LEKSION 51
Kunnasim Mapagayayya si Jehova ta Paguvovug Mu?
Turi ta pinaratu ittam ni Jehova, iniddanna ittam tu makakkasta nga regalu—i abilidad nga maguvovug. Importante kari nisa nu kunnasi tam usan yatun nga regalu? Siempre gapa! (Bibbigan i Santiago 1:26.) Kunnasi tam gafu nga usan i abilidad tam nga maguvovug nga makapagayayya kani Jehova?
1. Kunnasi tam meyusa ta kapianan i regalu nga maguvovug?
Kagian na Biblia: “Makkapasa-pasikan kamu gafu ta nono, anna makka-uffu-uffun kamu.” (1 Tesalonica 5:11) Egga kari i ammammum nga makawag tu pamagaram? Anni i awayyam kuan tapenu mabanna-bannayan ira? Ipasiguradum nga importante ira. Ikagim i appresiammu nira. Egga kari i manono mu nga teksto nga makapagaram ta tanakuan? Aru i awayyam usan. Daddammammu gapa nga importante nu kunnasi i pakkagim ta kayà mu nga kagian tapenu mapagaram i tanakuan. Yari tu kanayun nakuan nga masippo anna kalmadu ka nga maguvovug.—Proverbio 15:1.
2. Anni i mawag nga lillitattam nu maguvovug ittam?
“Ari kamu nga maguvovug ta anni laman nga marakay,” kunna Biblia. (Bibbigan i Efeso 4:29.) Kebalinanna nga ari ittam mangusa tu marake nga uvovug onu makkagi tu maski anni nga makataki ta tanakuan. Mawag gapa nga lillitattam i chismis anna pamara-parake.—Bibbigan i Proverbio 16:28.
3. Anni i makoffun tapenu makapagaram i paguvovug tam?
Masingan ta kakkagiattam nu anni talaga i egga ta futu onu nono tam. (Lucas 6:45) Mawag gafu nga sanayattam i baggi tam nga maffokus ta positibo ira nga gannug—ganna-gannug nga matunung, marenu, makemmemmi, anna mepangngo nga madayaw. (Filipos 4:8) Tapenu makapaffokus ittam tatun ira nga gannug, mawag nga magimmugug ittam ta piliattam nga dibersion anna kokkofun. (Proverbio 13:20) Makoffun gapa nu nonopattam tu mapia i kagiattam anna nu kunnasi tam nga ikagi yatun. Ikonsideram gapa i matageno na karuan ta kagiammu. Kagian na Biblia: “I ari napannonopan nga uvovug ay gittana duddug na espada, ngem makoru i zila na masirib.”—Proverbio 12:18.
GIGIAMMUAN I ARU PAGA
Ammuan nu kunnasi nga makapagayayya kani Jehova i paguvovug mu anna makapagaram ta tanakuan.
4. Immugurammu i paguvovug mu
Nu karuan, makekagi ittam tu gannug nga pabbabawyattam. (Santiago 3:2) Bibbigan i Galacia 5:22, 23, anna paguvovugan yaw ira nga pakkiavu:
-
Anni taw ira nga kualidad i kayà mu nga ipakimallo tapenu memmugurammu i paguvovug mu? Kunnasi makoffun nikaw yaw ira nga kualidad?
Bibbigan i 1 Corinto 15:33, anna paguvovugan yaw nga pakkiavu:
-
Kunnasi mainfluwensian na kokkofun anna dibersiommu i paguvovug mu?
Anni i awayyana nga maka-influwensia ta paguvovug mu?
Bibbigan i Eclesiastes 3:1, 7, anna paguvovugan yaw nga pakkiavu:
-
Kanni nga mas mapia i ari mattattannug anna maginnag tu mepangngo nga tiempo nga maguvovug?
5. Maguvovug tu makapagaram
Anni i kuattam tapenu ariattam mainsulto onu matakitan i tanakuan ta kakkagiattam? Girawan i VIDEO, anna paguvovugan i tumunug ira nga pakkiavu.
-
Ta video, ngatta kayà ulian na tadday nga brother i paguvovugna?
-
Anni i kingnguana tapenu manguli?
Bibbigan i Eclesiastes 7:16, anna paguvovugan yaw nga pakkiavu:
-
Anni nakuan i daddammattam nu matenta ittam nga makkagi tu negatibo meyannung ta tanakuan?
Bibbigan i Eclesiastes 7:21, 22, anna paguvovugan yaw nga pakkiavu:
-
Kunnasi makoffun yaw nga teksto tapenu ari ka insigida mapporay nu egga i kagian na tanakuan nga negatibo meyannung nikaw?
6. Masippo nga makiyuvovug ta kafamiliam
Kayà ni Jehova nga masippo anna meddu nga makiyuvovug ittam ta kafamilia tam. Girawan i VIDEO, anna paguvovugan i tumunug nga pakkiavu.
-
Anni i makoffun nikaw tapenu masippo i pakiyuvovug mu ta kafamiliam?
Bibbigan i Efeso 4:31, 32, anna paguvovugan yaw nga pakkiavu:
-
Anni nga paguvovug i makapagaram ta kafamiliam?
Kinagi ni Jehova i matagenona meyannung ta Anana nga si Jesus. Bibbigan i Mateo 17:5, anna paguvovugan yaw nga pakkiavu:
-
Kunnasim maparigan si Jehova ta pakiyuvovug mu ta kafamiliam?
Magaleg tu oportunidad nga komendan i tanakuan
I KAGIAN NA KARUAN: “Kagiakku nu anni i kayà ku kagian. Liwada lagapa nu ikalussoda i kakkagiakku.”
-
Umanugu ka kari tatun onu ari? Ngatta?
ANNI I NAGIGIAMMUM?
Dakal i efekto na kakkagiattam. Pannonopattam gafu tu mapia nu anni i kagiattam, sonu anni tam kagian, anna kunnasi tam ikagi yatun.
Review
-
Kunnasim meyusa i paguvovug ta panguffun ta tanakuan?
-
Anni nga paguvovug i kayà mu lillitan?
-
Anni i makoffun nittam tapenu kanayun nga masippo anna makapagaram i paguvovug tam?
I AWAYYAM PAGA KUAN
Anni i makoffun nittam tapenu makapagaram i paguvovug tam?
Ammuan nu anni i makoffun nikaw nga malillitan i paggageg.
Girawan nu kunnasim malillitan i chismis.
Ammuan nu kunnasi inuffunan ni Jehova i tadday nga lalaki nga meyemmang i paggageg.
“Pinannonopakku tu Mapia i Pappangetan na Pattolè” (Passifusifutan, Agosto 1, 2013)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
