ZASEŊƆ 51
Ho Wan Eŋɛ La Wani Ti Yehowa Puurɛ Pee La Ho Yetɔɣum?
Yehowa naam to mɛ ti to ta’an tɔɣera. La dela bo’olum. To wan tɔɣera se’em la yele pakɛ en mɛ? Ɛɛ, la yele pakɛ en mɛ! (Kaalɛ Yames 1:26.) Bala la, to wan tɔɣera la bem yɛla ti Yehowa puurɛ pɛɛra?
1. To nari ti to tɔɣera la wani?
Baabule la yele to yeti “kɔ’ɔn kpemeseri ya taaba giila ge me soŋeri ya taaba.” (1 Tesalonika 5:11) Hon mi nɛreba ti la nara ti ho kpemese ba giila? Ho wan ta’an eŋɛ la bem basɛ ti ba suure ana buɣa buɣa? Basɛ ti ba baŋɛ ti ho fabeli ba yele mɛ. Ho ta’an yele ba sɛla ti ba ita ti ho nɔŋɛ. Hon mi Baabule gulesegɔ ti ho wan ta’an dekɛ kpemese nɛra ti ho mina giila? Ho wan ta’an nyɛ Baabule gulesegɔ, se’ere n sɔi la ba zo’e mɛ. Tɛra ti, hon tɔɣeri se’em la ta’an kpemese nɛreba giila. Bala la, tɔɣera mama ti gilema bɔna bim.—Magaha 15:1.
2. Yetɔɣum ani n ka nari ti to tɔɣera?
Baabule la yeti: “Da basɛ ya ti yetɔɣepɔ̃’ɔsa ze’ele ya nɔɔren na.” (Kaalɛ Epesus 4:29.) Wana wa vuurɛ dela, la ka nari ti to tɔɣera yetɔɣepɔ̃’ɔsa bii kɛsega yetɔɣum bii tuura nɛra. To me ka nari ti to sa’ana nɛreba yu’ura bii bibisa ba yɛla.—Kaalɛ Magaha 16:28.
3. Bem n wan ta’an soŋɛ tɔ ti to yetɔɣum kpɛmesa nɛreba giila?
To ni tɔɣera yelese’a la ni basɛ ti nɛreba baŋɛ sɛla n boi to suuren mɛ. (Luke 6:45) Bala la, la nari ti to kumesɛ tomesi ta’an ti’isa yelese’a n ani soŋa, maɣesɛ wuu—tontɔɔ yɛla, kasi yɛla, nɔŋerɛ yɛla la yelese’a n nari. (Filipi 4:8) To san ɛɛra to ti’isa yele ana wa, la nari ti to bisɛ to de’eŋo yɛla soŋa ge nyɔɣɛ zɔsonɔ. (Magaha 13:20) La me ani soŋa ti to ni ti’isɛ ge nyaa tɔɣɛ. Ti’isɛ bisɛ ho yetɔɣum la n wan ana nɛreba se’em. Baabule la yeti: “Yetɔɣeyooro ani wuu su’a n luti la ge yɛmdaana zɛleŋa dela tibegɔ.”—Magaha 12:18.
VIISƐ PA’ASƐ
Zamesɛ baŋɛ hon wan tɔɣera se’em ti la pɛɛra Yehowa puurɛ ge me kpɛmesa nɛreba giila.
4. Mina yetɔɣum
Saŋa ase’a, to ta’an ni tɔɣɛ sɛla mɛ ti pooren ti to yeti to san baŋɛ ni. (Yames 3:2) Kaalɛ Galatia 5:22, 23 ge nyaa sɔsɛ sokere ana wa:
-
Hala bana wa poan, halɛ ani ti hon wan zusɛ Naayinɛ ti a soŋɛ hɔ ti ho tara ta’an mina yetɔɣum? Hala ana wa wan ta’an soŋɛ ho la wani?
Kaalɛ 1 Korint 15:33 ge nyaa sɔsɛ sokere wa:
-
Ho zɔdoma la ho de’eŋo yɛla wan ta’an tee ho yetɔɣum la wani?
