛɛmaalənŋaa ŋɛi mɛi :

• Duwɔ pələɠaa ŋɛi di kaa vɛlisɛɛ ŋɛi hu nɛlɛ ɓə ya pɛli ɉu hwɛlii Zehova ɓa ə gɛ ə́ kɛ ə́ yee pɔ ? Duwɔpələlɛlɛɛɠaa ŋɛi da pɛli kpɔnmaa tɛɛ ləi ə́ pɔ ?

Korɛntə dɔlɔɔ 15:33 ɓo, ə lɛɛ ka lono kɛ gɛɛmaalən ŋɛi mɛi :

• Ə́ ɓəlaa, da ə́ pələ kɛ pə́lə́ɠaai ya ɉəɠə ɉu lə ɓə yili a pɛli gɛi ə́ hwaawoo ɓa ?

Kilimaamun 3:​1, 7 ɓo, ə lɛɛ ka lono kɛ gɛɛmaalən ŋɛi mɛi :

• Mɛni ləkɛɛ hu ɓə maanɛɛ nu ə naa pilɛ la, awala kɛtii ə niilaa ə naa maakpɔn ə gɛ yɛ pɛli hwaai a lowai takpɛli ?

 5. Nu takpɛliɠaa laa pələ lɛlɛɛ ɓo

6. Ə́ hwaa pələ ə kɛ a nɛlɛɛ ə́ yee bɛlɛn nua pɔ

 YII GU GALAN

Gu hwaawoo a pɛli ə nua hwaŋalɔ awala kɛtii ə di lii holi. Yili ɓa mɛnii gu kaa bɔ gu mo, pələi gu kaa bɔ gu mo la da ɓɛlowai gu kaa pai moi la maanɛɛ gu gu kiliŋahiɛ ma kpɔ a nɛlɛɛ guɔ təɠa pa hwai.

Nɛɛ ə́ kili pɔ

• Pələi maanɛɛ gu hwaa la yɛ kpɔnmaa tɛɛ nua pɔ daɠaa hwaaɓo.

• Woo ləkɛɛɠaa ɓə hó bɔ yɛ kulɔ ə́ la ?

• Lə ɓə a pɛli kpɔnmaa tɛɛ gu pɔ a lowai kəlee, ə gɛ gu hwaa pələ ə kɛ a nɛlɛɛ ə lɛɛ yɛ nua hwaŋalɔ ?