TUTO 51
Ki Lika Mañi Zekona Kumitusa Kubulelanga Zetabisa Jehova?
Kubulela ki yeñwi ya limpo zende hahulu zalufile Jehova. Kono kana Mulimu waisa pilu ka za moilutusiseza mpo ya kubulela? Eni! (Mubale Jakobo 1:26.) Kacwalo lukona kuitusisa cwañi mpo ye ka nzila yetabisa Jehova?
1. Luswanela kuitusisa cwañi mpo ya kubulela?
Bibele ilubulelela kuli “muzwelepili kususuezana ni kutiisana.” (1 Matesalonika 5:11) Ki bo mañi bemuziba babatokwa kususuezwa? Mukona kuezañi kuli mubatuse kuikutwa hande? Mubataluseze kuli mwabaisa pilu. Mwakona kueza cwalo ka kubataluseza zemuitebuha ka za bona. Kana kunani liñolo lemukona kuitusisa kuli muomba-ombe mutu yomuñwi? Kunani mañolo amañata emukona kuitusisa. Nto yeñwi yemuswanela kuhupula ki ya kuli, zemubulela zakona kuba zende kono muswanela kutokomela momulibulelela. Kacwalo kamita mubulelange ka nzila yende inze muwile pilu.—Liproverbia 15:1.
2. Ki lipulelo zecwañi zemuswanela kuambuka?
Bibele ili: “Kusike kwazwa linzwi lelibolile mwa mulomo wamina.” (Mubale Maefese 4:29.) Taba yeo italusa kuli haluswaneli kuitusisanga lipulelo zemaswe kamba kubulela litaba zekatahisa kuli mutu yomuñwi aikutwe bumaswe. Hape haluswaneli kusebanga babañwi kamba kubasinya libizo.—Mubale Liproverbia 16:28.
3. Ki lika mañi zekona kulutusa kubulelanga zeyahisa?
Hañata zelubulela libonisa ze mwa pilu yaluna kamba zelunahana. (Luka 6:45) Kacwalo luswanela kuitwaeza kuisanga pilu kwa lika zende ili zelukile, zekenile, zelatiwa, ni zelumbiwa. (Mafilipi 4:8) Kono kuli lueze cwalo lutokwa kuketa balikani babande ni kuitabisanga ka nzila yende. (Liproverbia 13:20) Hape luswanela kunahanisisanga pili lusika bulela kale. Munyakisisange mobakona kuikutwela babañwi ka za litaba zemubulela. Bibele ibulela kuli: “Lipulelo zebulelwa ka kusanahanisisa liswana sina lilumo lelitaba, kono lilimi la bababutali lafolisa.”—Liproverbia 12:18.
MUBATISISE
Muitute zemukona kueza kuli mubulelange ka nzila yetabisa Jehova ni zemukona kueza kuli mususuezange babañwi.
4. Mubulelange ka nzila yende
Ka linako zeñwi, lwainyazanga hamulaho wa kubulela nto yeñwi. (Jakobo 3:2) Mubale Magalata 5:22, 23, mi kihona mukanyakisisa lipuzo zelatelela:
-
Kwa tulemeno totubulezwi kwa liñolo le, ki kafi kemukona kukupa Mulimu kuli amituse kuba ni kona ilikuli mubulelange ka nzila yende? Mukona kutusiwa cwañi haiba muba ni tulemeno to?
Mubale 1 Makorinte 15:33, mi kihona mukanyakisisa puzo yelatelela:
-
Batu bemuketa kuba balikani bamina ni zemuketa kuitabisa ka zona likona kutahisa kuli mubulele ka nzila yecwañi?
Ki lika mañi zekona kutahisa kuli lipulelo zamina libe zemaswe kamba zende?
Mubale Muekelesia 3:1, 7, mi kihona mukanyakisisa puzo yelatelela:
-
Ki mwa muinelo ocwañi momukona kuiketela kusabulela kamba kubulela hasamulaho wa nako?
5. Mubulelange zende ka za babañwi
Lukona kuambuka cwañi mukwa wa kubulelanga zeutwisa babañwi butuku? Mubuhe VIDIO, mi kihona mukanyakisisa lipuzo zelatelela.
-
Ki kabakalañi muzwale yemuboni mwa vidio hanaabata kucinca zanaabulelanga ka za babañwi?
-
Ki lika mañi zanaaezize kuli acince?
Mubale Muekelesia 7:16, mi kihona mukanyakisisa puzo yelatelela:
-
Ki lika mañi zeluswanela kueza haiba lulemuha kuli selukalisa kubulela lika zemaswe ka za mutu yomuñwi?
Mubale Muekelesia 7:21, 22, mi kihona mukanyakisisa puzo yelatelela:
-
Litimana ze likona kumitusa cwañi kusahalifanga kapili mutu yomuñwi habulela lika zemaswe ka za mina?
6. Muambolisanange ni ba mwa lubasi lwamina ka nzila yende
Jehova ubata kuli luna ni baba mwa lubasi lwaluna luambolisanange ka musa ni ka lilato. Mubuhe VIDIO, mi kihona mukanyakisisa lipuzo zelatelela.
-
Ki lika mañi zeka mitusa kuambolanga hande ni ba mwa lubasi lwamina?
Mubale Maefese 4:31, 32, mi kihona mukanyakisisa puzo yelatelela:
-
Ki lipulelo zecwañi zekona kutusa lubasi kuswalisana?
Jehova naatalusize mwanaaikutwela ka za Mwanaa hae, Jesu. Mubale Mateu 17:5, mi kihona mukanyakisisa puzo yelatelela:
-
Mukona kulikanyisa cwañi Jehova hamuambola ni ba mwa lubasi lwamina?
Mubabazange babañwi
BABAÑWI BABULELANGA KULI: “Nilukuluhile kubulela kaufela zenitabela kubulela. Hanina taba ni mobaikutwela babañwi.”
-
Kana mwalumelelana ni taba yeo? Ki kabakalañi hamualaba cwalo?
LITABA KA BUKUSWANI
Lipulelo linani maata. Luswanela kunahanaga pili lusika bulela kale, kuziba nako foluswanela kubulelela, ni kutokomela molubulelela.
Mulundulule
-
Mukona kuitusisa cwañi mpo ya kubulela kuli mutuse babañwi?
-
Ki lipulelo zecwañi zemubata kuambuka?
-
Ki lika mañi zekona kulutusa kuli kamita lubulelange zende ni zesusueza babañwi?
MUBONE LITABA ZEÑWI
Ki lika mañi zekona kulutusa kubulelanga zende ka za babañwi?
Munyakisise zekona kumitusa kuambuka lipulelo zemaswe.
“Kana fosahalile Luli Kuitusisa Lipulelo Zemaswe?” (Taba ya fa webusaiti)
Mubone momukona kuambukela lusebo.
Mulemuhe mo muuna yomuñwi naatuselizwe ki Jehova kutuhela mukwa omaswe wa kukonkanga.
“Nakala Kunahana Hahulu za Bupilo Bwaka Bwa Kwapili” (Tawala ya Mulibeleli, August 1, 2013)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
