MPANTTA 51
Nnohala ukhitiri cani untteeliha nrima Yehova nimoolumacerweenyu?
Yehova honivaha itthuvo yomaana cinene: wuuluma. Niireke Yehova naawacera inanna hiivano cinvareleehu nteko iyo itthuvweeyo? Woohaanyihacera, iyee! (Nsome Tiyaku 1:26.) Vano manannani ninlamuliyeehu wuuluma wanontteeliheehu nrima Yehova?
1. Manannani ninlamuliyeehu uvarela nteko itthuvo inivahilyaawe Yehova ukhanle wuuluma?
Ibiiblya inniirelaa wiira ‘nihihiyerere ukurumicana ni ulipihana.’ (1 Atesalonika 5:11) Nnaakhitiri umuupuwela ntthu nopheela ulipihiya? Isiyani inlamuliyeenyu upanka wiira uyo ntthuuyo akhale saana? Munthoonyihere uyo ntthuuyo wiira nyuuva nnanwacera. Atthunaka nyuuva nhaana munttottopelaka makhalelo omaana uyova arinaawe. Vano nnoonela cani uvarela nteko iveerusu yo mbiiblyani wiira munlipihe? Cihaavo iveerusu cinci nyuuva cinlamuliyeenyu uthanla wiira munsomele. Ni nhiliyale wiira mananna cinoolumaceenyu ciicammo pooti unlipiha awula unloloviha ntthu. Phimaana, mwiikurumice wuuluma nthoonyiheraka upisa nrima ni unamaana.—Miruku 15:1.
2. Moolumaceroni anlamuliyeehu usempa?
Ibiiblya ineera: “Nihikhume wamalakuni winyu nuulumo noohinamaana.” (Nsome Efesu 4:29.) Ala moolumwaala anhimya isiyani? Anhimya wiira nihaana ninyemaka wuuluma citthu coohiloka awula citthu cooveeha nipheelaka wiira ninriipihe nrima ntthu. Uhiya commo, nihaana ninyemaka waapa ni uhankawaani.—Nsome Miruku 16:28.
3. Isiyani inhala unikavihera wuuluma citthu comaana?
Citthu cinoolumeehu cinaathoonyera itthu irineehu wanrimani wihu. (Luka 6:45) Phimaana, nihaana neekurumicaka wuupuwela citthu comaana—citthu cosariya, cowaarya, coofentyaa ni citthu coophwanela uttottopeliya. (Afilipo 4:8) Wiira nikhitiri iyo, nihaana nithanlaka saana mathukelweehu ni asipatthaniihu. (Miruku 13:20) Ciicammo, unaareera wuupuwela nihinaaya wuuluma. Muupuwele mananna atthu akhwaawe cinhalaaya woonela moolumweenyu. Ibiiblya ineera: “Moolumo oohuupuweliya ratta ankhala toko uhoma wokatana, masi moolumo aatthu oocuwelaca anaavoniha.”—Miruku 12:18.
MUNCERERE WIITTHUCA WINYU
Moone mananna owuulumaca wanontteeliheenyu nrima Yehova ni moone mananna owaalipiha akhunaninyu nimoolumacerweenyu.
4. Ratta nimoolumacerweenyu
Ikwaha cikhwaawe, ninawuulumaka citthu ni wahoolo waya uttharuwa nlattu wo citthu cuulumacileehu. (Tiyaku 3:2) Nsome Akalasiya 5:22, 23, ni mwamalihaka usoma, moopele mwaha ala makohwaala:
-
Nnya iveerusunnya cinawuuluma makhalelo menci annikavihera wiivaraca nhina mananna cinoolumeehu. Ikhaleloni iromoliye nhina nnya iveerusunnya yaahaleenyu unlepela Yehova? Manannani ala makhalelwaala yaahalaaya wuukaviherani nyuuva?
Nsome 1 Akorintu 15:33, ni mwamalihaka usoma, moopele mwaha nna nikohonna:
-
Manannani asipatthaniihu ni mathukelweehu cinrukunusaaya moolumacerweehu?
