Jehovah wó tẹmẹ bị, kẹnị tamamaa dịẹpịrịye kọn wó pịrị mị—bịsẹ dịẹpịrịye bị, anị egberi ẹrẹ paamọ kụrọ mị. Jehovah wó ẹrẹ mịnị egberibo diitụa mịnị a o? Iin! (James 1:26 goo.) Anịa, omịnị teeki mịẹ dẹkị wó ẹrẹ mịnị egberibo Jehovah mịẹ pọwẹị mịnị a o?

1. Omịnị te egberiama kị kẹrị ẹrẹmọ agbẹị emi a o?

Bible gbaa mị “ifiemọsẹ zọzọ kụrọmọ bá baratụa zọzọ pịrị.” (1 Thessalonians 5:11) Kụrọmọye dọụ mịnị kịmịama ị́ mọ nimi wẹrị emi a? Ị́mịnị te egberiama ka kị a kụrọmọ a paaemi a o? Amịnị yelaa ị́ pịrị emi bara gbaa a pịrị. Anị nana wẹrị emi ebi inyenrinbụọbo gbaa a pịrị. Kịmị kụrọmọ a paa emi Bible gooyọ ị́ mọ nimi wẹrị emi a? Biin Bible gooyọ-ama k’emi, ị́ dịsẹye sẹlẹ. Ukie, iné ẹrẹ mịnị egberibo yelaa emi bara kị, iné ẹrẹ mịnị bara kpọ yelaa emi. Anị duonị, bọụbọụ bara ka kị ẹrẹ.—Proverbs 15:1.

2. Omịnị te egberiama kị ẹrẹ agbẹịgha o?

Bible gbaa mị: “Fịdịfịdị egberiama anị bịbị duo paa kụmọ.” (Ephesians 4:29 goo.) Anị duonị, omịnị fịdịfịdị bá kịmị dọọn mịnị egberiama ẹrẹ paamọgha fa. Omịnị kịmị guun má kịmị gbaa seimọgha fa.—Proverbs 16:28 goo.

3. Teeki baratụa wó pịrị wẹrị kịmị kụrọmọ egberiama ẹrẹ paamọ a paa emi a o?

Biin ifieama wó ẹrẹmịnị egberibo wó ịkịọụ emi bara kị gbaa paamọ mịnị. (Luke 6:45) Anị duonị omịnị wó ịkịọụbo akị ebi yeama kị iroro agbẹị emi—gbasị emi, yalịyalị, tarị agbẹị emi bá tokoni agbẹị emi yeama kị iroro mọ agbẹị emi. (Philippians 4:8) Mị gbaa wẹrị emi yebo wó mọ iroro dọụmịnị se, omịnị kịlịkịlị bara kọn wó dii mịnị yebo mọ, pei mịnị yebo mọ bá wó ikietubo mọ sẹlẹ agbẹị emi. (Proverbs 13:20) Wó ẹrẹ agbei emi egberibo mọ, bá wó ẹrẹ agbẹị emi bara mọ, kẹrị iroro dẹkị ẹrẹ paamọ mịnị yọ kpọ baratụa wó pịrị mịnị. Anị duonị wó ẹrẹmịnị egberibo zịnịotu gbelemịnị bara kẹrị ukie. Bible gbaa mị: “Irorogha timi ẹrẹ mịnị egberibo, agbụdụ akị kịmị temi-mịnị bara kị emi, anịa kịlịkịlị kịmị ẹrẹ mịnị egberibo dọọnyọ zụọ mịnị.”—Proverbs 12:18.

 EBIBARA TUUDỌỤ

4. Angọ kẹrị bara kọn egberi ẹrẹ

Wósẹ zụa ifieama agbẹịgha bara ẹrẹ wẹrị, tuu ifie laa dẹkị angọ a mịẹ sei mịnị. (James 3:2) Galatians 5:22, 23 goo da, bei biibịbịbo kẹrị ẹrẹtei:

• Bei inyenrinbụọbo, te ye kị ị́ mọ kọn tẹẹbịbị a tụa dá, baratụa ị́ pịrị wẹrị agbẹị bara ẹrẹ a paaemi a o? Bei inyenrinbụọbo tebara ka kị baratụa ị pịrị a paaemi a o?

Wẹrị 1 Corinthians 15:33 goo dá, bei biibịbị kẹrị ẹrẹtei:

• Iné dii mịnị anịghakpọ pei mịnị yebo mọ, bá iné ikie-otubo mọ tebara ka kị iné ẹrẹmịnị bara gbele a paaemi a o?

Ecclesiastes 3:1, 7 goo dá, bei biibịbị kẹrị ẹrẹtei:

• Te ifie kị omịnị ẹrẹmọ agbẹịgha o?

 5. Zịnịotu ebi egberi kị gbaa

6. Tarị nana bara ka kị iné warịbolou kịmịbo mọ ẹrẹ

 KỊLỌỌBARA

Wó ẹrẹ mịnị egberibo kụrọ nana wẹrị emi. Anị duonị, omịnị ebibara wó ẹrẹ mịnị egberibo mọ, ẹrẹmụ ifie mọ bá ẹrẹ agbẹị emi bara kpọ kẹrị iroro dẹkị ẹrẹ.

Waị diitụa

• Omịnị te ụwọụama ka kị laa wó ẹrẹmịnị egberibo kọn baratụa zịnịotu pịrị a paaemi a o?

• Ị́mịnị te paa egberiama kị ẹrẹgha fa o?

• Teeki baratụa wó pịrị wẹrị tarị-nana bá ebi egberiama ẹrẹ paamọ a paaemi a o?