ISAMBILILO 51
Mungazanzya Uli Yeova Muli Vino Mukalanda?
Lino Yeova watuumvile, watupeezile uwila usuma sana, kuli kuti uwila wa kuvwanga. Uzye vino tukaomvya uwila kwene uu vyacindama kuli aliwe? Ee! (Belengini Yakobo 1:26.) Uzye lyene tungaomvya uli uwila wa kuvwanga umu nzila iingazanzya Yeova?
1. Uzye tungaomvya uli uwila uno Yeova watupeela umu nzila isuma?
Baibo ikatunena ukuti “mwakomelezyanya nu kwazwana wako vino mukucita ndakai.” (1 Tesalonika 5:11) Uzye mungelenganyako pali yamwi aakulondekwa ukukomeleziwa? I vyani vino mungacita pakuti muyalenge yuvwe ningo? Mungayanena amazwi angayalenga yasininkizye ukuti yacindama kuli mwemwe. Limwi mungayanenako vino mwatemwa pali aliyo. Mungelenganyako pi lembo limwi ilingakomelezya umwi uno mumanyile. Kwaya malembo aingi sana yano mungaomvya. Nupya mwaiusya ukuti inzila ino mungalandilamo vimwi ingakomelezya sana yauze. Fwandi lyonsi lino mukulanda, mwaezya ukuya ni cikuku nupya ateekele.—Mapinda 15:1.
2. I mivwangile ya musango ci iitaya ningo?
Baibo ikati: “Mutaleka amazwi aole yafume umu tunwa twinu.” (Belengini Efeso 4:29.) Cii cikupiliula ukuti tutalinzile ukuomvya amazwi aipe nanti aa unkalwe pakuti sile tusosye umwi. Tutalinzile ukulanda ivintu iviipe pa muntu muze nanti malyasi ya ufi aangalenga izina lyakwe ukononeka.—Belengini Mapinda 16:28.
3. I cani icingatwazwa ukuomvya amazwi ya kukomelezya?
Ilingi ivintu vino tukalandapo vikalanga vino tukaelenganya na vino tukayuvwa. (Luka 6:45) Fwandi tulinzile ukuisambilizya sweineco ukulaika mano ku vintu ivilungame, ivisanguluke, ivyatemwikwa, ivikalandwa ningo, ni vintu vyonsi ivisuma. (Filipi 4:8) Pakuti twaika mano uku vintu vii, tulinzile ukusoolola ningo ivyakuizanzya alino nu kusoolola ningo ivyuza. (Mapinda 13:20) Nupya tulinzile ukwelenganyapo sana lino tutatala twavwanga. Mwaelenganya na pali vino yauze yamayuvwa pali vino mumalanda. Baibo ikati: “Akacincila ukuvwanga, ivivwangwa vyakwe vikatota wa mupeni. Lelo amazwi ya muntu wa mano yali wa mulembo ku antu avule.”—Mapinda 12:18.
LONDELEZYINI NA VYUZE
Sambililini vino mungaalanda umu nzila ikazanzya Yeova nupya iingakomelezya yauze.
4. Mwacenjela muli vino mukavwanga, insita ino mukavwangilapo na vino mukavivwanga
Insita zimwi tukalanda ivintu vimwi vino tukaiza tulanguluka pa cisila. (Yakobo 3:2) Balengini Galatiya 5:22, 23, alino mulanzyanye mauzyo yaa:
-
I miyele ci imwi pali yii ino mungapepelapo iingamwazwa ukumanya vino mulinzile ukulanda? Uzye imiyele yii ingamwazwa uli?
Belengini 1 Kolinto 15:33, alino mulanzyanye iuzyo lii:
-
Uzye ya cuza inu, ni vyakuizanzya vino mukasoolola vingakuma uli mivwangile inu?
I vyani ivingakuma imivwangile inu?
Belengini Kasambilizya 3:7, alino mulanzyanye iuzyo lii:
-
A lilaci lino mulinzile ukwikala ukwaula kuvwanga nanti ukuloleela insita isuma ino mungavwanga?
5. Mwalanda ivisuma pali yauze
Tungacita uli pakuti tutaasosya yauze nanti ukulanda ivintu iviipe? Tambini Vidyo, alino mulanzyanye mauzyo atiyalondelelapo.
-
U mulandu ci uno umwina alali muli vidyo aalakulondela ukusenuka muli vino akalanda pa yantu yauze?
-
I vyani vino iwacita pakuti asenuke?
Belengini Kasambilizya 7:16, alino mulanzyanye iuzyo lii:
-
I vyani vino tulinzile ukwiusya ndi cakuti tukulonda ukulanda amazwi aipe pa muntu umwi?
Belengini Kasambilizya 7:21, 22, alino mulanzyanye iuzyo lii:
-
Uzye ivikomo vii vingamwazwa uli kukanasoka zuwa ndi cakuti umwi walanda amazwi aipe pali mwemwe?
6. Mwaya ni cikuuku lino mukulanda na ya lupwa
Yeova akalonda twaya ni cikuuku nu kutemwa lino tukulanzyanya na ya lupwa. Tambini VIDYO, alino mulanzyanye iuzyo ilyatililondelelapo.
-
I vyani ivilamwazwa ukulanda ni cikuuku kuli ya lupwa inu?
Belengini Efeso 4:31, 32, alino mulanzyanye iuzyo lii:
-
A mazwi ya musango ci yano tulinzile ukuomvya lino tukulanda na ya lupwa aangayakomelezya?
Yeova walanzile vino akayuvwa pa mwanakwe, Yesu. Belengini Mateo 17:5, alino mulanzyanye iuzyo lii:
-
Uzye mungakolanya uli Yeova muli vino mukalanda na ya lupwa inu, na mazwi yano mukaomvya pa kulanda nayo?
Mwalola Inzila zino mungataizizyamo yauze
YAMWI YAKALANDA UKUTI: “Nkalanda vino nkwelenganya. Ndi cakuti umwi ataatemwa vino nkalanda, u lwakwe lulo.”
-
Uzye namwe avino mukalanda? U mulandu ci uno mwalandila vivyo?
VINO TWASAMBILILA
Vino tukalanda vingakomelezya nanti ukusosya yamwi. Tulinzile ukucenjela muli vino tukavwanga, insita ino tukavivwangilapo, na vino tukavivwanga.
I vyani vino mwasambilila?
-
U mu nzila ci muno amazwi yano mukuomvya yangaya aakukomelezya kuli yauze?
-
A mazwi ya musango ci yano musikulonda ukulaomvya?
-
I cani icingatwazwa ukuya ni cikuuku lyonsi nu kulakomelezya yauze lino tukulanda?
LONDELEZYINI
I cani icingatwazwa ukulanda umu nzila iingakomelezya yauze?
Sambililini ivingamwazwa ukukana omvya amazwi aipe.
“Uzye Ukuponta Kwaipa Sana?” (Cipande ca pa Intaneti)
Lolini vino mungacita pakuti mutaalanda ivintu iviipe pa yantu yauze.