ZAJ KAWM 51
Hais Tej Lus Uas Haum Yehauvas Siab
Thaum Yehauvas tsim peb, nws tsim kom peb txawj hais lus. Qhov no yog ib qho uas zoo tshaj plaws uas Yehauvas muab pub rau peb ces cov lus uas peb hais yeej tseem ceeb rau nws. (Nyeem Yakaunpaus 1:26.) Yog li, peb yuav hais tej lus zoo li cas thiaj haum Yehauvas siab?
1. Peb yuav siv peb cov lus mus txhawb lwm tus li cas?
Phau Vajlugkub hais tias peb ‘ib tug yuav tsum txhawb ib tug lub zog thiab ib tug pab ib tug.’ (1 Thexalaunikes 5:11) Yog li, ua zoo xav seb puas muaj tej tug uas koj yuav txhawb tau lawv lub zog? Koj yuav hais li cas, koj thiaj nplig tau lawv? Koj yuav hais li cas, lawv thiaj paub hais tias koj hlub tshua lawv thiab saib lawv muaj nuj nqis? Cov nqe Vajlugkub uas yuav txhawb tau lawv lub zog muaj ntau. Puas muaj ib nqe twg uas koj xav hais tias yuav txhawb tau ib tug uas koj paub? Nco ntsoov hais tias yuav kom koj txhawb tau lawv, koj yuav tau ua tib zoo xaiv koj cov lus thiab ua zoo hais lawv, lawv thiaj paub hais tias koj hlub tshua lawv.—Pajlug 15:1.
2. Peb yuav tsum tsis txhob hais cov lus zoo li cas?
Phau Vajlugkub hais tias, “Tsis txhob cia tej lus phem tawm hauv nej lub qhov ncauj los.” (Nyeem Efexus 4:29.) Ces peb yuav tsum tsis txhob hais tej lus phem lus qias, lus ntsawv siab, thiab hais lus saib tsis taus lwm tus kom mob lawv siab. Tsis tas li ntawd xwb, peb tsis txhob ua neeg taug xaiv thiab xyav luag moo.—Nyeem Pajlug 16:28.
3. Peb yuav hais cov lus zoo li cas thiaj txhawb tau lwm tus?
Tej lus uas peb hais tawm qhia rau lwm tus paub tias peb xav li cas hauv nruab siab thiab peb txhawj txog dab tsi. (Lukas 6:45) Yog li, peb yuav tsum xyaum xav txog tej yam uas zoo xwb. Xws li tej yam uas ncaj ncees, yam uas dawb huv, yam uas ntxim hlub, thiab yam uas tsim nyog qhuas. (Filipis 4:8) Yuav kom peb ua tau li no, peb yuav tau ua zoo xaiv peb tej phooj ywg thiab tej kev lom zem kom zoo. (Pajlug 13:20) Tsis tas li ntawd xwb, kuj zoo rau peb ua zoo xav ua ntej peb hais ib yam dab tsi, thiab ua zoo xav seb tej uas peb hais yuav ua rau lwm tus xav li cas. Phau Vajlugkub hais tias, ‘Tus neeg ncauj sai tej lus mas zoo yam nkaus li rab ntaj chob, tiam sis tus neeg ntse tus nplaig yog tshuaj kho zoo.’—Pajlug 12:18.
KAWM NTXIV
Xyaum hais tej lus uas haum Yehauvas siab thiab txhawb tau lwm leej lwm tus.
4. Ua zoo xav txog tej uas koj yuav hais seb koj yuav hais li cas
Peb txhua tus, tsis hais leej twg, muaj tej thaud peb yeej hais lus yuam kev dua los lawm uas ua rau peb txaj muag. (Yakaunpaus 3:2) Nyeem Kalatias 5:22, 23 thiab tham txog ob lo lus no:
-
Puas muaj tej yeeb yam twg hauv nqe Vajlugkub no uas koj xav thov kom Vajtswv pab koj txawj hais lus zoo? Thiab tej yeeb yam no ho yuav pab tau koj li cas?
