CHILAYIJO 51
Tingata Chini kuti Tishantise Jehova Nenzila Yatinolebeleka Nayo?
Jehova wakatibumba tilinechipo chibhodo chokutubula kulebeleka. Unowha chini nenzila yatinoshingisa nayo chipo yechi? Ichokomende zunombhata! (Balani Jemusi 1:26.) Tingashingisa chini chipo yechi nenzila inoshantisa Jehova?
1. Tingachishingisa chini chipo yechi chokulebeleka?
IBhayibhili linotibuja kuti “tilambe tisungwajana umwe nomwe akale tibaka umwe nomwe.” (1 BaTesalonika 5:11) Ungayeya nozwabamwe na banoda kukutayijwa? Ungatani kuti ubanyalaje? Babuje kuti unobababayilila. Ungatubula kubabuja nozubhodo zwabanota zunokunakilija. Ungayeya nevesi yawungashingise kukutayija unhu wawunoziba? Manji mavesi awungatubule kushingisa. Yeyabo kuti inzila yatinolebeka nayo ingatubula kunkutayija umwe. Kweja kulebeleka zubhodo nenzila inaneshe.—Zwichimbe 15:1.
2. Kulebeleka kulichini kwatisinokwelela kuta?
IBhayibhili linoti: “Mumilomo yenu musibhude mawhi alobola.” (Balani BaEfeso 4:29.) Yozu zunova kuti tisishingise malebo mabi anonyemeja bamwe kana kuti zunopisa ishoni. Tokwelela kusiya kunyeya nokuswibhisa mazina abamwe.—Balani Zwichimbe 16:28.
3. Ini zuchatibhancha kuti tilebeleke zunobhancha?
Kanji zwatinolebeleka zunotondejela zunu zumomumoyo mwedu akale nozwatinoyeya. (Luka 6:45) Tokwelela kuzulayija kuyeya zunu zubhodo zulolulama, zunodiwa, zulochena akale zunolebelekelwa zubhodo. (BaFilipi 4:8) Kuti titubule kuta alo tokwelela kushala nobuchenjeli zokuzubalayija nabakwayina. (Zwichimbe 13:20) Zunotibhancha kuti titange tayeya tisanu talebeleka. Yeya kuti mawhi awo achababhata chini bamwe. IBhayibhili linoti: “Mawhi anolebelekwa usayeya anobhaya segwabalaza koga lulimi lwabalochenjela lunochija.”—Zwichimbe 12:18.
FUNDA ZUNJI
Layijwa kulebeleka nenzila inoshantisa Jehova akale inokutayija bamwe.
4. Shala zubhodo mawhi awo
Panomwe nshaji tosolebeleka zunu zwatinosopejeleja tizusola. (Jemusi 3:2) Balani BaGalatiya 5:22, 23, akale kwejisani nemibhuzo yeyi:
-
Ndibupi bunhu bwawunganamatile kuti bukubhanche kushala zubhodo mawhi awo? Bunhu yobu bungakubhancha chini?
Balani 1 BaKolinte 15:33, akale kwejiasani nombuzo yoyu:
-
Ubweni sokuti inzila yawunoshaluja nayo bakwayina nozokuzubalayija inongwinilana chini nenzila yawunolebeleka nayo?
Zunu zupi zungata kuti ulebeleke bubi?
Balani Mbaunuli 3:1, 7, akale kwejisani nombuzo yoyu:
-
Ndilini pawunokwelela kuwhilijila akale ndiponi pawunokwelela kulebeleka?
5. Lebeleka zubhodo nozwabamwe
Ini zwatingate kuti tisituke bamwe akale tisilebeleke bubi nozwabo? Yebani iVIDIYO, akale kwejisani nemibhuzo inotobela.
-
Muvidiyo yeyi, neni mwanakwayina akada kuchincha inzila yaakabelebeleka nayo nozwabamwe?
-
Ini zwaakata kuti echinche?
Balani Mbaunuli 7:16, akale kwejisani nombuzo yoyu:
-
Tokwelela kukumbulukwani kana tingoshangana nechikweji chokuda kulebeleka bubi nozwabamwe?
Balani Mbaunuli 7:21, 22, akale kwejisani nombuzo yoyu:
-
Mavesi yaya angakubhancha chini kuti usinyeme kana umwe alebeleka bubi nozuzo?
6. Iba neshe kana ulebeleka nabomumhuli iyo
Jehova unoda kuti kana ulebeleka nabomumhuli iyo ulebeleke nenzila inaludo akale ineshe. Yebani iVIDIYO, akale kwejisani nombuzo unotobela.
-
Ini zuchakubhancha kuti ulebeleke neshe nabomumhuli iyo?
Balani BaEfeso 4:31, 32, akale kwejisani nemibhuzo yeyi:
-
Kulebeleka kulichini kunobaka imhuli?
Jehova wakatondeja chini inzila yaakabewha nayo nozomwananhulumyana uwe, Jesu. Balani Mateu 17:5, akale kwejisani nombuzo yoyu:
-
Ungonkwejejela chini Jehova nenzila yawunolebeleka nayo nabomumhuli iyo?
Wana zubaka zokuboka bamwe
BAMWE BANOTI: “Ndolebeleka zwandinoda. Azuneni nami kuti bamwe banowha chini nozwazo.”
-
Unozuvuma na yozu? Neni udalo?
INI ZWAWAFUNDA
Mawhi anesimba. Tokwelela kuyeyesesa nozwatichalebeleka, malebelekelo atichazuta akale kuti lini
Kubwilulula
-
Ndijipi inzila jatingashingise chipo chokulebeleka kuti tibhanche bamwe?
-
Kulebeleka kulichini kwawusinokwelela kuta?
-
Ini zuchatibhancha kuti tilambe tilebeleka nabamwe neshe akale zunobaka?
PAMIJA PANA ZWAWAWANA
Ini zungakubhancha kuti ulebeleke zubhodo?
Layijwa zungakubhancha kuti usishingise mawhi mabi.
“Kubi Kangako Yini Ukukhuluma Inhlamba?” (Inyaya ipo peintaneti)
Bona zwawungate kuti usingwine muchikweji chokunyeya.
Bala uwhe kuti Jehova wakombhancha chini umwe nhulume wakabeli nobukukutu bokulebeka mawhi mabi.
“Ngaqalisa Ukucabangisisa Ngempilo Yami” (INqabayokulinda, August 1, 2013)
