EHONGWA 51
Omomuano uṋe mu mo yenene okuyorokisa Jehova nomambo woye?
Jehova tje tu mema, eye we tu pa otjiyandjewa otjiwa tjokuhungira. Hapo eye u nakonatja nomuano mu mo ungurisa otjiyandjewa ho? Ii, u nakonatja. (Lesa Jakobus 1:26.) Ku nao, hapo matu yenene vi okuungurisa otjiyandjewa tjokuhungira momuano mbu mau yorokisa Jehova?
1. Matu sokuungurisa vi otjiyandjewa tjokuhungira?
Ombeibela i tja: “Pandiparisasaneye nu mu vaterasane.” (1 Ovatesalonika 5:11) Hapo pe novandu mbu mo tjiwa mbu mave hepa okuyanḓiparisiwa? Ovikwaye mbi mo yenene okutjita kutja u ve vatere? Ve raisira kutja owo ovananḓengu kove. Ngahino mo yenene okuveraera kutja ovikwaye mbi ku tjatera ohunga na wo. Hapo mo yenene okuripura netjangwa ndi mape ya ari tunduuza omundu ngu mo tjiwa? Pe nomatjangwa omengi ngu mo yenene okutoorora. Nu wina, zemburuka kutja omuano mbu mo hungire otjiṋa, mau yenene okutunduuza varwe tjinene. Ku nao, aruhe kondja okuhungira momuano omuwa nomupore.—Omiano 15:1.
2. Omambo yeṋe ngu tu ha sokuhungira?
Ombeibela i tja: “Ngaamu hungire omambo omatwe novinyo vyeṋu.” (Lesa Ovaefese 4:29.) Ihi matji hee kutja katu sokuungurisa omambo omavi, poo okuungurisa omambo omatwe ngu maye hihamisa varwe. Eṱe wina matu sokunakaura okuyamba ovakwetu momuano omuvi nokuveyamburura.—Lesa Omiano 16:28.
3. Otjikwaye tji matji tu vatere okuhungira momuano mbu mau tunduuza varwe?
Potuingi oviṋa mbi tu hungira vi raisa oviṋa mbi ri momutima wetu, noviṋa mbi tu ripura na vyo. (Lukas 6:45) Ku nao, matu sokurihonga okuripura ohunga noviṋa oviwa tjimuna vyousemba, noukohoke, nouwa, nondangu ombwa. (Ovafilipi 4:8) Kutja tu yandje ombango koviṋa mbi, matu sokutoorora omanyando nomapanga wetu nongengezero. (Omiano 13:20) Iho wina matji yenene okutuvatera okuripura nawa ohunga noviṋa mbi matu hungire, nokutja matu hungire momuano uṋe. Tara kutja omambo woye maye ṱunu vi ku varwe. Ombeibela i tja: “Omambo nge hi nomeripura ye tuvakaṋa tjimuna engaruvyo; nungwari omambo nge hungirwa mozondunge ye verukisa.”—Omiano 12:18.
KONḒONONA OUKOTO
Rihonga okuhungira momuano mbu mau yorokisa Jehova na mbu mau tunduuza varwe.
4. Tjevera omambo woye
Povikando tjiva, atuhe tu hungira omambo omavi ngu tu ha sere okuhungira. (Jakobus 3:2) Lesa Ovagalate 5:22, 23, nu okuzambo hungirira komapuriro nga:
-
Ovikaṋena viṋe okuza metjangwa ndi, mbi mo yenene okukumbira ko mbi mavi ku vatere okutjevera omambo woye? Ovikaṋena mbi mape ya avi ku vatere vi?
Lesa 1 Ovakorinte 15:33, nu okuzambo hungirira kepuriro ndi:
-
Omomuano uṋe omapanga woye nomanyando ngu mo toorora mu mape ya aye ṱunu komuano mu mo hungire?
Otjikeṋa tji mape ya atji ṱunu komuano mbu u hungira?
Lesa Omuzuvarise 3:1, 7, nu okuzambo hungirira kepuriro ndi:
-
Oruṋe tji ma rire nawa okumwina poo okuundja oruveze orusemba okuhungira otjiṋa?
5. Hungira oviṋa oviwa ohunga na varwe
Omomuano uṋe mu matu yenene okukengeza kutja atu ha hihamisa varwe poo okuhungira oviṋa ovivi? Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio, ongwaye omurumendu omukambure tjaa vanga okurundurura omuano maa hungire ohunga na varwe?
-
Ovikwaye eye mbya tjita kutja ma rundurure ongaro ye?
Lesa Omuzuvarise 7:16, nu okuzambo hungirira kepuriro ndi:
-
Ovikwaye mbi matu sokuzemburuka, indu tji matu vanga okuhungira oviṋa ovivi ohunga nomundu?
Lesa Omuzuvarise 7:21, 22, nu okuzambo hungirira kepuriro ndi:
-
Omazeva nga maye ku vatere vi kutja o ha pindike indu omundu tji ma hungire oviṋa ovivi ohunga na ove?
6. Raisa ongaro ombwa indu tji mo hungire ku nouṋepo weṱunḓu roye
Jehova u vanga kutja tu hungire ku nouṋepo weṱunḓu retu momuano omuwa nu worusuvero. Nyanda OKAVIDIO, nu okuzambo hungirira kepuriro ndi mari kongorere mba.
-
Otjikwaye tji matji ku vatere okuhungira momuano omuwa ku nouṋepo weṱunḓu roye?
Lesa Ovaefese 4:31, 32, nu okuzambo hungirira kepuriro ndi:
-
Matu yenene vi okuhungira ku nouṋepo weṱunḓu retu momuano mbu mau tjiti kutja ve rimune kutja va suverwa?
Jehova wa raisa omuano eye maa fula ohunga nOmuna we, Jesus. Lesa Mateus 17:5, nu okuzambo hungirira kepuriro ndi:
-
Mo yenene vi okuhorera ku Jehova indu tji mo hungire ku nouṋepo weṱunḓu roye?
Paha omiano vyokutanga varwe
OVANDU TJIVA VE TJA: “Mbi hungira oviṋa avihe mbi me ripura. Hi nokuwari kutja varwe kave nokutjaterwa i yoviṋa mbi me hungire.”
-
Hapo mo i kumwe noumune mbwo? Omena raye?
OKUYARUKIRA PO OUSUPI
Oviṋa mbi matu hungire mavi yenene okuvatera poo okuhihamisa omundu. Matu hepa okuripura nawa ohunga noviṋa mbi matu hungire, kutja oruṋe nokutja omomuano uṋe.
Okurizemburukisa
-
Omomiano viṋe tjiva mu mo yenene okuungurisa otjiyandjewa tjokuhungira okuvatera varwe?
-
Omambo yeṋe ngu mo sokunakaura?
-
Ovikwaye mbi mavi tu vatere okuhungira omambo omawa nomatunge aruhe?
RIHONGA OVINGI
Ovikwaye mbi mavi tu vatere okuhungira momuano mbu mau tunduuza varwe?
Rihonga oviṋa mbi mavi yenene okukuvatera okunakaura okuungurisa omambo omavi.
“Hapo okutukana otjiṋa otjivi tjiri?” (Okarupa okasupi morungovi)
Tara kutja omomuano uṋe mu mo nakaura ongaro yokuyamba varwe.
Tara komuano Jehova ma vatera omurumendu ngwaa kondjo okuisa okutukana.
“Ami mba uta okuripura ohunga nokutja ehupo randje mari i pi” (Oruhungu, 1 ku Auguste, 2013)