Anhte hpe Yehowa hpan ai shaloi, ga shaga lu ai mauhpa atsam kumhpa jaw da ai. Dai kumhpa hpe gara hku akyu jashawn ai hte seng nna shi myit lawm ai kun? Myit lawm ai. (Yaku 1:26 hpe hti u.) Dai majaw, Yehowa ra sharawng ai hte maren, ga shaga lu ai atsam hpe gara hku akyu jashawn lu na kun?

1. Ga shaga lu ai kumhpa hpe gara hku akyu jashawn ging ai kun?

Chyum Laika hta ndai hku tsun da ai: “Shada da shadum shahprang nna shadaw shalan nga mu.” (1 Htesaloni 5:11) N-gun jaw lam ra nga ai marai langai ngai hpe nang chye ai kun? Shi myit pyaw hkra nang hpa galaw ya lu ai kun? Shanhte hpe nang lanu lahku ai lam madun u. Shanhte hte seng nna gara hpe ra sharawng ai lam tsun dan u. Nang chye ai marai langai ngai hpe n-gun jaw ya lu ai Chyum daw langai hpe myit lu ai kun? Lata mai ai Chyum daw law law nga ai. Nang tsun ai ladat gaw, ga si hta grau ahkyak ai hpe dum u. Dai majaw, tsawra myit hte si mani ai hku galoi shagu tsun na matu shakut u.​—Ga Shagawp 15:1.

2. Gara zawn ga ni hpe n tsun ging ai kun?

Chyum Laika hta ndai hku tsun da ai: “N se ai ga hkaw mi mung nanhte a n-gup na hkum pru u ga.” (Ehpesu 4:29 hpe hti u.) Marai langai ngai hpe hkra machyi shangun ai n kaja ai ga ni, zai ai ga ni, myit machyi hkra tsun ai ga ni hpe n tsun ging ai ngu ai lachyum re. Hkra machyi shangun ai shatan ai ga ni, sari jahpoi ai ga ni hpe mung n tsun ging ai.​—Ga Shagawp 16:28 hpe hti u.

3. N-gun jaw ya lu ai ga ni tsun lu hkra hpa gaw karum ya lu ai kun?

Anhte tsun ai ga law malawng gaw, anhte gara hku myit ai, hkamsha ai hpe madun dan ai. (Luka 6:45) Dai majaw, kaja ai lam ni re ai ding hpring ai lam, san seng ai lam, sharawng awng ai lam, shakawn mai ai lam ni hpe myit maju jung na matu, tinang hkum tinang shaman la ra ai. (Hpilipi 4:8) Dai hku galaw lu na matu, manang ni, shangwi shapyaw ai lam ni hpe hpaji rawng ai hku lata ra ai. (Ga Shagawp 13:20) Ga n shaga shi yang, shawng myit yu ai mung karum ya lu ai. Tinang tsun ai ga gaw, kaga ni hpe gara hku hkra machyi shangun ai hpe myit yu u. Chyum Laika hta ndai hku tsun da ai: “Nhtu hte galun ai zawn, laji magra nna tsun ai wa mung nga ai; Hpaji rawng ai wa a shinglet chyawm gaw, ana pyi shamai ya lu ai.”​—Ga Shagawp 12:18.

 Kahtap Hkaja

4. Tsun shaga ai lam hpe hkang u

Kalang lang anhte yawng gaw, hpang she myit malai lu na ga ni tsun hkrup chye ai. (Yaku 3:2) Galati 5:​22, 23 hpe hti nna, ndai ga san ni hpe bawngban u:

• Tsun shaga ai lam hpe hkang lu hkra, dai Chyum daw hta lawm ai gara lam a matu akyu hpyi mai ai kun? Dai atsam ningja ni gaw, nang hpe gara hku karum ya lu na kun?

1 Korinhtu 15:33 hpe hti nna, ndai ga san hpe bawngban u:

• Manang ni, shangwi shapyaw ai lam ni gaw, na a tsun shaga ai lam hpe gara hku shingkang ka-up chye ai kun?

Hpaji 3:​1, 7 hpe hti nna, ndai ga san hpe bawngban u.

• Lama ma hpe n tsun ai sha nga kau ai gaw, gara aten hta kaja ai kun? Lama ma tsun na matu aten hpe la ai gaw, hpa majaw hpaji rawng ai kun?

 5. Kaja ai hku tsun shaga u

6. Nta masha ni hpe tsawra myit hte tsun shaga u

 Kadun Dawk

Tsun shaga ai ga hta atsam nga ai. Dai majaw, tsun ai lam, tsun ai aten, tsun ai ladat ni hpe atsawm myit yu ra ai.

Bai Maram

• Kaga ni hpe karum ya lu hkra gara hku tsun shaga mai ai kun?

• Gara zawn ga ni hpe n tsun ging ai kun?

• Tsawra myit lawm nna, n-gun jaw ya lu ai ga ni byin na matu hpa gaw karum ya lu ai kun?