51-ساباق
ايتار ٴسوزىمىز ەحوباعا جاعىمدى بولسىن
ەحوبا ٴبىزدى جاراتقاندا، تاڭعاجايىپ ٴبىر سي بەردى: بۇل — سويلەۋ قابىلەتى. وسى سيدى قالاي پايدالاناتىنىمىز ەحوبا ٷشىن وتە ماڭىزدى (جاقىپ 1:26 وقىڭىز). ەندەشە، ايتار ٴسوزىمىز ەحوباعا جاعىمدى بولۋ ٷشىن، ٴبىز قالاي سويلەۋىمىز كەرەك؟ كەلىڭىز، سونى بىلەيىك.
1. ەحوبانىڭ سيىن قالاي دۇرىس پايدالانساق بولادى؟
قۇداي ٴسوزى ٴبىزدى «ٴبىر-ٴبىرىمىزدى جۇباتىپ، نىعايتۋعا» ۇندەيدى (سالونيكالىقتارعا 1-حات 5:11). بالكىم، ٴسىزدىڭ ويىڭىزعا جۇبانىش پەن جىگەرگە مۇقتاج بىرەۋ تۇسكەن شىعار. ونىڭ كوڭىلىن جادىراتۋ ٷشىن نە ايتساڭىز بولادى؟ ول ادام ٴسىز ٷشىن باعالى ەكەنىن ايتىڭىز. مۇمكىن، ونىڭ قانداي مىنەزى ۇنايتىنىن ايتىپ وتەرسىز. ال تاعى بىرەۋدى تارماقپەن نىعايتۋعا بولاتىن شىعار. كەرەمەت تارماقتار كوپ، سونىڭ بىرەۋىن تاڭداساڭىز بولادى. ٴبىر ەسكەرەتىن نارسە — ٴسوزدىڭ قۇدىرەتى قانداي بولسا، ونى قالاي جەتكىزەتىنىمىزدىڭ دە قۇدىرەتى سونداي. سوندىقتان مەيىرىممەن، جىلى-جۇمساق سويلەۋگە تىرىسىڭىز (ناقىل سوزدەر 15:1).
2. اۋزىمىزدان قانداي ٴسوز شىقپاۋ كەرەك؟
كيەلى كىتاپ «اۋزىمىزدان شىرىگەن ٴسوز شىقپاۋ» كەرەكتىگىن ەسكەرتەدى (ەفەستىكتەرگە 4:29 وقىڭىز). «شىرىگەن سوزگە» نە جاتادى؟ بۇعان بالاعات، بەيادەپ سوزدەر نەمەسە بىرەۋدىڭ جانىن جارالايتىن دورەكى، اۋىر سوزدەر جاتادى. ارينە، ٴبىز بۇلاي سويلەۋدەن اۋلاقپىز. سونداي-اق ٴبىز وسەك ايتىپ، عايباتتاۋدان، بىرەۋگە جالا جابۋدان دا اۋلاق بولۋىمىز كەرەك (ناقىل سوزدەر 16:28 وقىڭىز).
3. ٴسوزىمىز كوڭىلدى ٶسىرسىن دەسەك، نە ىستەۋىمىز كەرەك؟
ايتاتىن سوزىمىزگە قاراپ، جۇرەگىمىز بەن ويىمىزدا نە بار ەكەنىن اڭعارۋعا بولادى (لۇقا 6:45). سوندىقتان جۇرەك پەن وي-سانانى جاقسى نارسەلەرگە تولتىرعانىمىز ابزال. بۇل ٷشىن ٵدىل دە تازا، سۇيىسپەنشىلىك وياتاتىن ٵرى ماقتاۋعا تۇراتىن نارسەلەر جونىندە ويلانۋىمىز كەرەك (فىلىپىلىكتەرگە 4:8). البەتتە، بۇعان قانداي كوڭىل كوتەرۋ ٴتۇرىن، قانداي دوستاردى تاڭدايتىنىمىز ىقپال ەتپەي قويمايدى (ناقىل سوزدەر 13:20). ويلانىپ بارىپ سويلەۋدى دە ادەتكە اينالدىرعانىمىز جاقسى. سوزىمىزدىڭ جاعىمدى دا، جاعىمسىز دا اسەرى بار ەكەنىن ۇمىتپايىق. كيەلى كىتاپتا: «ويلانباي سويلەگەن سەمسەردەي جارالايدى، ال دانانىڭ ٴتىلى ساۋىقتىرادى»،— دەلىنگەن (ناقىل سوزدەر 12:18).
تەرەڭىرەك ٷڭىلىڭىز
ٴسوزىمىز ەحوباعا جاعىمدى بولۋ ٷشىن جانە باسقالاردىڭ كوڭىلىن مارقايتۋ ٷشىن نە ىستەۋگە بولاتىنىن كورەيىك.