Isiyani inrukunusa moolumelweehu?
Nsome Eklesyaste 3:1, 7, ni mwamalihaka usoma, moopele mwaha nna nikohonna:
-
Ukatini waahala ureera umaala ni uweherera wuuluma?
5. Nwuulume saana akhunaninyu
Manannani ninlamuliyeehu unyema waariipiha nrima akhunanihu nicitthu cinoolumeehu? Moone IVIDIYU, ni mwamalihaka woona, moopele mwaha ala makohwaala.
-
Munna o nvidiyuni ahoona wiira waanoncivela uwuuluma pusya akhunanawe. Kontha isiyani uyo waalakenlyaawe uhiya iyo itthwiiyo?
-
Isiyani yaapankilyaawe wiira akhitiri uhiya?
Nsome Eklesyaste 7:16, ni mwamalihaka usoma, moopele mwaha nna nikohonna:
-
Yaniwaaka yoopheela umuuluma pusya nkhunanihu, isiyani yooyo ukatyuuyo inlamuliyeehu wuupuwela?
Nsome Eklesyaste 7:21, 22, ni mwamalihaka usoma, moopele mwaha nna nikohonna:
-
Manannani nnya iveerusunnya cinookaviheraayani uhinyoonyiya wakhalaka wiira nnawuulumiya pusya?
6. Nthoonyihere unamaana woowuulumana amuciinyu
Yehova nopheela wiira woowuulumana amuciihu, nuulumeke moolumo owoonihera ufenta ni unamaana. Moone IVIDIYU, ni mwamalihaka woona, moopele mwaha nna nikohonna.
-
Isiyani inhala wuukaviherani nyuuva uwuulumana saana amuciinyu?
Nsome Efesu 4:31, 32, ni mwamalihaka usoma, moopele mwaha nna nikohonna:
-
Hi nimpheela wiira nuulume niinanna amuciihu anoonaaya wiira hiiva ninawaafenta. Manannani ninlamuliyeehu upanka iyo itthwiiyo?
Yehova enre wiira aanonfenta Mwanawe, Yesu. Nsome Matewus 17:5, ni mwamalihaka usoma, moopele mwaha nna nikohonna:
-
Manannani cinlamuliyeenyu untakiha Yehova ukati woowuulumana amuciinyu?
Ntothe ukati wo waattottopela akhunaninyu
ATTHU AKIINA ANEERA: “Mi kinooluma itthu inoopuwelaaka. Wakhalaka wiira ntthuuyo khinoncivela, iyo yawawe.”
-
Nyuuva nnaakupali iyo itthwiiyo? Kontha isiyani?
UTHIKILELA
Moolumo ahaana ikuru. Nihaana niwehaceraka itthu yowuuluma, ukati wowuuluma ni mananna owuuluma.
Wuupuwela
-
Manannani cinlamuliyeenyu uvarela nteko wuuluma wiira mwaakavihere akhunaninyu?
-
Moolumaceroni anhaleenyu wiikurumica unyema?
-
Isiyani inhala unikavihera uthoonyihera unamaana ni waalipiha akhunanihu nimoolumacerweehu?
MWAPHEELAKA UCUWELA CITTHU CIKIINA
Isiyani inhala unikavihera wuuluma moolumo anhala waalipiha akhunanihu?
Moone isiyani inhala wuukaviherani uhiya wuuluma moolumo ooveeha.
“Wuuluma moolumo ooveeha ikhanle itthu yootakhala cinene?” (Mwaha umphwanyannya nsayitini jw.org)
Moone mananna oonyema uwuuluma pusya akhunaninyu.
Moone mananna Yehova cinkavihenryaawe nlopwana mmoca uhiya wuuluma moolumo ooveeha.
“Mi kahanca wuupuwela mphantte waarwaaya ukumyaaka” (Ukhalenla, 1 yo Agosto yo 2013)
