THUTO 51
Cha u no Leba Chi Nga Shathisa Jehova Chini?
Ya ka ti Jehova e ti bumba, wa ka ti pa chipo chi no shathisa—ku khona ku lebeleka. A u no amiwa ne zila ya ti no shingisa chipo ichechi nayo? Kwa ka jalo! (Bala Jakuba 1:26.) Ti nga lebeleka chini ne zila i no shathisa Jehova?
1. Ti nga shingisa chini chipo che ku lebeleka?
Baibili i no ti budza kuti,“kulumbidzanani kakale mubakane.” (1 Bathesalonika 5:11) A no ziba nngwe u no sheta ku kulumbidziwa? Ini cha u nga thama kuti a zwiwe zwibuyanana? Mbudze kuti no nda. Pangwe u nga mbudza ne kwe cha u no da ne kukwe. A u nga kumbula ndimana ya u nga shingisa ku simisa nngwe wa u no ziba? Ku na ndimana dzinjinji dza u nga shalula mu dzili. Alakana kuti, zila ya u no shingisa matama nayo i nga ama kene simisa bangwe. Dwilila u gwisila ku lebeleka ne bangwe ne buthu kakale wa ka wila zwilopa.—Zwiani 15:1.
2. I matama api a ti sa ka fanila ku a leba?
Baibili ikati: “Musiletje ndebo mbiimbi dzikabhuda mu milomo yenyu.” (Bala Baefeso 4:29.) Ichecho cho dwa kuti ha ti to shingisa matama a sa ka lulwama, a no thumulana, ku hwisa bangwe zogwadza. Kakale hatizo fanila ku seba bangwe kene ku ba chinya mazina.—Bala Zwiani 16:28.
3. Ti nga batshiwa neni ku leba matama a nowo baka bangwe?
Kanjinji cha ti no leba cho lakidza dumbu chi mu moyo wedu kene chi mu mikumbulo yedu. (Luka 6:45) Ta ka fanila ku gwisila kuti ti lingilile cha ka lulwama mu bangwe se, chi buyanana, chi no shathisa, ne cha ka lizana kudziwa. (Bafilipi 4:8) Kuti ti khone ku bona zwithu izwezwi, ta ka fanila ku shalula maedziso kene bakhwinya zwibuyanana. (Zwiani 13:20) Kakale ku tola nako ku kumbula ti sathu ti ka lebeleka, ku nga batsha. Zwibuzwe kuti matama awo a nowo ama bangwe chini. Baibili ikati: “Matama mabi anobhaya se nsebe, koga lulimi gwe ntjenjedu go zhisa bhodzo.”—Zwiani 12:18.
ZWIDIYE KWA KA NGINILILA
Zwidiye se kwa u nga lebeleka ne zila i no shathisa Jehova ne ku simisa bangwe.
4. Laula zila ya u no lebeleka nayo
Mu zwingwe zwibaka to leba zwithu zwi si nga ti shathise. (Jakuba 3:2) Bala Bagalatiya 5:22, 23, mu be mu lebesana ne kwe buzo dzi no tobela:
-
I zwithu zwipi mu na izwezwi zwa u nga tembezelela kuti u khone ku laula zila ya u no lebeleka nayo? Zwi nga ku batsha chini?
Bala 1 Bakorinta 15:33, mu be mu lebesana ne kwe buzo i no tobela:
-
Ku shalula bakhwinya ne maedziso ku nga be ne chiabe chini mu zila ya u no lebeleka nayo?
Ini chi nga ama zila ya u no lebeleka nayo?
Bala Nreri 3:1, 7, mu be mu lebesana ne kwe buzo i no tobela:
-
Ndi lini kwa ku nga shakika kuti ti nyalale kene ti milile ingwe nako ye ku lebeleka?
5. Leba cha ka lulwama ne kwe bangwe
Ti nga thama chini kuti ti si tuke bangwe kene ku leba chingwe chi si nga lakidze ludo? Zana VIDIYO, mu be mu lebesana ne kwe buzo dzi no tobela.
-
Mu vidiyo, ini nzwalani a ka be e shaka ku shandula zila ya a ka be e lebeleka ne kwe bangwe nayo?
-
Ini cha a ka thama ku shandula zila iye?
Bala Nreri 7:16, mu be mu lebesana ne kwe buzo i no tobela:
-
Ini cha ta fanila alakana ha ti nga zwiwana ti shaka ku lebeleka chingwe chi sa ka lulwama ne kwe nngwe?
Bala Nreri 7:21, 22, mu be mu lebesana ne kwe buzo i no tobela:
-
Ndimana idzedzi dzi nga ku batsha chini kuti u si zhale bugali chinyolocho, ha nngwe e lebeleka chi sa ka lulwama ne kuko?
6. Ibe ne buthu ha u lebeleka ne be nsha uwo
Jehova u no shaka kuti ti lebeleke ne be nsha wedu ne buthu kakale ne zila i no lakidza ludo. Zana VIDIYO, mu be mu lebesana ne kwe buzo i no tobela.
-
Ini chi nowo ku batsha ku lebeleka ne buthu ne be nsha uwo?
Bala Baefeso 4:31, 32, mu be mu lebesana ne kwe buzo i no tobela:
-
Ti nga lebeleka chini ne zila i nga baka nsha wedu?
Jehova wa ka leba se kwa a ka be e zwiwa ne kwe Nkololo uwe, Jesu. Bala Matewu 17:5, mu be mu lebesana ne kwe buzo i no tobela:
-
U nga yedza Jehova chini ha ku zha mu zila ya u no lebesana ne be nsha uwo nayo?
Shaka zwibaka zwe ku bokela bangwe cha ba ka thamas
BATHU BANGWE BA KATI: “Imi ndo lebeleka chi mu nkumbulo wangu. Kuti bathu ba no tini ha te khani.”
-
A u no dumana ne matama iyawa? Ne kutini?
CHA WA ZWIDIYA
Matama a nga baya. Ta ka fanila ku kumbula zwibuyanana ne kwe cha ti no leba, kuti to chi leba lini, kakale kuti to chi leba chini.
U Nga Tini?
-
I zila dzipi dza u nga shingisa ku leba chi nga batsha bangwe?
-
Matama api a u sa ka fanila ku a leba?
-
Ini chi nga ti batsha kuti ti dwilile ti leba chi no baka bangwe?
SHAKISISA
Ini chi nga ti batsha ku leba matama a no simisa bangwe?
Zwidiye kuti ini chi nga ku batsha kuti u si tongo shingisa matama a sa ka lulwama.
Bona se kwa u nga lamba ku nginilila mu ku nyeya.
Bona se kwa Jehova a ka batsha nlume wa ka be e gwisana ne ku shingisa masapa.
“Nda ka Tangisa ku Kumbula Kuti ko Shingikalani mu Buchilo Gwangu” (Thungamakole, August 1, 2013)
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
