LEKCIJA 51
Le Jehovaske nane jekh, so mukhas avri andal o muj
O Jehovas amen avka rajikanes kerďa, hoj džanas te vakerel. Aľe hin leske jekh, so mukhas avri andal o muj? Nane! (Pregen Jakub 1:26) Sar šaj vakeras avka, kaj le Jehovas te ašaras?
1) Sar kampel avrenca te vakerel?
E Biblija phenel: „Furt zoraľaren a podhazden jekh avres.“ (1. Tesaloničanom 5:11) Džanes varekas, kas kampel te podhazdel? Phen leske, hoj les rado dikhes a so hin andre leste šukar. Abo kide avri varesavo šukar tekstos, so bi leske pomožinelas. Na džal ča pal oda, so leske pheneha. Aľe tiš sar leske oda pheneha. Vaš oda kampel te vakerel šukares, kaj o manuša te ciťinen, hoj len čačes rado dikhas. (Príslovia 15:1)
2) Sar na kamas ňigda te vakerel?
E Biblija phenel, kaj „ňisavo džungalo lav te na avel avri andral tumaro muj.“ (Pregen Efezanom 4:29 NZ) Ňigda na kamas te vakerel ňisave džungale lava, ňisavo košiben a aňi ňikastar na keraha ladž (čušagi). Tiš pal avrende našťi keras pletki aňi pre lende na chochavas (na klaminas). (Pregen Príslovia 16:28)
3) Kana amari čhib avren podhazdel?
Sar vakeras a pal soste vakeras sikavel, so amen hin andro jilo. (Lukáš 6:45) Te furt thovaha andre goďi oda, so hino lačho the žužo andre le Jehovaskere jakha, paľis vakeraha šukares a ňigda na macharinaha (na phenaha ňisavo džungalo lav). (Filipanom 4:8) Aľe so šaj mosarel amari čhib? Te peske na das pozoris kaha sam, so dikhas andre televiza, pro internetos the andro giľa. (Príslovia 13:20) A te varekaha vakeras, na kamas te mukhel avri chočso andal o muj. Sigeder kampel te rozmišľinel, či les amare lava podhazdena abo dukhavena. E Biblija phenel, hoj o lava bijo jilo demaven sar šabľa, aľe lačhe lava sasťaren. (Príslovia 12:18)
DODŽAN TUT BUTER
Sar te vakerel, kaj o Jehovas te el andre amende barikano? Sar te vakerel avka, kaj avrenge te el olestar mište pro jilo?
4) Merkin tuke pre čhib
Varekana vareso phenas a paľis oda bajinas. (Jakub 3:2) Pregen Galaťanom 5:22, 23 a paľis vakeren jekhetane:
-
Pal soste olestar, so akana genďam, kames te mangel le Jehovas? Sar tuke oda pomožinela te zľikerel tiri čhib?
Pregen 1. Korinťanom 15:33 a paľis vakeren jekhetane:
-
Soske nane jekh, kaha sal, pre soste dikhes a so šunes? So oda kerela tira čhibaha?
Soske hiňi tiri čhib ajsi, savi hiňi?
Pregen Kazateľ 3:1, 7 a paľis vakeren jekhetane:
-
Kana hin mište te na phenel ňič abo te použarel pro feder časos?
5) Lačhes vaker pal avrende
Andro videjo tut dodžaneha, so amenge pomožinela te na dukhavel avren amare lavenca. Mukh o VIDEJO a paľis vakeren jekhetane.
-
Soske o phral preačhiľa te vakerel pal avrende našukares?
-
So kerelas, kaj pes te prekerel?
Pregen Kazateľ 7:16 a paľis vakeren jekhetane:
-
Sar amen ala lava zaačhaven, te amen cirdel te vakerel pal varekaskero dumo?
Pregen Kazateľ 7:21, 22 a paľis vakeren jekhetane:
-
Varekana pre tute vareko kerel pletki. Sar tuke kala lava andal o Kazateľ pomožinen, kaj sig te na zarušes?
6) Tirenca khere vaker šukares
O Jehovas na kamel, kaj khere te vakeras dukhade lava, aľe kaj peha te vakeras šukares. Mukh o VIDEJO a paľis vakeren jekhetane.
-
So tuke pomožinel tirenca khere te vakerel šukares?
Pregen Efezanom 4:31, 32 a paľis vakeren jekhetane:
-
Sar šaj amara čhibaha sikavas, hoj rado dikhas amaren andro kher?
O Jehovas pes na ladžalas te phenel, hoj rado dikhel peskere Čhas, le Ježiš. Pregen Matúš 17:5 a paľis vakeren jekhetane:
-
Sar šaj keres avka sar o Jehovas, te vakeres tire romeha, tira romňaha the tire čhavenca?
Sikhľuv te ašarel avren
VAREKO ŠAJ PHENEL: „Te som choľamen, musaj te phenav, so man hin pro jilo.“
-
Hin oda mište, abo na? Soske?
SO SIKHĽIĽAM
O lava šaj čhinen sar čhuri abo sasťaren o jilo. Vaš oda kampel mište te kidel avri, so phenaha, kana oda phenaha a sar oda phenaha.
So bi phenehas
-
So šaj phenes avreske, kaj leske tire lava te peren mište pro jilo?
-
Sar na kames ňigda te vakerel?
-
So amenge pomožinel, kaj furt avrenca te vakeras šukares?
DIKH TUKE BUTER
Dikh tuke, so šaj keras, kaj amara čhibaha avren te hazdas upre.
Pregen tuke, so tuke pomožinela te na vakerel džungales aňi te na koškerel.
Dikh tuke, soske nane lačho te kerel pletki.
Pregen tuke, soske jekh murš phenďa, hoj ča le Jehovaske paľikerel, hoj les sikhľarďa šukares te vakerel.
„Začal som sa vážne zamýšľať nad svojím životom“ (Strážna veža z 1. augusta 2013)
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
