ĨSOMO YA 51
Ũtonya Kũmwendeesya Yeova Ata Kwĩsĩla Ũneeni Waku?
Yĩla Yeova watũmbie, nĩwatũnengie mũthĩnzĩo mũseo, nawʼo nĩ ũtonyi wa kũneena. We nũtanaa kana akathata oona ũndũ tũũtũmĩa mũthĩnzĩo ũsu? Ĩĩ vyũ! (Soma Yakovo 1:26.) Kwoou tũtonya kũũtũmĩa ata kwa nzĩa ĩkũmwendeesya?
1. Twaĩlĩte kũtũmĩa mũthĩnzĩo wa kũneena ata?
Mbivilia ĩtũtavĩtye atĩĩ: “Endeeai kũthangaanyʼa na kwakana inywʼĩ kwa inywʼĩ.” (1 Athesalonika 5:11) We ve mũndũ wĩsĩ ũkwenda kwĩkĩwa vinya? Ũtonya kwĩka ata nĩ kana ũmũtetheesye? Mũĩkĩĩthye kana nũmwonaa e wa vata. O na no ũmũtavye kĩla kĩtumaa wendeewʼa nĩwe. No ũvindĩĩsye ĩandĩko ũtonya kũtũmĩa ũkekĩa vinya mũndũ mũna wĩsĩ? Ve maandĩko maingĩ mũno ũtonya kũnyuva. O na ĩngĩ lilikana kana ũndũ ũũneena ndeto syaku, no ũtume angĩ mekĩwa vinya nĩsyo, kana ikamatũla ngoo. Kwoou nĩ ũndũ mũseo kĩla ĩvinda ũkaneenaa kwa nzĩa nzeo na ũuĩtye.—Nthimo 15:1.
2. Twaĩlĩte kwĩvathana na ũneeni ũilye ata?
Mbivilia yaĩtye: “Ndeto mbou iikaume kanywʼanĩ wenyu.” (Soma Aeveso 4:29.) Ũu nĩ kwasya kana tũyaĩlĩte kũtũmĩa ndeto mbai kana kũneenyʼa mũndũ kwa nzĩa ya kĩvũthya kana ũngʼendu aĩ nĩ kana tũmũũmĩsye. O na ĩngĩ no nginya twĩvathane na nzukũ nthũku itonya kwanangĩa ala angĩ ĩsyĩtwa.—Soma Nthimo 16:28.
3. Nĩ kyaũ kĩtonya kũtũtetheesya tũneenae kwa nzĩa ĩtonya kũthangaasya ala angĩ?
Mavinda maingĩ kĩla tũneenaa nĩkyonanasya nesa kĩla kĩ ngoonĩ na ilĩkonĩ sitũ. (Luka 6:45) Kwoou nĩ ũndũ wa vata twĩmanyĩasye kũvindĩĩasya maũndũ ala maseo. Namo nĩ maũndũ ala malũngalu, matheu, ma kwendeesya, na ala me nguma nzeo. (Avilivi 4:8) Nĩ kana tũvindĩĩasye maũndũ asu, no nginya tũnyuve maũndũ ala twĩtanĩthasya namo kwa ũĩ, o vamwe na anyanya maitũ. (Nthimo 13:20) O na ĩngĩ, nũseo kũsũanĩaa nesa tũtanamba kũneena. Kwasũanĩa ũndũ ndeto syaku itonya kũtuma andũ ala angĩ mewʼa. Mbivilia yaĩtye atĩĩ: “Ve ũla ũneenaa mĩtũkĩ ateũsũanĩa ta kũtonyanga kwa ũvyũ; Ĩndĩ ũĩmĩ wa ũla mũĩ nũvoasya.”—Nthimo 12:18.
ĨMANYĨSYE MŨNANGO
Ĩmanyĩsye ũndũ ũtonya kũneenaa kwa nzĩa ĩtonya kũmwendeesya Yeova na ĩkwĩkĩa ala angĩ vinya.
4. Thimaa ndeto syaku
Mavinda amwe ithyonthe nĩtũwetaa ũndũ, na ĩtina tũyĩsa kwĩlila. (Yakovo 3:2) Somai Akalatia 5:22, 23, na ĩndĩ mũineenea makũlyo aa:
-
Nĩ nguma syĩva katĩ wa isu ũtonya kwenda kũvoya ĩũlũ wasyo nĩ kana siũtetheesye kũthimaa ũneeni waku? Na wĩona nguma isu itonya kũũtethya ata?
Somai 1 Akolintho 15:33, na ĩndĩ mũineenea ĩkũlyo yĩĩ:
-
Anyanya maku na maũndũ ala wĩtanĩthasya namo matonya kũtuma ũneeni waku wĩthĩwa ũilye ata?
