ILINNIAGASSAQ 51
Jehovap nuannarisaanik qanoq oqaloriaaseqarsinnaavit?
Jehovap pinngortikkamisigut nuanningaartumik tunivaatigut, tassa oqalussinnaanermik. Qanoq oqaloriaaseqarnersugut soqutigaa? Aap! (Jaaku 1:26 atuarsiuk). Jehovap iluarisaanik qanoq oqaloriaaseqarsinnaavugut?
1. Qanoq oqaloriaaseqartassaagut?
Biibilimi ima peqquneqarpugut: “Qiimmassaqatigiittuarlusilu ineriartorteqatigiittuaritsi.” (Tessaluunikamiunut 1. 5:11) Qiimmassarneqartariaqartumik nalunngisaqarpit? Qanoq qiimmassarsinnaaviuk? Asanerarsinnaavat, aamma taanna pillugu suna nuannarinerlugu oqaluttuussinnaavat. Biibilimit allassimaffimmik taassuma qiimmaallaatigisinnaasaanik eqqaasaqarsinnaavit? Eqqaamajullu oqaatsit suut atornerlugit eqqarsaatigiinnarnagu aamma oqaloriaatsit eqqumaffigisariaqarit. Oqaloriaaserput allanut sunniuteqangaarsinnaammat tamatigut inussiarnisaartumik saamasumillu oqaloriaaseqarniartassaagut. – Ussatit 15:1.
2. Qanoq oqaloriaaseqarnaveersaassaagut?
Biibilimi ima allassimavoq: “Oqaatsinik mikiarsimasunik qanissinnit aniatitaqassanngilasi.” (Efesossimiut 4:29 atuarsiuk). Tassa oqaatsit ajuallannartut oqaasipalaallu atornaveersaassavagut. Aamma allat oqaluuserinerlunnaveersaarlugillu nikassarnaveersaassavagut, aliasulersinniarlugilluunniit oqaaseqarnaveersaassaagut. – Ussatit 16:28 atuarsiuk.
3. Ineriartornartumik oqaloriaaseqarnissamut suut iluaqutigissavagut?
Uummammiugut eqqarsaatigullu oqaatsitsinnit ersertarput. (Lukkarsi 6:45) Taamaattumik ajunngitsumik oqaloriaaseqarumalluta ajunngitsut eqqarsaatiginiartariaqarpagut, tassa naapertuilluartut, minguitsut, asanartut nersortariallillu eqqarsaatigisariaqarpagut. (Filippimiut 4:8) Eqqarsaatitsinnut sunniuteqartarmata silatusaarluta aliikkutassarsiorlutalu ikinngutissarsiortassaagut. (Ussatit 13:20) Oqaatsigut allanut qanoq sunniuteqassanersut eqqarsaatigisariaqarparput, Biibilimimi ima allassimavoq: “Eqqarsariaqqaarnani oqaaserisat panatut kapisisarput, ilisimasulli oqaa katsorsaataasarpoq.” (Ussatit 12:18) Taamaattumik oqaaseqannginnitsinni eqqarsarluaqqaartassaagut.
ITISILIINEQ
Jehovap iluarisaanik allallu qiimmaallaatigisaannik qanoq oqaloriaaseqarsinnaasutit paasiniaruk.
4. Silatusaarlutit oqaluttarit
Ilaannikkut oqaaserisimasagut ilerasuutigisarpagut. (Jaaku 3:2) Galaatiamiut 5:22, 23 atuarsigit apeqqutillu uku eqqartorlugit:
-
Silatusaartumik oqalussinnaajumallutit pissuserineqartussat allassimasut ilaat sorleq qinnutigerusuppiuk? Qanoq iluaqutigissaviuk?
Korintimiunut 1. 15:33 atuarsiuk apeqqullu una eqqartorlugu:
-
Ikinngutitit aliikkutatillu oqaloriaatsinnut qanoq sunniuteqarsinnaappat?
Oqaloriaatsit sunit sunnerneqartarpa?
Oqaluussisartup oqaasii 3:7 atuarsiuk apeqqullu una eqqartorlugu:
-
Qaqugukkut nipangersimanissaq oqaaseqanngikkallarnissarluunniit silatusarnerussava?
5. Allat ajunngitsumik eqqartortakkit
Qanoq allat ajuallatsinnaveersaarlugillu inussiarniitsumik oqalunnaveersaarsinnaavugut? VIDEO takusiuk apeqqutillu tulliuttut eqqartorlugit.
-
Sooq qatanngutip angutip allat pillugit oqaloriaatsini allanngortikkusuppaa?
-
Allannguiumalluni sua?
Oqaluussisartup oqaasii 7:16 atuarsiuk apeqqullu una eqqartorlugu:
-
Allat ajortumik eqqartorusulerutsigit suna eqqaamasariaqarparput?
Oqaluussisartup oqaasii 7:21, 22 atuarsigit apeqqullu una eqqartorlugu:
-
Oqaluuserinerlunneqaruit kamalinnginnissannut versit qanoq iluaqutigisinnaavigit?
6. Ilaquttatit inussiarnersumik oqaluuttakkit
Jehovap kissaatigaa ilaquttagut inussiarnersumik asannittumillu oqaluuttassagigut. VIDEO takusiuk apeqqullu tulliuttoq eqqartorlugu.
-
Ilaquttavit inussiarnersumik oqaluunnissaannut suna iluaqutigissaviuk?
Efesossimiut 4:31, 32 atuarsigit apeqqullu una eqqartorlugu:
-
Ilaquttatta nuannarisaannik qanoq oqaloriaaseqarsinnaavugut?
Jehovap ernerminut, Jiisusimut, misigissutsini oqaatigisarpai. Matiusi 17:5 atuarsiuk apeqqullu una eqqartorlugu:
-
Ilaquttannut oqaloriaatsinni Jehova qanoq ilaarsinnaaviuk?
Allanik nersualaarinissannut periarfissarsiortarit
OQARTOQARTARPOQ: “Eqqarsaatikka annittarpakka. Oqaloriaasera allat susassarinngilaat.”
-
Isumaqataavit? Sooq taama isumaqarpit?
EQIKKAANEQ
Oqaatsigut sunniuteqangaartarput. Sunik, qaqugu qanorlu oqaaseqassanerluta eqqarsaatigilluartariaqarparput.
Uteqqiineq
-
Oqaatsikkut allat qanoq ikiorsinnaavigit?
-
Qanoq oqaloriaaseqarnaveersaarusuppit?
-
Inussiarnersumik ineriartornartumillu oqaaseqartuarnissamut suut iluaqutigisinnaavagut?
NAMMINEQ MISISSUGASSATIT
Suna iluaqutigalugu ineriartornartumik oqaloriaaseqarsinnaavugut?
Oqaasipalaaqarnaveersaarnissannut suna iluaqutigisinnaanerlugu atuaruk.
“Oqaasipilunneq ilumut ajortuugami?” (Nittartakkatsinni allaaserisaq)
Allat qanoq oqaluuserinerlunnaveersaarsinnaagitit atuaruk.
Angut oqaasipilunnaveersaarniarluni ilungersortoq Jehovamit qanoq ikiorneqartoq atuaruk.
“Inuunera qanoq innersoq eqqarsaatigillualerpara” (Napasuliaq Alapernaarsuiffik-mi allaaserisaq)