CHILONGESA 51
Uno Hanjikiso Yove Yinahase Kwivwisa Ngachilihi Yehova Kuwaha?
Omu Yehova atutengele, atuhanyine wana wakuhanjika. Uno ahaka mangana kujila natuzachishilamo wana kana tahi? Eyo. (Tanga WaYakova 1:26.) Natuhasa ngachilihi kuzachisa wana wakuhanjika mujila yize nayivwisa Yehova kuwaha?
1. Uno twatela kuzachisa ngachilihi wana wakuhanjika?
Mbimbiliya yatulweza ngwayo ‘tulikolezezenga navakwetu, nakulitunga nawa navakwetu.’ (Wavaka-Tesolonyika 1, 5:11) Kutala kuliko vatu vamwe unatachikiza vaze vali nakusakiwa kuvakolezeza tahi? Vyuma muka unahase kulinga mangana uvakolezeze? Vakafwe vamone ngwavo wavazakama. Nge chinahase, valweze vyuma vyamwaza veji kulinganga vize wazanga. Kutala kuliko chisoneka unahase kuzachisa hakukolezeza mutu watachikiza tahi? Kwatwama visoneka vyavivulu vize unahase kuzachisa. Tachikiza ngwove jila nauhanjikilamo nawa yinahase kuvakolezeza chikuma. Shikaho lwola lwosena, esekanga kuhanjika nalikoji nalizu lyalivwovu.—Vishimo 15:1.
2. Hanjikiso muka twatela kulihendako?
Mbimbiliya ngwayo: “Mutunwa twenu kanda namulovoka mazu akupolako.” (Tanga Wavaka-Efwesu 4:29.) Echi chalumbununa nge twatela kulihenda kuhanjikiso yayipi chipwe mazu akulemeka nawawa akasautu aze nawevwisa mutu kukola kumuchima. Twatela kulihenda nawa kukuyongola vakwetu nakulusongi.—Tanga Vishimo 16:28.
3. Vyuma muka navitukafwa tuhanjikenga mujila yize nayitunga vakwetu?
Kakavulu vyuma tweji kuhanjikanga vikiko vyeji kusololanga vyuma vili mumuchima wetu namuvishinganyeka vyetu. (Luka 6:45) Shikaho, twatela kulijilisa kushinganyekanga havyuma vyamwaza, navyevi vyakwoloka, navyevi vitoma, navyevi navilingisa vatu vavizange, kaha nawa vyakwalisa. (Wavaka-Fwilipi 4:8) Chuma nachitukafwa tushinganyekenga havyuma kana shina kusakulanga kanawa masepa navyakuhemahema. (Vishimo 13:20) Echi nachitukafwa nawa tuvangilenga kushinganyeka shimbu kanda tuhanjike. Shikaho shinganyeka omwo navevwa vakwenu hamazu nauhanjika. Mbimbiliya ngwayo: “Kuhanjika chakulusuka cheji kutuvanga nge poko yamukwale, oloze lilimi lyamuka-mangana lyeji kuhindulanga.”—Vishimo 12:18.
LINANGULE VYAKUJIMINYINA
Linangule omwo unahase kuhanjika mujila yize nayivwisa Yehova kuwaha nakukolezeza nawa vakwenu.
4. Zangama nahanjikiso yove
Lwola lumwe tweji kuhanjikanga vyuma vize tweji kuliveyanga. (WaYakova 3:2) Tangenu Wavaka-Ngalesha 5:22, 23, nakushimutwila havihula vino:
-
Mihako muka unahase kulomba Yehova akukafwe upwenga nayo mangana uhanjikenga mujila yamwaza? Uno mihako kana yinahase kukukafwa ngachilihi?
Tangenu Wavaka-Kolinde 1, 15:33, nakushimutwila hachihula chino:
-
Uno masepa naulikata navo navyakuhemahema nausakula vinahase kukulingisa upwenga nahanjikiso muka?
Vyuma muka vinahase kukulingisa upwenga nahanjikiso yayipi chipwe yamwaza?
Tangenu Muka-kwambulula 3:1, 7, nakushimutwila hachihula chino:
-
Lwola muka chinahase kupwa chakutamo kuhola kulu chipwe kuvandamina lwola lwamwaza lwakuhanjika?
5. Hanjikanga vyuma vyamwaza hali vakwenu
Natulihenda ngachilihi kukuhanjika vyuma vize navivwisa vakwetu kupihya? Talenu VINDIYO, nakushimutwila havihula vinakavangizaho.
-
Kweseka navindiyo, mwomwo ika ou ndumbwetu afwililile kwalumunako jila ahanjikililengamo navakwavo?
-
Vyuma muka alingile mangana alumuneko hanjikiso yenyi?
Tangenu Muka-kwambulula 7:16, nakushimutwila hachihula chino:
-
Vyuma muka twatela kwanuka nge tuli mucheseko chakuhanjika vyuma vyavipi hali vakwetu?
Tangenu Muka-kwambulula 7:21, 22, nakushimutwila hachihula chino:
-
Uno eji jivesi najikukafwa ngachilihi uhone kupihilila nge vatu vali nakuhanjika vyuma vyavipi hali yove?
6. Hanjikanga navaka-tanga yove mujila yalikoji
Yehova asaka tuhanjikenga navaka-tanga yetu mujila yalikoji nazangi. Talenu VINDIYO, nakushimutwila hachihula chinakavangizaho.
-
Vyuma muka navikukafwa uhanjikenga navaka-tanga yove mujila yalikoji?
Tangenu Wavaka-Efwesu 4:31, 32, nakushimutwila hachihula chino:
-
Hanjikiso muka yeji kulingisanga vatu valinunge mutanga?
Yehova ahanjikile hatoma ngwenyi azanga Mwanenyi Yesu. Tangenu Mateu 17:5, nakushimutwila hachihula chino:
-
Naulondezeza ngachilihi Yehova omu nauhanjikanga navaka-tanga yove?
Fwila kusangejekanga vakwenu
VATU VAMWE NGWAVO: “Ngweji kuhanjikanga vyosena ovyo ngunasake. Nge nawivwa kupihya, ojo jove.”
-
Uno vishinganyeka kana vyamwaza tahi? Mwomwo ika?
CHISHINA UNALINANGULA
Vyuma natuhanjika vinahase kutunga vakwetu chipwe kuvalemeka. Shikaho twatela kuzangama navyuma natuhanjika, nalwola natuvihanjika najila natuvihanjikilamo.
Kuhituluka
-
Jijila muka unahase kuzachishilamo wana wakuhanjika mangana ukafwe vakwenu?
-
Hanjikiso muka uli nakusaka kulihendako?
-
Vyuma muka navitukafwa tuhanjikenga mujila yalikoji yize nayitunga vakwetu?
WANA VYAVIVULU
Vyuma muka navitukafwa tupwenga nahanjikiso yamwaza?
Wana vyuma navikukafwa ulihende kuhanjikiso yayipi.
“Uno Kulishinga Chapwa Chachipi Chikupu Tahi?” (Chihande chili ha jw.org/lue)
Wana vyuma navikukafwa ulihende kukuyongola vakwenu.
Wana omwo Yehova akafwile lunga umwe ambile hanjikiso yayipi.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
