Ntangu Yehowa salaka beto, yandi pesaka beto dikabu yai ya kitoko: Dikabu ya kutuba. Keti Nzambi ke tulaka dikebi na mutindu beto ke sadilaka dikabu yai? Ee, yandi ke tudilaka yo kibeni dikebi! (Tanga Yakobo 1:26.) Yo yina, nki beto fwete sala sambu na kutuba na mutindu yina ke sepedisaka Yehowa?

1. Inki mutindu beto fwete sadila dikabu ya kutuba?

Biblia ke songaka beto nde: “Beno landa kupesana kikesa mpi kutungana.” (1 Batesalonika 5:11) Keti nge me zaba bantu yina kele na mfunu ya kubaka kikesa? Inki nge lenda sala sambu bo kudiwa mbote? Songa bo nde bo kele mfunu mingi sambu na nge. Mu mbandu, nge lenda songa bo sambu na nki nge ke sepelaka ti bo. Keti nge ke yibuka verse mosi ya lenda sadisa muntu mosi ya nge me zaba? Baverse ya nge lenda sadila kele mingi. Kuvila mpi ve nde, mutindu na nge ya kutuba lenda pesa mpenza bantu ya nkaka kikesa. Yo yina, konso ntangu nge fwete sala yonso sambu na kutuba na mawete mpi na mutindu ya mbote.— Bingana 15:1.

2. Mambu ya nki mutindu beto fwete tuba ve?

Biblia ke tubaka nde: “Ata ngogo mosi ve ya kupola kubasika na munoko na beno.” (Tanga Baefezo 4:29.) Yo ke tendula nde beto fwete tuba ve mambu ya mbi, mambu ya ke lwadisa bantu ya nkaka to ke pesa bo mpasi mpi beto fwete finga bo ve. Diaka, beto fwete tonga ve bantu ya nkaka mpi beto fwete kusila bo ve makambu sambu na kubebisa lukumu na bo to sambu na kukota bo nsoki.—Tanga Bingana 16:28.

3. Inki beto fwete sala sambu na kutuba mambu yina ta pesa bantu ya nkaka kikesa?

Mbala mingi, mambu yina beto ke tubaka ke monisaka mpenza mambu yina kele na ntima mpi na mabanza na beto. (Luka 6:45) Yo yina, beto fwete sala yonso sambu na kukuma kuyindula mambu ya ke tunga disongidila ‘mambu ya mbote, ya bunkete, ya ke pusaka na kuzola mpi mambu ya me fwana na kubaka lukumu.’ (Bafilipi 4:8) Sambu beto kuma kuyindula mambu yai, beto fwete pona mbote banduku na beto mpi bansaka na beto ya kulutisila ntangu. (Bingana 13:20) Diaka, beto fwete yindulaka ntete mbote na ntwala ya kutuba. Yo yina, yindula mutindu bantu ya nkaka ta kudiwa ntangu bo ta wa mambu yina nge ke zola kutuba. Biblia ke tuba nde: “Kutuba kukonda kuyindula kele bonso kulwadisa muntu na mbele ya bitumba, kansi ludimi ya bantu ya mayele ke belulaka.”—Bingana 12:18.

 LONGUKA MAMBU MINGI

4. Keba na mambu ya nge ke tuba

Bantangu ya nkaka, beto yonso ke tubaka mambu yina ke pesaka beto mpasi na nima. (Yakobo 3:2) Beno tanga Bagalatia 5:22, 23 mpi na nima beno pesa mvutu na bangiufula yai:

• Na kati ya bikalulu yai, nki yo nge lenda lomba Yehowa sambu nge kuma kutuba na mutindu ya mbote? Inki mutindu bikalulu yai lenda sadisa nge?

Beno tanga 1 Bakorinto 15:33 mpi na nima beno pesa mvutu na ngiufula yai:

• Banduku mpi bansaka ya beto ke ponaka lenda pusa beto na kukuma kutuba nki mutindu?

Beno tanga Longi 3:1, 7 mpi na nima beno pesa mvutu na ngiufula yai:

• Inki ntangu yo lenda vanda mbote na kuvanda pima to na kuvingila ntangu ya mbote sambu na kutuba kima mosi?

 5. Tuba mambu ya mbote sambu na bantu ya nkaka

6. Vanda mawete ntangu nge ke solula ti bampangi na nge ya dibuta

 NA BUKUNFI

Mambu ya beto ke tubaka lenda pesa bantu ya nkaka kiese to mpasi. Yo yina, beto fwete yindula ntete mbote mambu yina beto ke zola kutuba, mutindu beto ta tuba yo mpi ntangu ya beto ta tuba yo.

Inki Nge Me Simba?

• Inki nge lenda sala sambu na kukuma kutuba mambu ya ke pesa bantu ya nkaka kikesa?

• Mambu ya nki mutindu nge fwete tuba ve?

• Inki lenda sadisa beto na kutuba ntangu yonso na mawete mpi na mutindu ya ke pesa kikesa?