Jehova’n mihringte a siam khân thilpêk ropui tak, ṭawng theihna thilpêk a pe a. Chu thilpêk kan hman dân chu a tân a pawimawh em? Pawimawh e! (Jakoba 1:26 chhiar rawh.) A nih chuan, engtin nge Jehova tilâwm tûr zâwngin kan ṭawng theihna chu kan hman ang?

1. Engtin nge ṭawng theihna thilpêk chu kan hman ang?

Bible chuan: “Infuih tawnin, intisâwt tawn ṭheuh rawh u,” a ti a. (1 Thessalonika 5:11) Fuih ngai mi ṭhenkhat i hre chhuak thei em? An awm tinuam tûrin eng nge i tih theih? I tân an pawimawhzia hrilh la. An mizia ṭha i tihna laite hrilh ang che. I mi hriat tuemaw tichak theitu tûr Bible châng i hre chhuak thei em? Bible châng thlan theih tûr tam tak a awm a. I thusawia i awphawi chuan mi dangte chungah nghawng a nei thei tih hre reng ang che. Chuvângin, ngilnei tak leh aw nêm taka sawi chu tum ziah ang che.—Thufingte 15:1.

2. Eng ang ṭawngkam nge kan pumpelh ngai?

Bible chuan: “Thu ṭha lo rêng in kâan chhuak suh se,” tiin a sawi a. (Ephesi 4:29 chhiar rawh.) Chumi awmzia chu ṭawngkam ṭha lo, a nih loh leh ngilnei lo tak leh tum rêng vânga mite tina thei thu kan sawi lo tihna a ni. Mi dangte tina thei inrêlna leh insawichhiatna kan pumpelh bawk tûr a ni.—Thufingte 16:28 chhiar rawh.

3. Engin nge mi tichak thei thute sawi tûrin min ṭanpui ang?

Kan thusawite hian kan thinlung, a nih loh leh kan rilrua awmte a târ lang ṭhîn. (Luka 6:45) Chuvângin, a ṭha lam thilte—a fel apiang te, a thianghlim apiang te, a duhawm apiang te, a thangmawi apiangte—ngaihtuah tlat tûrin kan inzir a ngai a. (Philippi 4:8) Hêng thilte ngaihtuah tlat tûr hian intihhlimna leh ṭhiante chu fîmkhur takin kan thlang tûr a ni. (Thufingte 13:20) Chu chuan thu kan sawi hmaa ngaihtuah lâwk tûrin min ṭanpui bawk. I thusawiin mi dangte a nghawng dân tûr ngaihtuah rawh. Bible chuan: “Khandaih chhun anga na taka mi chhun thu sawi an awm a, mi fing lei erawh chu damna a ni,” tiin a sawi a ni.—Thufingte 12:18.

 ZIR BELHIN HMUH BELH RAWH

4. I thusawi dânah fîmkhur rawh

A châng chuan kan za hian kan inchhîr lehna tûr thu kan sawi palh ṭhîn a. (Jakoba 3:2) Galatia 5:22, 23 chhiarin, hêng zawhnate hi sawiho vang che u:

• I thusawi dâna fîmkhur tûra ṭanpui tûr chein hêng miziate zînga eng hi nge ṭawngṭainaah i dîl theih? Hêng miziate hian engtin nge a ṭanpui theih che?

Korinth thawn khat 15:33 chhiarin, he zawhna hi sawiho vang che u:

• Ṭhiante leh intihhlimna i thlante chuan i thusawi dânah eng nghawng nge a neih theih?

Thuhriltu 3:1, 7 chhiarin, he zawhna hi sawiho vang che u:

• Engtik hunah nge ngawih, a nih loh leh sawi chhuah nâna hun ṭha zâwk nghah a finthlâk mai theih?

 5. Mi dangte ṭhatna sawi rawh

6. I chhûngte ngilnei takin be rawh

 KHAIKHAWMNA

Ṭawngkam hian thil a tithei hle a. Kan thusawi tûr, kan sawi hun tûr, leh kan sawi dân tûr ngun taka kan ngaihtuah a ngai.

Ennawnna

• Mi dangte ṭanpui thei tûra thu i sawi theih dân kawng ṭhenkhat chu engte nge ni?

• Eng ang ṭawngkamte nge i pumpelh duh?

• Engin nge ngilnei tak leh mi dangte tichak thei zâwnga thu sawi reng tûrin min ṭanpui thei?