Yehoba byo etulengele, witupeele kya bupe kyanema bingi. Akino kya bupe ke kwamba. Nanchi utako muchima pa byo twingijisha kino kya bupe nyi? Ee utako muchima! (Tangai Yakoba 1:26.) Pano twakonsha kwingijishanga byepi kino kya bupe pa kuba’mba tutokeshenga Yehoba ku muchima?

1. Twakonsha kwingijisha byepi bulongo kino kya bupe kitupa Yehoba?

Baibolo witukambizha’mba: “Itundaikainga ne kwikomesha anwe bene na bene.” (1 Tesalonika 5:11) Nanchi kujipo bantu bamo bo mwafwainwa kutundaika nyi? Mwafwainwa kwibatundaika byepi? Mwafwainwa kwibabuula’mba mwibata muchima. Kabiji mwafwainwa ne kwibasanchila pa bintu bimo byo boba. Nanchi kujipo kinembelo kyo mwafwainwa kwingijisha kutundaikilamo muntu ye mwayuka nyi? Mu Baibolo muji binembelo byavula bingi byo mwafwainwa kwingijisha. Onkao mambo, vulukainga kuba’mba byambo byo mwamba byakonsha kutundaika bantu nangwa kwibakozha ku muchima. O ene mambo o twibikilako kwamba na jiwi jakooka kabiji saka twatekanya.—Byambo bya Maana 15:1.

2. Ñambilo ya mutundu ka yo twafwainwa kuchinuzhuka?

Baibolo waamba’mba: “Kange muleke byambo byatama bilupuke mu kanwa kenu ne.” (Tangai Efisesa 4:29.) Kino kibena kulumbulula’mba kechi twafwainwa kwingijisha ñambilo yatama nangwa kwamba byambo byakonsha kukozha bakwetu ku muchima ne. Kabiji twafwainwa kwikileka kuyebeka bakwetu.—Tangai Byambo bya Maana 16:28.

3. Ñanyi kintu kyafwainwa kwitukwasha kwamba byambo byafwainwa kutundaikanga bakwetu?

Bintu byo twambapo kimye kyonse bimwesha bintu biji ku muchima wetu nangwa byo tubena kulangulukapo. (Luka 6:45) Onkao mambo, twafwainwa kufunjisha milanguluko yetu kuta muchima pa bintu byawama, bintu byaoloka, bintu bilengela muntu kwilama bulongo, butemwe ne bintu byafwainwa kutotwa ku bantu. (Filipai 4:8) Pa kuba’mba tute muchima pa bintu byawama, twafwainwa kusalanga bulongo makayo, bya kisangajimbwe ne kusala bulongo balunda. (Byambo bya Maana 13:20) Saka tukyangye kwamba byambo kyawama kukilangulukapo patanshi. Kabiji mwafwainwa kulanguluka pa byo mukeba kwamba kana bisakutundaika bakwenu nangwa bisakwibakozha ku muchima. Baibolo waamba’mba: “Byambo bya kupulumukatu byasañana nobe mpoko, pakuba byambo bya muntu wa maana bibukañana.”—Byambo bya Maana 12:18.

 FUNJILAIPO BIKWABO

4. Chinuzhukainga ñambilo yatama

Kimye kimo twamba byambo bitulengela kwilangulusha kulutwe. (Yakoba 3:2) Tangai Ngalatiya 5:22, 23, ne kwisamba ano mepuzho:

• Ñanyi byubilo bimo biji mu kino kinembelo byo mwafwainwa kulombapo byafwainwa kwimukwasha kwambanga byambo byawama? Kabiji bino byubilo byafwainwa kwimukwasha byepi?

Tangai 1 Kolinda 15:33, ne kwisamba buno bwipuzho:

• Balunda nenu ne bya kisangajimbwe byo mwatemwa byakonsha kulengela ñambilo yenu kwikala byepi?

Tangai Musapwishi 3:1, 7, ne kwisamba buno bwipuzho:

• Ñanyi kimye kyawama kuzhindamapotu kabiji ñanyi kimye kyawama kwambilamo?

 5. Ambainga bintu byawama pa bakwenu

6. Mweshainga kifyele ne lusa pa kwisamba na ba mu kisemi kyenu

 ÑANYI BISHINKA BYO MWAFUNDA?

Byambo byo twamba byakonsha kukwasha bakwetu nangwa kwibakozha ku muchima. Onkao mambo, twafwainwa kulangulukapo saka tukyangye kwamba, kimye kya kwamba ne jishinda jakwambilamo.

Mepuzho a kupitulukamo

• Ñanyi mashinda o mwafwainwa kwingijishishamo kya bupe kya kwamba pa kukwasha bakwenu?

• Ñanyi ñambilo yo mwafwainwa kuchinuzhuka?

• Ñanyi bintu byafwainwa kwitukwasha kwambanga na kifyele ne kutundaika bakwetu?