ROSO 51
Coyiˈratto Coyinni Yihowa Hagiirsiisa Dandaattohu Hiittoonniiti?
Yihowa kalaqinke woyite, dhagge ikkitanno elto yaano coyiˈrate dandoo uyinonke. Tenne elto horoonsiˈneemmo gari iso hagiirsiisara woy dadillisara dandaanno? Ee dandaanno! (Yaiqoobi 1:26 nabbawi.) Hatto ikkiro, coyiˈrate dandoonke Yihowa hagiirsiisanno garinni horoonsiˈra dandiineemmohu hiittoonniiti?
1. Yihowa elto ikkitinota coyiˈrate dandoonke danchu garinni horoonsiˈra dandiineemmohu hiittoonniiti?
Qullaawu Maxaafi “Mimmitoˈne jawaachishshenna dhaabbe” yee amaalannonke. (1 Teselonqe 5:11) Jawaante hasiisse noonsa manna qaagatto? Insa jawaachisha dandaattohu hiittoonniiti? Insa daafira hedattota kulinsa. Naadatto akatansa woy assitinore danchare kulattonsara dandaatto. Mitto afootto mancho jawaachishara dandaanno qummeeshsha qaagatto? Doora dandaattohu batinyu qummeeshshi no. Qoleno coyiˈratto gari mitto mancho lowo geeshsha jawaachishara dandaannota deˈooti. Hakko daafira, woˈmanka woyite shaqqillunni coyiˈrate woˈnaali.—Lawishsha 15:1.
2. Hiittoo coye coyiˈra dihasiissannonke?
Qullaawu Maxaafi, “Afiiˈnenni bushu coyi fuloonke” yaanno. (Efesooni Sokka 4:29 nabbawi.) Hatto yaa, bushanna manna xissiisannoha kaajjado qaale coyiˈra dihasiissannonke yaate. Qoleno hemenna mannu suˈma huna qoropha hasiissannonke.—Lawishsha 16:28 nabbawi.
3. Woloota kianno garinni coyiˈneemmo gede kaaˈlannonkeri maati?
Duucha woyite, coyiˈneemmo coyi wodaninke giddo noori woy surrenkera woˈminori maatiro leellishanno. (Luqaasi 6:45) Konni daafira keeraancho, qullaawa, banxannirenna naandanni coye heda rosiisiˈra hasiissannonke. (Filiphisiyusi Sokka 4:8) Surrenke tenne coyibba illachishshanno gede assiˈrate, boohaarshanna jaalla hayyotenni doodha hasiissannonke. (Lawishsha 13:20) Coyiˈnammora albaanni seekkine hedankeno kaaˈlitannonke. Coyiˈratto coyi manna kaaˈlara woy gawajjara dandaannohu hiittoonniitiro hedi. Qullaawu Maxaafi, “Dayi gede coyiˈnanni coyi manna urdete gede qasanno; egennaamu arrawi kayinni hursanno” yaanno.—Lawishsha 12:18.
LEDDE XIINXALLI
Yihowa hagiirsiisannorenna manna jawaachishannore coyiˈra dandaatto gara rosi.
4. Coyiˈratto coye eemadhi
Ninke baalunku gaabbineemmore coyiˈneemmo woyiti no. (Yaiqoobi 3:2) Galatiyu Sokka 5:22, 23 nabbabbe; hakkiinni tenne xaˈmuwa hasaabbe:
-
Coyiˈratto coye eemadha dandaatto gede, kuri akatta giddo hiikkuri heedhahera huuccatto assiˈra dandaatto? Kuri akatta kaaˈlitahera dandiitannohu ma garinniiti?
Umi Qorontoosi 15:33 nabbabbe; hakkiinni tenne xaˈmo hasaabbe:
-
Doodhatto jaallanna boohaarshi, coyiˈratto gara seekkara woy hunara dandaannohu hiittoonniiti?
Coyiˈratto gara seekkara woy hunara dandaannori maati?
Rosiisaancho 3:1, 7 nabbabbe; hakkiinni tenne xaˈmo hasaabbe:
-
Sammi yaa woy maltino yanna agadhine coyiˈra dancha ikkitannohu hiittoo woyiteeti?
5. Wolu manni daafira dancha danchare coyiˈri
Manna xissiisannore woy bushare coyiˈra qoropha dandiineemmohu hiittoonniiti? VIIDIYO laˈe; hakkiinni aante noo xaˈmuwa hasaabbe.
-
Viidiyote giddo, roduu wolootu daafira coyiˈrannore woyyeessiˈra hasiˈrinohu mayiraati?
-
Isi coyiˈranno gara woyyeessiˈrate maa assino?
Rosiisaancho 7:16 nabbabbe; hakkiinni tenne xaˈmo hasaabbe:
-
Wolu manni daafira bushare coyiˈnammora hendeemmo woyite, maa qaaga hasiissannonke?
Rosiisaancho 7:21, 22 nabbabbe; hakkiinni tenne xaˈmo hasaabbe:
-
Kuni qummeeshshi, mannu ate daafira gara ikkinokkire coyiˈranno woyite hanqattokki gede kaaˈlannohehu hiittoonniiti?
6. Miniˈne manna shaqqillunni coyishiishi
Yihowa mininke manna baxillunninna shaqqillunni hasaawinsammora hasiˈranno. VIIDIYO laˈe; hakkiinni aante noo xaˈmo hasaabbe.
-
Maatekki shaqqillunni hasaawisatto gede kaaˈlannoheri maati?
Efesooni Sokka 4:31, 32 nabbabbe; hakkiinni tenne xaˈmo hasaabbe:
-
Maatenke dhaawate, ma garinni coyiˈra hasiissannonke?
Yihowa Beettosi Yesuusa baxannota xawise coyiˈrino. Maatewoosi 17:5 nabbabbe; hakkiinni tenne xaˈmo hasaabbe:
-
Minikki manni ledo hasaawatto woyite, Yihowa lawishsha harunsa dandaattohu hiittoonniiti?
Woloota galatatto faro hasiˈri
MITU MANNI TOGO YAANNO: “Ani hedoommore dimaaxiˈreemmo. Mannu coyiˈreemmore baxirono baxano hoogiro, hatti uminsa hajaati.”
-
Hatto yaa gara labbannohe? Mayira?
XAPHISHSHA
Coyiˈneemmo coyi manna kaaˈlara woy gawajjara dandaanno. Hakko daafira mayine coyiˈneemmoro, mamoote coyiˈneemmoronna hiittoonni coyiˈneemmoro seekkine heda hasiissannonke.
Kageeshsha Rosoottore
-
Coyiˈratto coyinni woloota kaaˈla dandaattoti mite doogga hiikkuriiti?
-
Hiittoo coye coyiˈra qoropha hasiissannonke?
-
Woˈmanka woyite shaqqillunninna kianno garinni coyiˈneemmo gede mayi kaaˈlankera dandaanno?
EGENNO LEXXI
Woloota jawaachishannore coyiˈneemmo gede mayi kaaˈlankera dandaanno?
Bushare coyiˈrattokki gede kaaˈlannoheri maatiro rosi.
“Xonama Hakkeeshshi Geeshsha Busha Coyeeti?” (Webisayitenkera fultino borro)
Heme qoropha dandaattohu hiittoonniitiro wodanchi.
Yihowa mitto mancho xonama aguranno gede kaaˈlinosihu hiittoonniitiro nabbawi.
“Heeshshoˈya Hiittoota Ikkitaraatikka Yee Seekke Heda Hanafummo” (Agarooshshu Shae, Woxawaajje 1, 2013)
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
