Ked o Jehova ćerđa amen, ov dinđa amen jekh poklon – i sposobnost te vaćera. Olese tano but važno sar koristinaja odova poklon. (Čitinen Jakovljeva 1:26.) Sar šaj te koristina odija sposobnost ko način kova ka ćerel e Jehova te ovel bahtalo?

1. Sar valjani te koristina o poklon kova o Jehova dinđa amen?

Ko Devleso Lafi pisini: „Tešinen hem zorjaćeren jekh jekhe“ (1. Solunjanima 5:11). Da li đaneja nekas kas šaj te ohrabrine? Sar šaj te ćere odova? Najangleder, mothov lenđe so on tane važna tuće. Šaj te phene olenđe so sviđini pe tuće koro lende. Ja da li avela tuće ki godi disavo stih kova šaj nekas te zorjaćeri? Isi but stihija kola šaj te zorjaćeren averen. Ama, đi ćereja odova, ma bistri so odova sar vaćereja šaj te utičini upro avera isto kobor hem o lafija kola vaćereja. Odolese, de sa tutar te ove ljubazno hem šukar đi vaćereja averencar (Poslovice 15:1).

2. Save lafija na valjani te vaćera?

Ki Biblija pisini: „Nisavo ružno lafi te na ikljol ando tumaro muj.“ (Čitinen Efešanima 4:29.) Odova značini so na valjani te koristina o ružna lafija ja o lafija kolencar šaj te dukhava ja te uvredina averen. Isto ađahar, na valjani te ćera averengo lafi hem te vaćera hovajba te bi ruminaja nekaso šukar anav. (Čitinen Poslovice 16:28.)

3. Sar šaj amare lafija te ohrabrinen averen?

But putija odova so vaćeraja mothovi soj tano ko amaro vilo hem ki amari godi (Luka 6:45). Odolese, valjani te sikljova te razmislina kotar buća kola tane pravedna, pristojna, kola ćhivena amen te mothova mangipe hem kola tane asi pohvala (Filipljanima 4:8). Te šaj te razmislina kotar asavke buća, valjani te ova mudra ked birinaja so ka dikha ja so ka šuna hem ko ka oven amare amala (Poslovice 13:20). Isto ađahar, šukar tano te razmislina angleder diso te phena. Valjani te razmislina sar amare lafija ka utičinen upro avera. E Devleso Lafi phenela: „Ked na razmislineja so vaćereja, te lafija šaj te posaven sar mač, a o lafija ando mudra manuša tane sar leko“ (Poslovice 12:18).

 SIKLJOV POBUTER

4. Pazin so vaćereja

Podijekh puti sare amen phenaja diso hem palo odova kajinaja amen (Jakovljeva 3:2). Čitinen Galatima 5:22, 23, hem palo odova vaćeren ando akala pućiba:

• Asi koja osobina šaj te moline tut te šaj te pazine ki ti ćhib? Sar šaj akala osobine te pomožinen tut?

Čitinen 1. Korinćanima 15:33, hem palo odova vaćeren ando akava pućibe:

• Sar šaj te amala hem i zabava te utičinen ko odova sar vaćereja?

Čitinen Propovednik 3:1, 7, hem palo odova vaćeren ando akava pućibe:

• Sose tano mudro podijekh puti te ćutina hem te ađićera pravo vreme diso te phena?

 5. Ma vaćer lošno averendar

6. Ov ljubazno ked vaćereja te porodicaja

 SO SIKLJILJAM

Amare lafija šaj te dukhaven averen ja šaj te pomožinen len. Odolese valjani te pazina so phenaja, ked diso phenaja hem sar odova phenaja.

Te ponovina

• Sar šaj amare lafija te pomožinen averenđe?

• Save lafija na valjani te vaćera?

• So ka pomožini amen te ova ljubazna hem te zorjaćera averen amare lafencar?