Nĩ kyaũ kĩtonya kũtuma wĩthĩwa na ũneeni mũseo kana ũte mũseo?
Somai Mũtavanʼya 3:1, 7, na ĩndĩ mũineenea ĩkũlyo yĩĩ:
-
Nĩ ĩvinda ta yĩva ũtonya kwona ve vata wa kũvindya, kana kweteela ĩvinda yĩla yaĩle kũweta ũndũ mũna?
5. Neenaa maũndũ maseo ĩũlũ wa ala angĩ
Tũtonya kwĩsiĩĩa ata tũikaneene maũndũ mathũku ĩũlũ wa ala angĩ kana kũmaumanyʼa? Ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩkĩ mwana-a-asa ũsu wendaa kũvĩndũa ũneeni wake ĩũlũ wa ala angĩ?
-
Eekie ata nĩ kana eanĩsye kĩu?
Somai Mũtavanʼya 7:16, na ĩndĩ mũineenea ĩkũlyo yĩĩ:
-
Twaĩlĩte kũlilikana kyaũ yĩla tweewʼa tũitatĩka tũneene naĩ ĩũlũ wa mũndũ ũngĩ?
Somai Mũtavanʼya 7:21, 22, na ĩndĩ mũineenea ĩkũlyo yĩĩ:
-
Mĩsoa ĩno ĩtonya kũũtethya ata ndũkathate na mĩtũkĩ yĩla mũndũ ũngĩ waneena naĩ ĩũlũ waku?
6. Tũmĩaa ndeto nzeo yĩla ũũneena na andũ ma mũsyĩ waku
Yeova endaa yĩla tũũneena na andũ ma mũsyĩ witũ tũmaneenyʼe twĩ na ndaĩa na wendo. Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Nĩ kyaũ kĩtonya kũũtetheesya ũneenasye andũ ma mũsyĩ waku wĩ na ndaĩa na wendo?
Somai Aeveso 4:31, 32, na ĩndĩ mũineenea ĩkũlyo yĩĩ:
-
Nĩ kana mũsyĩ ũendeee nesa, twaĩlĩte kũtũmĩa ũneeni ũilye ata?
Yeova nĩwaeleisye ũndũ weewʼaa ĩũlũ wa Mwana wake, Yesũ. Somai Mathayo 17:5, na ĩndĩ mũineenea ĩkũlyo yĩĩ:
-
Ũtonya kũatĩĩa ngelekanyʼo ya Yeova ata yĩla ũũneena na andũ ma mũsyĩ waku?
Manthaa myanya ya kũkatha andũ ala angĩ
ANDŨ AMWE MAASYA: “Nyie nĩ na ũthasyo wa kũneena ũndũ ngwenda. Ndikwenda kũmanya ala angĩ mambonaa ata kana measya ata.”
-
We nũkwĩtĩkĩlana na ũndũ ũsu? Nĩkĩ wasũngĩa ũu?
KĨLA TWEEMANYĨSYA
Ndeto syĩ ũtonyi. Kwoou nĩtwaĩlĩte kũsũanĩa nesa ĩũlũ wa kĩla tũũneena, twĩkĩneena ĩndĩĩ, na twĩkĩneenanga ata.
Makũlyo ma Kũsyokeleela
-
Nĩ kwa nzĩa imwe ta syĩva ũtonya kũtũmĩa ũneeni waku kũtetheesya ala angĩ?
-
Twaĩlĩte kwĩvathana na ũneeni ũilye ata?
-
Nĩ kyaũ kĩtonya kũtũtetheesya nĩ kana mavinda onthe tũtũmĩae ũneeni wĩ na ndaĩa, na ũtonya kwaka ala angĩ?
MAŨNDŨ ANGĨ MA KWĨMANYĨSYA
Nĩ kyaũ kĩtonya kũtũtetheesya tũneenae kwa nzĩa ĩtonya kwaka ala angĩ?
Soma wone kĩla kĩtonya kũũtetheesya ndũkatũmĩae ũneeni mũthũku.
Ĩloele vitio wone ũndũ ũtonya kwĩvathana na kĩtei kya kũneenaa maũndũ mathũku ĩũlũ wa ala angĩ.
Soma wone ũndũ Yeova watetheeisye mũndũũme ũmwe aeka kũtũmĩa ũneeni ũte mũseo.
“Nĩnambĩĩie Kũsũanĩĩa kwa Ũito Ĩũlũ wa Mwĩkalĩle Wakwa” (Mũsyaĩĩsya, Ĩtukũ 1, Mwei wa 8, 2013)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
