FAKAAKOAGA 51
Fakafiafia Fēfē e Koe a Iehova he Puhala Vagahau Haau?
Ko e magaaho ne tufuga e Iehova a tautolu, foaki e ia e mena fakaalofa homo ue atu—ko e iloa ke vagahau. Aoga nakai ki a Iehova e puhala kua fakaaoga e tautolu e mena fakaalofa ia? Aoga mooli ki a ia! (Totou Iakopo 1:26.) Ti fakaaoga fēfē e tautolu e iloilo ke vagahau he puhala ke fiafia a Iehova?
1. Fakaaoga fēfē e tautolu e mena fakaalofa he vagahau?
Tala mai e Tohi Tapu ke “fetomaaki a mutolu, mo e fefakamafanaki a mutolu.” (1 Tesalonia 5:11) Iloa nakai e koe e falu kua lata ke fakamafana? Ko e heigoa haau ka taute ke atihake a lautolu? Tala age ki a lautolu kua fakaalofa a koe ki a lautolu. Liga tala age e koe e tau mena ne fiafia a koe hagaao ki a lautolu. Manatu nakai e koe e taha kupu Tohi Tapu kua maeke ke fakamafana e taha tagata ne iloa e koe? Loga kua maeke a koe ke fifili mai ai. Manatu foki, lauia e falu ha ko e puhala ne talahau e koe e taha mena mo e tau kupu kua fakaaoga e koe. Ti lali tumau ke vagahau fakamitaki mo e totonu.—Tau Fakatai 15:1.
2. Ko e vahega vagahau fēfē kua lata a tautolu ke kalo kehe mai?
Pehē e Tohi Tapu: “Aua neke hopo mai ha kupu kelea he tau gutu ha mutolu.” (Totou Efeso 4:29.) Kakano ai to nakai fakaaoga e tautolu e tau kupu pilo po ke talahau e tau kupu nakai totonu mo e hemu ke fakamamahi e logonaaga he taha tagata. Lata foki a tautolu ke kalo mai he loma mo e uta tala hagahagakelea.—Totou Tau Fakatai 16:28.
3. Ko e heigoa ka lagomatai a tautolu ke vagahau he puhala atihake?
Fa mahani ko e tau mena ne tala a tautolu ki ai kua fakakite e tau mena mooli ne toka he tau loto po ke tupetupe a tautolu ki ai. (Luka 6:45) Ti lata a tautolu ke fakaako ke hagaaki ke he tau mena mitaki kua tonu, meā, fulufuluola, mo e nava. (Filipi 4:8) Ke hagaaki ke he tau mena nei, lata a tautolu ke fifili fakamitaki e tau fakafiafiaaga mo e tau kapitiga ha tautolu. (Tau Fakatai 13:20) Lagomatai foki ka fai magaaho a tautolu ke manamanatu to vagahau. Mailoga e puhala ka lauia e falu ha ko e tau kupu haau. Talahau he Tohi Tapu: “Ha ha i ai e tagata kua vagahau [fakahanoa], ti tuga ne tuina ai e tau tagata he pelu; ka ko e alelo he tagata iloilo ke malolo ai.”—Tau Fakatai 12:18.
KUMIKUMI FAKAHOKULO
Fakaako ke vagahau he puhala kua fakafiafia a Iehova mo e fakamafana e falu.
4. Mataala ke he puhala vagahau haau
He falu magaaho, talahau e tautolu oti e tau mena kua tokihala ki ai fakamui. (Iakopo 3:2) Totou Kalatia 5:22, 23, ti tutala ke he tau hūhū nei:
-
Ko e tau mahani fe ka liogi a koe ke moua e lagomatai ke tautaofi e puhala vagahau? Liga lagomatai fēfē he tau mahani nei a koe?
Totou 1 Korinito 15:33, ti tutala ke he hūhū nei:
-
Liga lauia fēfē e puhala vagahau haau ha ko e tau kapitiga mo e tau fakafiafiaaga ne fifili e koe?
Ko e heigoa ka lauia e puhala vagahau haau?
Totou Fakamatalaaga 3:1, 7, ti tutala ke he hūhū nei:
-
Magaaho fe kua pulotu ke fakanono po ke fakatali ke he magaaho mitaki ke talahau taha mena?
5. Talahau e tau mena mitaki hagaao ke he falu
Kalo kehe fēfē a tautolu he ekefakakelea e falu po ke talahau e tau mena ne nakai totonu? Tā e VITIŌ, ti tutala ke he tau hūhū nā.
-
He vitiō, ko e ha ne manako e matakainaga taane nei ke hiki e puhala ne tutala a ia hagaao ke he falu?
-
Ko e heigoa ne taute e ia ke hiki?
Totou Fakamatalaaga 7:16, ti tutala ke he hūhū nei:
-
Ko e heigoa kua lata ke manatu ka kamatamata a tautolu ke vagahau kelea hagaao ke he taha tagata?
Totou Fakamatalaaga 7:21, 22, ti tutala ke he hūhū nei:
-
Lagomatai fēfē he tau kupu nei a koe ke ua ita ka vagahau kelea e taha hagaao ki a koe?
6. Kia totonu ka tutala ke he magafaoa haau
Manako a Iehova ki a tautolu ke tutala ke he magafaoa ha tautolu he puhala totonu mo e fakaalofa. Tā e VITIŌ, ti tutala ke he hūhū nā.
-
Ko e heigoa ka lagomatai a koe ke vagahau totonu ke he magafaoa haau?
Totou Efeso 4:31, 32, ti tutala ke he hūhū nei:
-
Ko e puhala vagahau fēfē ka atihake e magafaoa?
Talahau e Iehova e puhala ne logona hifo a ia hagaao ke he haana Tama ko Iesu. Totou Mataio 17:5, ti tutala ke he hūhū nei:
-
Fifitaki fēfē e koe a Iehova he puhala ne tutala a koe mo e magafaoa haau?
Kumi e tau tuaga ke nava e falu
PEHĒ FALU TAGATA: “Talahau ni au he manatu haaku. Ai ko e lekua haaku ka nakai fiafia e falu ke he mena ne talahau e au.”
-
Talia nakai e koe? Ko e ha ne manatu pihia a koe, po ke ko e ha ne nakai manatu pihia a koe?
MANATU KATOA
Na malolō e tau kupu. Lata ke manamanatu fakahokulo ke he tau mena ha tautolu ne talahau, magaaho ne talahau, mo e puhala ne talahau.
Liu Fakamanatu
-
Ko e heigoa falu puhala ka fakaaoga e koe e vagahau ke lagomatai e falu?
-
Ko e vahega vagahau fēfē kua manako a koe ke kalo kehe mai?
-
Ko e heigoa ka lagomatai a tautolu ke totonu mo e atihake tumau e puhala vagahau?
KUMI FOKI
Ko e heigoa ka lagomatai a tautolu ke atihake e puhala vagahau?
Fakaako e mena ka lagomatai a koe ke kalo kehe he fakaaoga e vagahau kelea.
Kitekite ke he puhala ka kalo kehe a koe he uta tala ne hagahagakelea.
Totou ke he puhala ne lagomatai e Iehova e taha tagata ke fakaoti e kupu pilo.
“Kamata Au ke Manamanatu Fakalahi ke he Holoaga he Moui Haaku” (Vala tala he Kolo Toko)