Na ngoi mɛndó Yehova li zo ko, lo hɛ̃ndó lo nzɔ̃ ye nvɛ̃ni, likoki ti tɛnɛngɔ tɛnɛ. Se mɛ e ndo tɛnɛ na tɛnɛ adu ngbondoni ka lɛ lo? Ĩĩ, adu ngbondoni! (Di Zaki 1:26.) Wa ngasia la elengbi ti salelangɔ likoki ti tɛnɛngɔ tɛnɛ na se mɛ ahɛ̃ Yehova dengɔ bɛ nɛ?

1. Ngasia la e salela likoki ti tɛnɛngɔ tɛnɛ na ndenge ti nzɔ̃ni nɛ?

Ngbangɔ pa hɛ̃ e ya “ĩ sa nguru na bɛ afɔ̃ ĩ, nga ma se mɛ ĩ ndoli na ni gã.” (1 Tɛsalionikɛ 5:11) Mɔ hĩnga zo kɔi mɛ na gwɛ̃ ya asa ngunu bɛ lo? Mɔ sa ngunu bɛ lo ngasia? Pa hɛ̃ lo ya, lo du ngbondoni ka lɛ mɔ. Mɔ lengbi ti pangɔ hɛ̃ lo ye mɛ mɔ ndo sepala na ni ka tɛ lo. Mɔ hĩnga vɛrsɛ kɔi mɛ alengbi ti sangɔ ngunu bɛ lo? Avɛrsɛ da gba mɛ mɔ lengbi ti pɔnangɔ ni. Ta bɛ mɔ li na ni ma ya, tɛnɛ tɛ mɔ nga na se mɛ mɔ ndo tɛnɛ na ni alengbi ti sangɔ ngunu bɛ zo, bere hɛ̃ngɔ lo pɛnɔ̃ ka bɛ lo. Na lo ni la tɛnɛ tɛnɛ ngoi zu na nzɔ̃ bɛ.​—Masese 15:1.

2. Se ti tɛnɛngɔ tɛnɛ mɛ ayɔ ya e kɛ̃ nɛ?

Ngbangɔ tɛnɛ ya: “Ta ĩ tɛnɛ siɔ tɛnɛ bɛ kɔi ma.” (Di Efɛzɛ 4:29.) Ni ye tɛnɛngɔ ya, ta elengbi ti tɛnɛngɔ siɔ tɛnɛ, kakulu tɛnɛ bere tɛnɛ mɛ a hɛ̃ zo pɛnɔ̃ ka bɛ lo ma. Ta elengbi nga ti kalangɔ lo bere kpɔtɔngɔ azi ma.​—Di Masese 16:28.

3. Ye mɛ e li ti nɛngɔ ya tɛnɛ tɛ e asa ngunu bɛ azi nɛ?

Ngoi gba, tɛnɛ mɛ e ndo tɛnɛ ndo lo kaya bingangɔ li tɛ e, nga na se mɛ e ndo ma na tɛrɛ e. (Luka 6:45) Na lo ni la, adu nzɔ̃ni ya e kpã lɛ e bo na ndo aye mɛ nzɔ̃ni, vuruni, aye mɛ bɛ azi ndo de na lo ni nga na aye ti ndima. (Filipɛ 4:8) Ti nɛngɔ ya e kpã lɛ e na ndo aye niko, ayɔ ya e pɔna wele mɛ e lɛ, akwa e nga na aye mɛndɛ̃ na ndara. (Masese 13:20) A du nzɔ̃ni ya e gbɔ̃ li e uzu ti tɛnɛngɔ tɛnɛ. Hĩnga ye mɛ tɛnɛ tɛ mɔ lengbi ti lingɔ ka mbage tɛ azi mɛndɛ̃. Ngbangɔ tɛnɛ ya: “Tɛnɛ mɛ zo tɛnɛ zangangɔ gbɔ̃ngɔ li lo, ni du nga ma bere zama zabɛ mɛ akpɔ na zo, kanda tɛnɛ tɛ wa ndara ndo du mabere yɔlɔ mɛ ndo sara zo.”​—Masese 12:18.

 GI HĨNGANGƆ LO MƐNDƐ̃

4. Du na kpengba lɛ na ya tɛnɛ tɛ mɔ

Na ya ngoi mɛndɛ̃, e zu e ndo tɛnɛ tɛnɛ mɛ alengbi ti hɛ̃ngɔ e sɔngɔ bɛ na gesi. (Zaki 3:2) Di Galatia 5:22, 23, wa na pɛni hɛ̃ gbinya ti ahũnda olo mɛ:

• Na popo ti aseliye mɛ so ya vɛrsɛ mɛ, omɛ mɔ lengbi ti lingɔ sambela ya Yehova hɛ̃ mɔ wa mɔ du na kpengba lɛ na ya tɛnɛ tɛ mɔ wa? Aseliye niko za mɔ ngasia?

Di 1 Kɔrinto 15:33, wa na pɛni hɛ̃ gbinya ti hũnda olo mɛ:

• Akwa mɔ nga na awele mɛ mɔ ndo pɔna alengbi ti lingɔ nɛ na se tɛ mɔ ti tɛnɛngɔ tɛnɛ nɛ?

Di Mosakoli 3:1, 7, wa na pɛni hɛ̃ gbinya ti hũnda olo mɛ:

• Ngoi mɛ wa la adu nzɔ̃ni ya mɔ du kpɔ wa mɔ pɔna ngoi mɛ nzɔ̃ni ti mɔ tɛnɛngɔ tɛnɛ nɛ?

 5. Tɛnɛ nzɔ̃ tɛnɛ na ili azi mɛndɛ̃

6. Tɛnɛ tɛnɛ na ndenge ti nzɔ̃ni hɛ̃ azi ti ndasewa tɛ mɔ

 NA NDUNU NI

Tɛnɛ tɛ e alengbi ti sangɔ ngunu bɛ azi bere hɛ̃ngɔ la sɔngɔ bɛ. Ayɔ ya e gbɔ̃ li e na ndo tɛnɛ tɛ e wa e hĩnga ngoi nga na se ti tɛnɛngɔ na ni.

Bozongeli

• Ngasia la tɛnɛ tɛ mɔ lengbi ti sangɔ ngunu bɛ azi mɛndɛ̃ nɛ?

• Atɛnɛ mɛ ayɔ ya e kɛ̃ tɛnɛngɔ nɛ?

• Ye mɛ za mɔ ya mɔ tɛnɛ tɛnɛ ti nzɔ̃ni nga omɛ ndo sa ngunu bɛ azi nɛ?