TLAMACHTIL 51
Matikyolpaktikan Jehová ika tlen tikijtouaj
Jehová otechchijchi para matimotlapouikan inuan oksekimej uan ye kineki kuali matitlajtokan (xiktlajtolti Santiago 1:26). Ikinon ¿ken moneki tikintlapouiskej oksekimej para tikyolpaktiskej Jehová?
1. ¿Ken moneki tikintlapouiskej oksekimej?
Biblia kijtoua: “Ximosepanyolchikauakan uan ximosepanpaleuikan” (1 Tesalonicenses 5:11). ¿Tikixmati ikaj tlen tlajyouia? ¿Ken uelis tikyolchikauas? Xikititi tiktlasojtla, xikilui nochi tlen kuali kichiua uan xiknextili seki textos para tikyolchikauas. Noijki xikilnamiki uelis kipaleuis ken tiktlapouis, ikinon ijkuak tikintlapouis oksekimej xikteititi tikintlasojtla uan tikinpatioita (Proverbios 15:1).
2. ¿Tlen tlamantli amo moneki tikijtoskej?
Biblia kijtoua: “Amo xipitsotlajtokan” (xiktlajtolti Efesios 4:29). Ikinon amo titlauijuikaltiaj nion tikinkamanaluiaj oksekimej uan amo tikijtouaj itlaj tlen kinyolkokos. Noijki amo tikinteneuaj oksekimej nion tikijtojtinemij tlen amo melauak (xiktlajtolti Proverbios 16:28).
3. ¿Ken uelis tikinyolchikauaskej oksekimej?
Tlen tikijtouaj kiteititia tlen timokuayejyekouaj uan tlen tikmachiliaj (Lucas 6:45). Ikinon moneki timochijchikauaskej para timokuayejyekoskej tlen techpaleuis uan tlen kinyolchikauas oksekimej (Filipenses 4:8). Techpaleuis tla kuali tikpejpenaj tlen ika timoyolpaktiaj uan akinmej inuan timouikaj (Proverbios 13:20). Noijki moneki kuali timokuayejyekoskej achto itlaj tikijtoskej, ximokuayejyeko kox kinpaleuis oksekimej tlen tikijtos. Biblia kijtoua: “Akin amo mokuayejyekoua ijkuak tlajtoua tetsopitia ken se espada pero innenepil ixtlamatkej tepajtia” (Proverbios 12:18).
MATIMOMACHTIKAN
Matikitakan ken uelis titlajtoskej para tikyolpaktiskej Jehová uan tikinyolchikauaskej oksekimej.
4. Matimokuayejyekokan tlen tikijtoskej uan keman tikijtoskej
Tinochtin ualeua timotlapololtiaj uan tikijtouaj itlaj tlen amo kuali (Santiago 3:2). Xiktlajtoltikan Gálatas 5:22, 23 uan satepan xikitakan tlen namechmachtia.
-
Ninmej textos kijtouaj seki tlamantli tlen techpaleuis ijkuak titlajtouaj, tla tikneki Jehová mamitspaleui, ¿tlen uelis tiktlajtlanilis? ¿Ken mitspaleuis tla ijkon tikchiuas?
Xiktlajtoltikan 1 Corintios 15:33 uan satepan xikitakan tlen namechmachtia.
-
¿Mitspaleuiskej noso mitsijtlakoskej akinmej inuan timouika uan tlen ika timoyolpaktia?
¿Tlen mitspaleuis kuali xikintlapoui oksekimej?
Xiktlajtoltikan Eclesiastés 3:1, 7 uan satepan xikitakan tlen namechmachtia.
-
¿Keman okachi kuali amitlaj tikijtoskej?
5. Amo xikinteneua oksekimej
¿Tlen techpaleuis amo matikinyolkokokan oksekimej ijkuak titlajtouaj? Xikitakan VIDEO uan satepan xikitakan tlen namechmachtia.
-
Ijkon ken otikitakej itech video, ¿tlen okichiuaya tokni?
-
¿Tlen okipaleui para ayakmo ijkon kichiuas?
Xiktlajtoltikan Eclesiastés 7:16 uan satepan xikitakan tlen namechmachtia.
-
Tla tiknekij ikaj tikteneuaskej, ¿tlen moneki tikilnamikiskej?
Xiktlajtoltikan Eclesiastés 7:21, 22 uan satepan xikitakan tlen namechmachtia.
-
¿Mitspaleuiskej ninmej textos tla ikaj mitsteneua? ¿Tleka ijkon tikijtoua?
6. Kuali xiktlapoui mofamilia
Jehová kineki ijkuak tiktlapouiaj tofamilia matikteititikan tikintlasojtlaj uan tikintlakaitaj. Xikitakan VIDEO uan satepan xikitakan tlen namechmachtia.
-
¿Tlen mitspaleuis kuali xiktlapoui mofamilia?
Xiktlajtoltikan Efesios 4:31, 32 uan satepan xikitakan tlen namechmachtia.
-
¿Ken moneki tiktlapouis mofamilia para kuali nanmouikaskej?
Jehová okijto kitlasojtla iKone. Xiktlajtoltikan Mateo 17:5 uan satepan xikitakan tlen namechmachtia.
-
¿Ken uelis tikchiuas ijkon ken Jehová ijkuak timotlapouis iuan mofamilia?
Ximokuayejyeko ken uelis tikinyolchikauas oksekimej ijkuak itlaj kichiuaj.
SEKIMEJ KIJTOUAJ: “Ne nikijtoua tlen nimokuayejyekoua uan tla sekimej amo kinpaktia, ne amo noteki”.
-
¿Tejuatsin noijki ijkon timokuayejyekoua? ¿Tleka ijkon tikijtoua?
XIKILNAMIKTO
Tlen tikijtouaj uelis kinyolchikauas noso kinyolkokos oksekimej, ikinon moneki kuali tikpejpenaskej tlen tikijtoskej, keman tikijtoskej uan ken tikijtoskej.
Matikojpauikan
-
¿Ken uelis tikinyolchikauas oksekimej?
-
¿Tlen ayakmo tiknekiskia tikijtos?
-
¿Tlen techpaleuis matikteititikan titetlasojtlaj uan titetlakaitaj ijkuak tikintlapouiaj oksekimej?
NIN NOIJKI MITSPAKTIS
¿Tlen techpaleuis matikinyolchikauakan oksekimej ijkuak inuan timotlapouiaj?
Xikita tlen mitspaleuis kuali xitlajto.
“¿Ken uelis techijtlakos tla tikijtouaj tlen amo kuali?” (Nin tlamachtil kajki itech jw.org/ncx)
Xikita tlen mitspaleuis para amo xikijtojtinemi tlen oksekimej kichiuaj.
Xikita ken Jehová okipaleui se tlakatl para ayakmo matlauijuikalti.
“Opejki nimokuayejyekoua amo kuali tlen onikchijtoka” (Akin Tetlapouijtok, 1 de agosto 2013)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
