Eshi Jehova e tu shita, okwe tu pa oshali ya denga mbada yokupopya. Mbela oha yandje ngoo elitulemo kunghee hatu longifa oshali oyo? Heeno osho lela! (Lesha Jakob 1:26.) Ongahelipi hatu dulu okulongifa oshali yetu yokupopya monghedi oyo tai hafifa Jehova?

1. Otu na okulongifa ngahelipi oshali yetu yokupopya?

Ombiibeli oye tu lombwela ya ti: “Twikileni okutwaafana omukumo nokutungafana.” (1 Ovatessalonika 5:11) Mbela ou shii umwe oo a pumbwa etwomukumo? Oshike wa pumbwa okuninga, opo u mu twe omukumo? Mu lombwela kutya ou na ko nasha naye. Oto dulu yo oku mu lombwela kutya oshike u hole kombinga yaye. Mbela ou shii omushangwa umwe, oo to dulu okulongifa, opo u twe umwe omukumo? Ope na omishangwa dihapu, odo to dulu okulongifa. Dimbuluka yo kutya onghedi omo to popi, oto dulu okutwa umwe omukumo neenghono. Onghee, kendabala alushe okupopya nonghenda nosho yo nengungumano.— Omayeletumbulo 15:1.

2. Eendjovo dilipi tu na okuhenuka?

Ombiibeli oya ti: “Momakanya eni inamu pita nandenande eendjovo dii.” (Lesha Ovaefeso 4:29.) Osho osha hala okutya inatu pumbwa okulongifa oitya ii, ile tu popye oshinima shonhumba, osho tashi dulu okuudifa nai umwe. Otwa pumbwa yo okuhenuka olwaambo nosho yo okupopila vamwe mowii.— Lesha Omayeletumbulo 16:28.

3. Oshike tashi tu kwafele tu popye monghedi oyo tai tu vamwe omukumo?

Luhapu oinima oyo hatu popi ohai ulike osho shi li momitima detu, ile momadiladilo. (Lukas 6:45) Onghee otwa pumbwa okulideula tu kale hatu yandje elitulemo koinima iwa ngaashi, oyo ya yuka, ya koshoka, i holike noya wana okupandulwa. (Ovafilippi 4:8) Opo tu yandje elitulemo koinima oyo, otwa pumbwa okuhoolola omalihafifo nookaume ketu pandunge. (Omayeletumbulo 13:20) Osha fimana yo okudiladila, ofimbo inatu popya. Diladila kunghee eendjovo odo wa hala okupopya tadi dulu okukuma vamwe. Ombiibeli oya ti: “Omunhu ta tu neendjovo ngaashi eongamukonda, ndelenee elaka lovanaendunge tali velula.”— Omayeletumbulo 12:18.

 KONAKONA MOULE

4. Kala ho pangele okupopya kwoye

Omafimbo amwe, ohatu popi oinima oyo hatu ke livela ombedi lwanima omolwayo. (Jakob 3:2) Lesha Ovagalati 5:22, 23, ndele tamu kundafana omapulo taa shikula:

• Omaukwatya elipi to dulu okwiilikana kombinga yao, opo e ku kwafele u dule okupangela okupopya kwoye? Ongahelipi omaukwatya oo tashi dulika e ku kwafele?

Lesha 1 Ovakorinto 15:33, ndele tamu kundafana epulo tali shikula:

• Ookaume koye nosho yo omalihafifo oo wa hoolola otai dulu okunwefa mo ngahelipi onghedi yoye yokupopya?

Lesha Omuudifi 3:1, 7, ndele tamu kundafana epulo tali shikula:

• Onaini tashi ka kala pandunge okukala wa mwena, ile okukonga efimbo tali wapalele, opo u popye?

 5. Kala ho popi oinima iwa kombinga yavamwe

6. Kala ho popi nonghenda novanhu vambuleni

 ENGONGO

Osho hatu popi otashi dulu okutunga, ile okuyahameka vamwe. Otwa pumbwa okudiladila nawa kwaasho twa hala okupopya, nonokutya opomhito ilipi tu na oku shi popya, nanghee tu na oku shi popya.

Eendululo

• Omeenghedi dimwe dilipi to dulu okulongifa oshali yokupopya, opo u tunge vamwe?

• Eendjovo dilipi wa hala okuhenuka?

• Oshike tashi dulu oku tu kwafela tu kale alushe hatu popi nonghenda nosho yo monghedi oyo tai tungu vamwe?