TIMEƔRI TIS 51
Amek ara nessefṛeḥ Yahwa s lehduṛ-nneɣ?
Lhedṛa ţ-ţukci ɣlayen i ɣ-d-yeţţunefken sɣur Yahwa. Ɣef wayagi i geţţak lqima i wamek i nheddeṛ (ɣer-ed Yeɛqub 1:26). A nwali amek i nezmer a nessefṛeḥ Yahwa s lehduṛ-nneɣ.
1. Amek ara nessexdam lehduṛ-nneɣ akken ilaq?
Adlis Iqedsen yenna-d: “Ţţemyenhut gar-awen, ţţemseǧhadet gar-awen” (1 Itisalunikiyen 5:11). Tessneḍ albeɛḍ ifeclen ussan-agi? Amek ara t-tesseǧhdeḍ? Tzemreḍ a s-tiniḍ belli yesɛa amkan deg wul-ik w’a s-d-tesmektiḍ d acu i tḥemmleḍ di ṭṭbiɛa-s. Yella walbeɛḍ nniḍen i tebɣiḍ aţ-ţesseǧhdeḍ? Tzemreḍ aţ-ţessexdmeḍ yiwen wafir n Wedlis Iqedsen. Uyerna, ur teţţu ara belli ayen ara d-tiniḍ yesɛa azal, amek ara t-id-tiniḍ daɣen yesɛa azal. Ilaq ihi aţ-ţeţmeslayeḍ daymen s wawal aẓidan yerna s leḥnana (Lemtul 15:1).
2. Acu n imeslayen umi i glaq ad yexḍu umasiḥi?
Neqqar deg Wedlis Iqedsen: “Ur d-iţeffeɣ ara wawal amerku seg yimi-nwen” (ɣer-ed Ifasusiyen 4:29). Ihi, ilaq a nexḍu yakk i lehduṛ iqebḥen akk-d imeslayen yeţjerriḥen. A nexḍu daɣen i uqejjem yerna ur nessemsax ara wiyaḍ s lekdubat (ɣer-ed Lemtul 16:28).
3. Amek ara nessexdam lehduṛ yesseǧhaden?
Ayen i d-neqqar yeţbeggin-ed ayen i neţxemmim d wayen i neţḥussu (Luqa 6:45). Ɣef wayagi i glaq a neţreṣṣi lbal-nneɣ ɣef leḥwayeǧ yesseǧhaden d ‘wayen akk yellan d lḥeqq, d wayen akk yellan d ṣṣfa, d wayen akk yuklalen leḥmala, d wayen akk yellan d ccekṛan’ (Ifilibiyen 4:8). Bac a nessiweḍ ɣer wayagi, ilaq a neţţextiṛi akken ilaq leḥbab-nneɣ d wamek i nzehhu (Lemtul 13:20). Yelha daɣen a neţmeyyiz uqbel a d-nehdeṛ w’a nesteqsay iman-nneɣ d acu i zemren a d-ǧǧen lehduṛ-nneɣ deg wiyaḍ. Adlis Iqedsen yeqqar-ed: “Win iheddṛen mebla ameyyez iţjerriḥ am ujenwi; iles n wukyisen, d ddwa” (Lemtul 12:18).
A NNADI A NEFHEM AKTEṚ
A nwali kra n leḥwayeǧ nniḍen ara ɣ-iɛiwnen akken a nesɛu lehduṛ yeţţarran lɛezz i Yahwa yerna yesseǧhaden wiyaḍ.
4. Amek ara neḥkem iles-nneɣ?
Akken ma nella, neqqar-ed tikwal leḥwayeǧ mbeɛd neţţendemmay fell-asent (Yeɛqub 3:2). Ɣret-ed Igalatiyen 5:22, 23, mbeɛd hedṛet ɣef yesteqsiyen-agi:
-
Anti si ṣṣifat-agi i tebɣiḍ aţ-ţḍelbeḍ i Yahwa a k-iɛiwen aţ-ţkesbeḍ bac aţ-ţḥekmeḍ iles-ik? Anti liḥalat ideg i zemrent a k-ṣelḥent ṣṣifat-agi? Acuɣer?