4. تىلىمىزگە يە بولۋ
ايتۋىن ايتىپ الىپ، كەيىن بارماق تىستەپ قالاتىن كەزدەرىمىز بولىپ جاتادى (جاقىپ 3:2). عالاتتىقتارعا 5:22، 23 وقىپ، مىنا سۇراقتاردى تالقىلاڭىزدار:
-
سوزىڭىزگە يە بولۋ ٷشىن وسى قاسيەتتەردىڭ قايسىسىن دۇعادا سۇرار ەدىڭىز؟ بۇل قاسيەتتەر سىزگە قالاي كومەكتەسۋى مۇمكىن؟
قورىنتتىقتارعا 1-حات 15:33 وقىپ، تومەندەگى سۇراقتى تالقىلاڭىزدار:
-
دوستارىڭىز بەن تاڭداعان ويىن-ساۋىعىڭىز سويلەگەن سوزىڭىزگە قالاي ىقپال ەتۋى مۇمكىن؟
قالاي سويلەيتىنىمىزگە نە اسەر ەتەدى؟
ۋاعىزداۋشى 3:1، 7 وقىپ، كەلەسى سۇراقتى تالقىلاڭىزدار:
-
قاي كەزدە ۇندەمەي قويا سالعان دۇرىس، ال قاي كەزدە سويلەيتىن ۋاقىتتى كۇتكەن دۇرىس؟
5. باسقالار جايلى جاقسى سويلەۋ
قالاي ٴبىز بىرەۋدىڭ كوڭىلىنە تييۋدەن يا جامانداۋدان اۋلاق بولا الامىز؟ بەينەروليكتى كورىپ، تومەندەگى سۇراقتاردى تالقىلاڭىزدار:
-
بەينەروليكتەگى ەر باۋىرلاس قاي جاعىنان وزگەرۋدى شەشتى جانە نەگە؟
-
ول وزگەرۋ ٷشىن نە ىستەدى؟
ۋاعىزداۋشى 7:16 وقىپ، مىنا سۇراقتى تالقىلاڭىزدار:
-
بىرەۋ تۋرالى جامان نارسە ايتقىمىز كەلىپ تۇرسا، نەنى ەستە ۇستاۋىمىز كەرەك؟
ۋاعىزداۋشى 7:21، 22 وقىپ، تومەندەگى سۇراقتى تالقىلاڭىزدار:
-
وسى تارماقتار ٴسىزدى بىرەۋ جامانداعاندا، قاتتى كوڭىلگە الماۋعا قالاي كومەكتەسەدى؟
6. تۋعاندارىڭىزبەن مەيىرىممەن سويلەسىڭىز
وتباسىڭىزبەن سويلەسكەندە، ەحوبا سوزىڭىزدەن مەيىرىم مەن سۇيىسپەنشىلىكتىڭ ەسىپ تۇرعانىن قالايدى. بەينەروليكتى كورىپ، مىنا سۇراقتى تالقىلاڭىزدار:
-
وتباسىڭىزبەن جىلى-جۇمساق سويلەسۋگە نە كومەكتەسەدى؟
ەفەستىكتەرگە 4:31، 32 وقىپ، مىنا سۇراقتى تالقىلاڭىزدار:
-
قانداي سوزدەر وتباسىنداعىلاردىڭ مەيىرىن قاندىرىپ، مەرەيىن وسىرەدى؟
ەحوبا ٶز ۇلى يساعا مەيىر-ماحابباتىن اشىق بىلدىرگەن. ماتاي 17:5 وقىپ، تومەندەگى سۇراقتى تالقىلاڭىزدار:
-
وتباسىڭىزبەن قالاي سويلەسۋ كەرەكتىگىنە قاتىستى ەحوبادان نە ۇيرەنە الاسىز؟
وزگەلەردى ماقتاۋدىڭ جولىن ىزدەڭىز
كەيبىرەۋلەردىڭ ايتاتىنى: «مەن ويىمدا نە بار، سونى ايتامىن. جۇرتقا ۇناي ما، ۇناماي ما، وندا شارۋام جوق».
-
ٴسىز وسىمەن كەلىسەسىز بە؟ نەگە؟
تۇيىندەمە
ٴسوزدىڭ قۇدىرەتى كۇشتى. سوندىقتان نە ايتاتىنىمىزدى، قاشان ايتاتىنىمىزدى جانە قالاي ايتاتىنىمىزدى الدىن الا ويلاپ الۋىمىز كەرەك.
قايتالاۋ
-
ٴسوزىمىز بىرەۋلەرگە دەم بەرۋ ٷشىن نە ىستەسەك بولادى؟
-
قانداي سوزدەردەن اۋلاق بولعىمىز كەلەدى؟
-
ٵردايىم مەيىرىممەن، جىلى- جۇمساق سويلەۋگە نە كومەكتەسەدى؟
قوسىمشا ىزدەنىڭىز
جىلى دا جاعىمدى سويلەۋگە بىزگە نە كومەكتەسەدى؟
جامان سوزدەر ايتپاۋعا نە كومەكتەسەتىنىن ٴبىلىڭىز.
«بالاعاتتاۋعا بولماي ما؟» (jw.org تور بەكەتىندەگى ماقالا)
وسەككە جاقىن بولماۋ ٷشىن نە ىستەۋ كەرەك؟
ەحوبا ٴبىر كىسىگە بالاعات سوزدەرىن قويۋعا قالاي كومەكتەسكەنىن وقىپ كورىڭىز.
قىزىقتى بولار مالىمەتتەر
ٴجيى قويىلاتىن سۇراقتار
كيەلى كىتاپتى زەرتتەۋ ساباعى دەگەن نە؟
كيەلى كىتاپتى اقىسىز زەرتتەۋ ساباعىنا قاتىستى سۇراقتارىڭىزعا جاۋاپ الىڭىز.