Nyeem 1 Kauleethaus 15:33 thiab tham txog lo lus no:
-
Koj cov phooj ywg thiab tej kev lom zem uas koj ua yuav cob tau koj hais tej lus zoo li cas?
Dab tsi yuav pab kom koj txawj hais lus zoo thiab txhawb tau lwm tus?
Nyeem Laj Lim Tswvyim 3:1, 7 thiab tham txog lo lus no:
-
Thaum twg zoo rau peb nyob twj ywm tsis hais lus los sis zoo rau peb tos kom zoo caij zoo nyoog tso mam li hais?
5. Qhuas lwm tus thiab hais lus zoo txog lawv
Yuav ua li cas peb thiaj tsis hais cov lus uas saib tsis taus lwm tus los sis hais lus tsis zoo txog lawv? Saib zaj YEEB YAJ KIAB thiab tham txog ob lo lus no:
-
Vim li cas tus kwv tij hauv zaj yeeb yaj kiab no thiaj xav hais tias nws yuav tau hloov nws tus cwj pwm thiab tej uas nws hais txog lwm tus?
-
Nws ua li cas nws thiaj hloov tau?
Nyeem Tej Lus Qhia 7:16 thiab tham txog lo lus no:
-
Muaj tej thaud, peb yuav xav hais lus tsis zoo txog lwm tus. Yog muaj li ntawd, nqe Vajlugkub no yuav pab tau peb li cas?
Nyeem Tej Lus Qhia 7:21, 22 thiab tham txog lo lus no:
-
Ob nqe Vajlugkub no pab tau koj tsis maj chim li cas thaum koj hnov luag hais tsis zoo txog koj?
6. Hais lus zoo rau koj tsev neeg
Yehauvas xav kom peb hais lus zoo thiab hais lus mos lus muag rau peb tsev neeg. Saib zaj YEEB YAJ KIAB thiab tham txog lo lus no:
-
Puas muaj dab tsi yuav pab tau kom koj txawj hais lus zoo rau koj tsev neeg?
Nyeem Efexus 4:31, 32 thiab tham txog lo lus no:
-
Koj yuav hais cov lus zoo li cas koj thiaj txhawb tau koj tsev neeg?
Yehauvas hais tias nws hlub nws tus tub Yexus heev. Nyeem Mathais 17:5 thiab tham txog lo lus no:
-
Koj yuav xyaum Yehauvas li cas thaum koj nrog koj tsev neeg tham?
Nco ntsoov qhuas lwm leej lwm tus
IB TXHIA HAIS TIAS: “Kuv xav tau li cas ces kuv yeej hais kiag li ntawd, txawm lwm tus tsis nyiam los xij peem lawv. Tsis yog kuv teeb meem.”
-
Koj puas xav li ntawd thiab?
KOJ KAWM TAU DAB TSI
Yog peb txawj hais lus ces peb yuav txhawb tau lwm tus tiam sis yog peb tsis txawj hais lus ces peb yuav txo tau lwm tus lub zog. Peb thiaj yuav tau ua tib zoo xav ua ntej peb hais dab tsi thiab xav seb puas zoo caij zoo nyoog rau peb hais.
Rov Tham Dua
-
Dab tsi thiaj yuav pab tau peb kom peb txawj hais tej lus uas yuav txhawb tau lwm tus?
-
Cov lus twg tsis zoo rau peb hais?
-
Dab tsi thiaj yuav pab kom peb txawj hais lus zoo thiaj txhawb tau lwm tus?
TSHAWB NTXIV
Dab tsi thiaj yuav pab kom koj txawj hais lus zoo thiab txhawb tau lwm tus?
Nyeem seb dab tsi thiaj yuav pab tau koj tsis hais lus phem.
Yuav ua li cas koj thiaj tsis ua neeg taug xaiv?
Nyeem seb Yehauvas pab ib tug txiv neej li cas, nws thiaj tsis hais lus phem lawm.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