Bem n wan ta’an tee hon tɔɣeri se’em?
Kaalɛ Pa’ala 3:1, 7 ge nyaa sɔsɛ sokere wa:
-
Sankani ti la nara ti to sina bii to gura ge nyaa ta tɔɣɛ?
5. Pɛɣera nɛreba
To wan eŋɛ la wani kan tɔɣera nɛreba yetɔɣepɔ̃’ɔsa bii zɛregera ba? Ŋmɛ VIDIYO la ge nyaa sɔsɛ sokere ana wa:
-
Vidiyo la poan la, beni n sɔi ti mabia la bɔta ti a tee eŋa n tɔɣeri nɛreba yɛla se’em la?
-
A eŋɛ la bem ta’an tee?
Kaalɛ Pa’ala 7:16 ge nyaa sɔsɛ sokere wa:
-
Bem n nari ti to tɛra to san ti’isa ti to tɔɣɛ nɛreba yele ti la ka ana soŋa?
Kaalɛ Pa’ala 7:21, 22 ge nyaa sɔsɛ sokere wa:
-
Kaalegɔ zɛ’ɛsi wa wan soŋɛ ho la wani ti ho kan ba’ɛ ita sunsɔa se’em ma’a ti nɛra tɔɣɛ ho sɛla n ka ani soŋa ti ho wum?
6. Tɔɣera yetɔɣesomɔ bɔ’ɔra ho deodoma
Yehowa boti la to nɔŋɛ to deodoma ge sɔsera la ba mama sore poan. Ŋmɛ VIDIYO la ge nyaa sɔsɛ sokere wa:
-
Bem n wan soŋɛ hɔ ti ho ta’an tɔɣera yetɔɣesomɔ bɔ’ɔra ho deodoma?
Kaalɛ Epesus 4:31, 32 ge nyaa sɔsɛ sokere wa:
-
Yetɔɣum ani n wan soŋɛ ho deodoma?
Yehowa tɔɣɛ pa’alɛ, a Dayɔa Yezu yele n pakɛ en se’em mɛ. Kaalɛ Matu 17:5 ge nyaa sɔsɛ sokere wa:
-
Ho wan tɔɣesɛ Yehowa la wani ho san tɔɣera bɔ’ɔra ho deodoma?
Bisɛ yelese’a ti ho wan ta’an dekɛ pɛɣɛ nɛreba
NƐREBA BASƐBA YETI: “Mam tɔɣera la n puti’irɛ n de se’em. La ka pakɛ mam la nɛreba n ti’iseri se’em.”
-
Hon sakɛ ba yele sɛla wa? Bem zuo?
YELEKPINE
Yetɔɣum tari paŋa mɛ. To nari to bisɛ tomesi soŋa la to tɔɣeri sɛla, se’em ma’a ti to tɔɣera, la to tɔɣeri yele la se’em.
Tiisegɔ Sokere
-
Sarɔtɔ ani poan ti ho yetɔɣum wan ta’an soŋɛ nɛreba?
-
Yetɔɣum ani ti ho kan bɔta ti ho tɔɣera?
-
Bem n wan soŋɛ tɔ ti to yetɔɣum kpɛmesa nɛreba giila ge me ti gilema bɔna bim?
Ɛ BISƐ
Bem n wan ta’an soŋɛ tɔ ti to tɔɣera pɛɣera nɛreba?
Zamesɛ baŋɛ sɛla n wan soŋɛ hɔ ti ho kan tɔɣera yetɔɣepɔ̃’ɔsa.
Bisɛ hon wan eŋɛ se’em kan sa’ana nɛreba yu’ura bii bibisa ba yɛla.
Zamesɛ baŋɛ Yehowa n soŋɛ buraa ayima n yuun tiregeri ti a basɛ eŋa n ni tɔɣera ge pɔta la se’em.
“Mam Daa Kɔ’ɔn Ti’isa La Mam Vom Wa N Wan Ta Ana Se’em” (The Watchtower, August 1, 2013)
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
