Jehova wan paskan taim, aisaia sip kaia lâka ba prisant wankan. ¿Naha prisantka nahki yus muni ba witin mapara tânka tara brisa ki? ¡Âu, misar! (Jems 1:26 aisi kaikma). Baku sa kaka, ¿wan sturi aisanka ba wal nahki Jehova kupia lilia daukaia sip sa?

1. ¿Naha Jehova prisantka na nahki pain yus munaia sip sa?

Baibil ba wan wisa: “Pana pana tâm baiki bas, bara pana pana sin walkam ra hilp muni bas” (1 Tesalonaika 5:11). ¿Upla kum hilp nit ba kaikisma? ¿Witin kau pain ai dara walbia dukiara, man dîa daukaia sip sma? Witin ra latwan kaikisma ba mariks. Ai daukanka nani pain witin ra kaikisma ba wis. ¿Baibil tikska kum upla kum ra hilp munaia sip ba kupiam krawisa? Ailal bâra sa. Amya tikpara, diara kum aisaisma taim, nahki tnatka ra aisama ba ra sin luks. Trai muns, kupiam swapni bara yamni wal aisaia (Sins Lâka 15:1).

2. ¿Dîa tnatka nani wal aisaia apia sa?

Baibil ba wisa: “Sturi aisi banhwisma ba ra uplikam mapara bîla saura lika aisapara” (Epesus 4:29 aisi kaikma). Naha tânka ba, wan bîla wina diara tâski nani, saura nani bara upla sarka paskaia nani ba takaia apia. Baku sin, upla dahra kwahkaia bara upla nina sauhkaia sin apia (Sins Lâka 16:28 aisi kaikma).

3. ¿Bîla yamni nani aisaia dukiara dîa hilp wan munbia?

Dîa aisi ba marikisa dîa luki, nahki wan dara wali ba (Luk 6:45). Baha mita yawan trai munaia sa, diara yamni nani, diara kasak nani, diara sunu nani, bara diara latwan mariki nani ra lukaia (Pilipai 4:8). Baku daukaia dukiara, yawan dîa wal lilia takaia bara ya wal taukaia aman wahbi sakaia sa (Sins Lâka 13:20). Baku sin kau aisaras kainara, dîa aisabia ba wali, upla nahki ai dara walbia ba ra lukaia sa. Baibil ba wisa: “Upla tila nani aisi ba ispara wan sabi ba baku sa, sakuna sinskira nani aisanka ba lika hilp wankisa” (Sins Lâka 12:18).

 KAU LAN TAKS

4. Dîa aisisma ba aman laki kaiks

Sam taim yawan dîa aisaia apia kan ba aisisa (Jems 3:2). Galesha 5:22, 23 aisi kaikma bara naha dukiara aisi banhma:

• Dîa aisi ba, bara nahki tnatka ra aisi ba pain kabia dukiara, ¿naha daukanka nani tila wina ani ba Jehova ra makabaia want sma? ¿Bara baha nahki hilp mai munaia sip sa?

1 Korint 15:33 aisi kaikma bara naha dukiara aisi banhma:

• ¿Pâmnika nani, bara dîa wal lilia takisma ba saura mai munaia sip sa? ¿Dîa tnatka ra?

Smasmalkra 3:1, 7 aisi kaikma bara naha dukiara aisi banhma:

• ¿Ahkia piua ra kau pain sa sâp takaskaia, apia kaka dîa aisaia lukisma ba alki takaskaia?

 5. Upla mapara pain aisas

6. Pamalikam wal aisisma taim, kupia yamni wal aisas

 DÎA LAN TAKRAM

Yawan dîa aisi ba karnika brisa. Baha mita yawan lukaia sa dîa aisaia, ahkia aisaia, bara nahki aisaia.

Wan kupia krawaia

• ¿Dîa tnatka nani ra, dîa aisisma ba wal upla wala nani ra hilp munaia sip sma?

• ¿Dîa tnatka nani wal aisaia apia sa?

• ¿Dîa hilp munbia kupia yamni wal bîla yamni nani aisaia dukiara?