LÈS 51
Kon Bo Manera di Papia Por Hasi Yehova Kontentu?
Yehova a krea nos ku un bunita regalo. E regalo ei ta e echo ku nos por papia. Yehova ta interesá den e manera ku nos ta papia ku otro hende? Sigur ku sí! (Lesa Santiago 1:26.) Pues, kon nos por papia ku otro hende na un manera ku ta hasi Yehova kontentu?
1. Kon nos por usa e regalo akí ku Yehova a duna nos?
Beibel ta bisa nos pa “sigui animá otro i fortalesé otro.” (1 Tesalonisensenan 5:11) Bo sa di hende ku mester di animashon? Kiko bo por hasi pa nan por sinti nan mihó? Bo por laga nan sa kon importante nan ta pa bo. Kisas bo por bisa nan kiko bo ta apresiá di nan. Tambe bo por pensa riba un teksto di Beibel ku por animá nan. Tin vários teksto di Beibel ku bo por skohe for di dje. Ademas, bo tin ku kòrda ku e manera ku bo ta bisa algu ta mes importante ku loke bo ta bisa. Pues, semper hasi bo bèst pa papia na un manera suave i bondadoso.—Proverbionan 15:1.
2. Kiko nos mester evitá ora nos ta papia?
Beibel ta bisa: “No laga ningun palabra putrí sali for di boso boka.” (Lesa Efesionan 4:29.) Esaki ta enserá ku nos no mester papia palabra malu ni kos ku por ofendé hende òf hasi nan doló. Ademas, nos no mester hasi redu ni papia malu di otro hende.—Lesa Proverbionan 16:28.
3. Kiko por yuda nos papia na un manera ku ta laga otro hende sinti nan bon?
Hopi biaha, loke nos ta papia ta mustra realmente kiko nos ta pensa i sinti. (Lukas 6:45) Pues, nos mester entrená nos mente pa pensa riba kos positivo. Por ehèmpel, nos mester pensa riba ‘loke ta hustu, loke ta puru, loke ta promové stimashon i loke ta digno di elogio.’ (Filipensenan 4:8) Pa nos por hasi esei, nos mester skohe entretenimentu sano i bon amigu. (Proverbionan 13:20) Algu ku por yuda nos tambe ta di pensa bon loke nos ke bisa i kon pa bis’é promé ku nos papia. Purba di pensa kon hende lo sinti tokante e kosnan ku bo ke bisa. Beibel ta bisa: “Palabra di hende ku ta papia sin pensa ta manera hinká di spada, pero lenga di hende sabí ta trese alivio.”—Proverbionan 12:18.
KIKO MAS NOS POR SIÑA?
Laga nos wak kon bo por papia na un manera ku ta hasi Yehova kontentu i ku ta animá otro hende.
4. Wak bon kiko bo ta papia, kon bo ta papia i ki ora bo ta papia
Tin biaha, nos tur ta bisa kos ku despues ta duel nos. (Santiago 3:2) Lesa Galationan 5:22, 23. Despues, analisá e siguiente preguntanan:
-
Kua di e kualidatnan menshoná den e teksto akí bo por pidi den orashon pa yuda bo kontrolá loke bo ta papia i e manera ku bo ta papia? Kon e kualidatnan ei por yuda bo?
Lesa 1 Korintionan 15:33. Despues, analisá e siguiente pregunta:
-
Kon bo amigunan i e entretenimentu ku bo ta skohe por influensiá bo manera di papia?
Kiko por influensiá bo manera di papia?
Lesa Eklesiástes 3:1, 7. Despues, analisá e siguiente pregunta:
-
Ki ora ta sabí pa bo keda ketu òf pa skohe un mihó momento pa papia?
5. Papia bon di otro hende
Kon bo por evitá di bisa algu ku ta hasi hende doló òf ku ta ofendé nan? Pasa e VIDIO. Despues, analisá e siguiente preguntanan:
-
Dikon e ruman hòmber den e vidio kier a kambia e manera ku e tabata papia di otro hende?
-
Kiko el a hasi pa kambia?
Lesa Eklesiástes 7:16. Despues, analisá e siguiente pregunta:
-
Kiko bo mester kòrda ora bo haña gana di papia malu di un hende?
Lesa Eklesiástes 7:21, 22. Despues, analisá e siguiente pregunta:
-
Kon e teksto akí por yuda bo pa no rabia ora un hende bisa algu malu di bo?
6. Papia na un manera bondadoso ku bo famia
Yehova ke pa nos papia ku nos famia na un manera bondadoso i kariñoso. Pasa e VIDIO. Despues, analisá e siguiente pregunta:
-
Kiko lo yuda bo papia na un manera bondadoso ku bo famia?
Lesa Efesionan 4:31, 32. Despues, analisá e siguiente pregunta:
-
Kon bo por papia ku bo famia na un manera ku ta laga nan sinti bon?
Yehova a ekspresá kiko e ta sinti pa su Yu, Hesus. Lesa Mateo 17:5. Despues, analisá e siguiente pregunta:
-
Kon bo por imitá Yehova ora bo ta papia ku bo famia?
Buska oportunidat pa elogiá otro hende
LOKE HENDE SA BISA: “Mi ta bisa loke mi ta pensa; no ta importá kon otro hende tum’é.”
-
Bo tambe ta pensa asina? Dikon sí, òf dikon nò?
RESÚMEN
Loke nos ta bisa por sea yuda un hende òf hasié doló. Promé ku nos papia, nos tin ku pensa bon kiko nos ta bai papia, kon nos ta bai papia i ki ora nos ta papia.
Repaso
-
Kon ta algun manera ku bo por yuda otro hende ku loke bo ta papia?
-
Kiko bo mester evitá ora bo ta papia?
-
Kiko por yuda nos pa semper papia na un manera bondadoso i pa papia loke ta bon?
MAS INFORMASHON INTERESANTE
Kiko por yuda nos papia na un manera positivo?
Wak kiko por yuda bo evitá di papia palabra malu.
“Ta Asina Malu pa Papia Palabra Malu?” (artíkulo riba jw.org)
Wak kon bo por evitá di hasi redu.
Wak kon Yehova a yuda un hòmber stòp di papia palabra malu.
“Mi A Kuminsá Pensa Seriamente Kon Lo Para ku Mi Bida” (E Toren di Vigilansia di 1 di ougùstùs 2013)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