Ɣret-ed 1 Ikurintiyen 15:33, mbeɛd hedṛet ɣef westeqsi-yagi:
-
Ayen i nxeddem d wid i neţɛacaṛ zemren a d-ǧǧen lateṛ di lehduṛ-nneɣ. Amek?
Acu n lɛalaqa yellan ger wayen i nxeddem akk-d lehduṛ-nneɣ?
Ɣret-ed Amusnaw 3:1, 7, mbeɛd hedṛet ɣef westeqsi-yagi:
-
Melmi i gwulem a nessusem, melmi i gwulem a d-nehdeṛ?
5. Heddeṛ lxiṛ ɣef wiyaḍ
Amek ara nexḍu i lehduṛ ur nemɛin neɣ yeţjerriḥen? Walit BIDYU-YAGI, mbeɛd hedṛet ɣef yesteqsiyen i d-iţeddun.
-
S wacu i d-yerra s lexbaṛ gma-tneɣ?
-
D acu i gexdem akken ad ibeddel?
Ɣret-ed Amusnaw 7:16, mbeɛd hedṛet ɣef westeqsi-yagi:
-
M’ara nţeddu a d-nini ayen n diri ɣef walbeɛḍ, d acu i glaq a d-nemmekti?
Ɣret-ed Amusnaw 7:21, 22, mbeɛd hedṛet ɣef westeqsi-yagi:
-
Amek i zemren a ɣ-ɛiwnen yefyar-agi akken ur ɣ-yeţɣiḍ ara lḥal ma llan wid i gheddṛen fell-aneɣ ayen n diri?
6. Heddeṛ s wawal aẓidan i iɛeggalen n twacult-ik
Yahwa yebɣa a nheddeṛ s leḥdaqa d wawal aẓidan di twacult. Walit BIDYU-YAGI, mbeɛd hedṛet ɣef westeqsi i d-iţeddun.
-
D acu ara k-iɛiwnen bac aţ-ţheddṛeḍ s wawal aẓidan akk-d iɛeggalen n twacult-ik?
Ɣret-ed Ifasusiyen 4:31, 32, mbeɛd hedṛet ɣef westeqsi-yagi:
-
Acu n lehduṛ i gzemren ad sdukklen tawacult-ik?
Yahwa ibeggen-as-d i Mmi-s ayen i geţḥussu. Ɣret-ed Matta 17:5, mbeɛd hedṛet ɣef westeqsi-yagi:
-
Amek i tzemreḍ aţ-ţɛandeḍ Yahwa m’ara theddṛeḍ d iɛeggalen n twacult-ik?
Ilaq a neţnadi tiswiɛin ideg ara neţcekkiṛ iɛeggalen n twacult-nneɣ.
KRA QQAREN: “Nekk qqareɣ-d ayen i ţxemmimeɣ. Ma yella win umi ur yeɛǧib ara lḥal, wagi d ccɣel-is.”
-
Akka i teţxemmimeḍ ula d kečč? Acuɣer?
AYEN I D-NELMED
Lehduṛ sɛan lqewwa. Ɣef wayagi i glaq a neţxemmim ɣef wayen ara d-nini, melmi ara t-id-nini d wamek ara t-id-nini.
A d-nesmekti
-
Bder-ed kra n liḥalat ideg i nezmer a nessexdam akken ilaq lehduṛ-nneɣ.
-
Acu n lehduṛ umi i tebɣiḍ aţ-ţexḍuḍ?
-
D acu ara k-iɛiwnen akken aţ-ţesɛuḍ awal aẓidan yerna yesseǧhaden?
TZEMREḌ AŢ-ŢWALIḌ DAƔEN
Tlata lewṣayat ara ɣ-iɛiwnen akken a nheddeṛ s lehduṛ yesseǧhaden.
Amek ara neḥbes ur d-nessexsaṛ ara lehduṛ?
Kra n lewṣayat ara ɣ-iɛiwnen a nexḍu i uqejjem.
Amek i gɛawen Yahwa yiwen wergaz bac ad yeḥkem iles-is.
J’ai sérieusement réfléchi à ce que je faisais de ma vie (La Tour de Garde, 1er août 2013)