ບົດທີ 51

ເຈົ້າຈະເວົ້າໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ?

ເປີດ

ເມື່ອພະເຢໂຫວາສ້າງເຮົາ ເພິ່ນເຮັດໃຫ້ເຮົາມີຄວາມສາມາດທີ່ຈະເວົ້າ ນີ້ເປັນຂອງຂວັນທີ່ສຸດຍອດຫຼາຍ. ແຕ່ເພິ່ນສົນໃຈບໍວ່າເຮົາຈະໃຊ້ຂອງຂວັນນີ້ແນວໃດ? ເພິ່ນສົນໃຈແນ່ນອນ! (ອ່ານຢາໂກໂບ 1:26) ຖ້າເປັນແນວນັ້ນ ເຮົາຈະເວົ້າໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ?

1. ເຮົາຈະໃຊ້ຂອງຂວັນທີ່ເຮົາໄດ້ຮັບຈາກພະເຢໂຫວາໃຫ້ເປັນປະໂຫຍດໄດ້ແນວໃດ?

ຄຳພີໄບເບິນບອກໃຫ້ເຮົາ “ໃຫ້ກຳລັງໃຈກັນແລະເສີມສ້າງກັນໃຫ້ເຂັ້ມແຂງ.” (1 ເທຊະໂລນິກ 5:11) ເຈົ້າຮູ້ຈັກໃຜບໍທີ່ຕ້ອງການກຳລັງໃຈ? ເຈົ້າຈະເຮັດແນວໃດເພື່ອຊ່ວຍໃຫ້ເຂົາເຈົ້າຮູ້ສຶກດີຂຶ້ນ? ເຈົ້າອາດຈະບອກວ່າ ເຈົ້າເປັນຫ່ວງເຂົາເຈົ້າຫຼາຍ. ຫຼືບອກວ່າເຈົ້າເຫັນຂໍ້ດີຫຍັງໃນໂຕເຂົາເຈົ້າແດ່. ນອກຈາກນັ້ນ ເຈົ້າອາດຈະຄິດເຖິງຂໍ້ຄຳພີຈັກຂໍ້ໜຶ່ງທີ່ຈະເຮັດໃຫ້ຄົນທີ່ເຈົ້າຮູ້ຈັກໄດ້ຮັບກຳລັງໃຈ. ມີຂໍ້ຄຳພີຫຼາຍຂໍ້ທີ່ຈະໃຊ້ເພື່ອໃຫ້ກຳລັງໃຈເຂົາເຈົ້າໄດ້. ແລະຂໍຈື່ໄວ້ວ່າ ວິທີທີ່ເຈົ້າເວົ້າຈະໃຫ້ກຳລັງໃຈຄົນອື່ນໄດ້ຫຼາຍຄືກັນ. ດັ່ງນັ້ນ ຂໍໃຫ້ພະຍາຍາມເວົ້າດີໆແລະເວົ້າມ່ວນໆກັບຄົນອື່ນສະເໝີ.—ສຸພາສິດ 15:1

2. ຄຳເວົ້າແບບໃດທີ່ເຮົາບໍ່ຄວນເວົ້າ?

ຄຳພີໄບເບິນບອກວ່າ: “ຢ່າໃຫ້ຄຳຫຍາບຄາຍອອກມາຈາກປາກຂອງພວກເຈົ້າ.” (ອ່ານເອເຟໂຊ 4:29) ນີ້ໝາຍຄວາມວ່າເຮົາຕ້ອງບໍ່ເວົ້າຄຳຫຍາບ ບໍ່ເວົ້າສຽດສີ ຫຼືບໍ່ເວົ້າຫຍັງກໍຕາມທີ່ອາດເຮັດໃຫ້ຄົນອື່ນຮູ້ສຶກເສຍໃຈ. ແລະເຮົາກໍຈະບໍ່ເວົ້າຊຸບຊິບນິນທາຫຼືເວົ້າໃສ່ຮ້າຍຄົນອື່ນນຳ.—ອ່ານສຸພາສິດ 16:28

3. ເຮົາຕ້ອງເຮັດຫຍັງເພື່ອຈະເວົ້າໃຫ້ກຳລັງໃຈຄົນອື່ນໄດ້?

ສິ່ງທີ່ເຮົາເວົ້າຈະເຮັດໃຫ້ຄົນອື່ນຮູ້ວ່າເຮົາຄິດຫຍັງແລະຮູ້ສຶກແນວໃດແທ້ໆ. (ລູກາ 6:45) ດັ່ງນັ້ນ ເຮົາຕ້ອງຝຶກໂຕເອງໃຫ້ຄິດແຕ່ເລື່ອງດີໆຄື ເລື່ອງທີ່ຖືກຕ້ອງ ເລື່ອງທີ່ບໍລິສຸດ ເລື່ອງທີ່ໜ້າຮັກ ແລະເລື່ອງທີ່ໜ້າຍົກຍ້ອງ. (ຟີລິບປອຍ 4:8) ເພື່ອຈະເຮັດແບບນັ້ນໄດ້ ເຮົາຕ້ອງເລືອກຄວາມບັນເທີງທີ່ດີແລະເລືອກໝູ່ທີ່ດີ. (ສຸພາສິດ 13:20) ນອກຈາກນັ້ນ ເຮົາຕ້ອງຄິດກ່ອນວ່າເຮົາຈະເວົ້າຫຍັງແລະຈະເວົ້າແບບໃດ. ແລະຄິດເບິ່ງນຳວ່າສິ່ງທີ່ເຮົາເວົ້າຈະເຮັດໃຫ້ຄົນອື່ນຮູ້ສຶກແນວໃດ. ຄຳພີໄບເບິນບອກວ່າ: “ຄຳເວົ້າທີ່ບໍ່ຄິດເປັນຄືດາບທີ່ສຽບແທງ ແຕ່ຄຳເວົ້າຂອງຄົນສະຫຼາດຈະຊ່ວຍຢຽວຢາຮັກສາ.”—ສຸພາສິດ 12:18, ລ.ມ.