Jɛhova bee i dɛm sa i nɛ ziī keebee dɔɔ̄nu, ɛɛ na dɔɔ̄nu kɔ ue. Ekɔ kɛ̄ i su lo dɔɔ̄nu ama daānu doo kuīge ye loo ni? Aiī, a kuī ye loo! (Buū Jemes 1:26.) Lo a le wo, i kɔ ue bu sīdee e’ɛɛrɛbu Jɛhova doodoo wa?

1. Bu mɛ sīdee na i dap su dɔɔ̄nu Jɛhova enɛā i ama daānu leere a?

Baibol kɔ i nɛ kɔ i kiisī lo e ‘agɛrɛ beenyiɛ ɛnia ii sa wu ziī agɛrɛ.’ (1 Pya Tɛsalɔnaika 5:11) O dapge kɛɛrɛbu pio nɛɛ a gbī yere mɛm loo ni? Ena o dap doo lo edoo kɔ loo wa a sukɛ̄ a? Doo kɔ ba a suā kɔ ba kuī a loo. Naadabah o dap wa kɔ nɛ nu a a nia a wa le loo. O dapge kɛɛrɛbu ziī dɔ kpa kaɛ o dap su yeā mɛm loo ziī nɛɛ o suāloo ni? Gbɛnɛ-edo dɔ kpa kaɛ o dap su daānu le. Suānage kɔ pya ue o kɔ le kɛ̄ o kɔ doo dapnage ɛrɛ pah nyɔɔ pya dɔɔ̄na. Nyɔɔwo piiga lo ewee kɔ ue bu sīdee alu fɛgɛ sa gbɔɔba.—Kam 15:1.

2. Mɛ dua ue na i ɔbɛ ekɔ a?

Baibol kɔ: “Doolo lɔgɔ pɔrɔ muɛ̄ ue aa i aa bu egā sira.” (Buū Pya Ɛfɛsɔs 4:29.) Lo ama kura kɔ ii le ekɔ lɔgɔ pɔrɔ muɛ̄ ue ale ue a dap kiɛ̄ sa ziloo pya dɔɔ̄na. I ɛrɛ e’ɔbɛnage gɔm gɔm le dɛrɛ ue nɛɛ.—Buū Kam 16:28.

3. Ena edoo kɔ i dap kɔ ue bu sīdee ewu pya dɔɔ̄na a?

Gbɛnɛkpo sɔ̄ nu i kɔ wee muuna taɛ nu a i le bu beenyiɛ le nu a le bu i ekɛɛrɛ. (Luk 6:45) Nyɔɔwo, alu ebɛɛ̄ kɔ i kpɔā aba ii lo ewee kɛɛrɛ nu akiiloo aba nu a kaāna, nu a ɛɛ, le nu a lee ereloo. (Pya Filipai 4:8) Lokwa i dap doo lo ama, i ɛrɛ esu suānu sagɛ pya nu i su ɛā ekpeloo le pya gbo i yii. (Kam 13:20) Lo ama eyerebah i nɛ lo edasī kɛɛrɛ nu i kɔ lɛɛ i gae kɔ ue. Kɛɛrɛnage kɛ̄ nu o kɔ dap ɛrɛ pah nyɔɔ pya dɔɔ̄na doo. Baibol kɔ: “Ziī nɛɛ le, lo dɛ̄dɛɛ̄ ye ue a naa ɛrɛ ekɛɛrɛ le doodoo uŋi gɛ̄nɔ̄, mɛ edɛm a ɛrɛ suānu nua bobo.”—Kam 12:18.

 NƆ YERELOO

4. Nwaɛ̄dɛɛ̄ loo kɛ̄ o kɔ ue doo, nu o kɔ, le sɔ̄ a bɔloo kɔ o kɔ

Siga sɔ̄, nu i kɔ wee i kiɛ̄ sɔ̄ esaa. (Jemes 3:2) Buū Pya Galetia 5:22, 23, lɛɛ o agara pya ebip a nyɔɔnɛ ama:

• Amunu elap a le bu dɔ ama na o yere kara bara lokwa o dap baɛloo kɛ̄ o kɔ ue doo a? Pya elap ama dap a yerebah nɛ doodoo wa?

Buū 1 Pya Kɔrint 15:33, lɛɛ o agara ebip ama:

• Amunu pah na pya gbo o yii le nu o si ee dap ɛrɛ nyɔɔ kɛ̄ o kɔ ue doo a?

Buū Eklisiastis 3:1, 7, lɛɛ o agara ebip ama:

• Mɛ sɔ̄ na a bɔloo kɔ nɛɛ a ubepiī ale yira baɛ sɔ̄ a bɔloo lɛɛ a kɔ ue a?

 5. Kɔ le le nu kumaloo pya dɔɔ̄na

6. Lu fɛgɛ sɔ̄ o gaa nyɔɔnɛ pya o butɔ kɔnia ue

 TƐƐ̄NYƆƆ

Pya ue i kɔ ɛrɛ ekpo. I ɛrɛ ekɛɛrɛ nu leere kiiloo nu i kɔ, sɔ̄ i kɔ, le kɛ̄ i kɔ doo.

Ebip Tɛ̄ma Nyɔɔ

• Pio amunu sīdee na o dap yerebah nɛ pya dɔɔ̄na tɛ̄maloo kɛ̄ o kɔ ue doo a?

• Pio amunu ue na o ɔbɛ ekɔ a?

• Ena edap i yerebah nɛ lo ewee lu fɛgɛ sa yere mɛm loo pya dɔɔ̄na tɛ̄maloo nu i kɔ a?