KGAOLO YA 51
Bua le Batho ba Bang ka Tsela e Tla Thabisa Jehova
Jehova o re bopelletse le mpho ya bohlokwa e leng bokgoni ba ho bua. Na o a tsotella hore na re sebedisa mpho eo jwang? Ho jwalo. (Bala Jakobo 1:26.) Ka hoo, ke jwang dintho tseo re di buang di ka thabisang Jehova?
1. Re lokela ho sebedisa mpho ya ho bua jwang?
Bibele e re ‘re nne re tshedisane le ho hahana.’ (1 Bathesalonika 5:11) Na ho na le motho eo o mo tsebang ya hlokang ho kgothatswa? O ka etsang ho mo kgothatsa? Mo tiisetse hore o a mo kgathalla. O ka mo bolella hore na keng ntho eo o e ratang ka yena. Ke lengolo lefe leo o ka kgothatsang motho e mong eo o mo tsebang ka lona? Ho na le mangolo a mangata ao o ka kgethang ho ona. Hape hopola hore tsela eo o buang ka yona le yona e ka kgothatsa batho ba bang haholo. Ka hoo, ka dinako tsohle leka ho bua le batho ka tsela e mosa le e bonolo.—Liproverbia 15:1.
2. Re lokela ho qoba dipuo tsa mofuta ofe?
Bibele e re: “Polelo e bodileng e se ke ya tswa melomong ya lona.” (Bala Baefese 4:29.) Sena se bolela hore ha re rohakane kapa ho buisa batho ba bang hampe le ka tsela e tla ba utlwisa bohloko. Re boetse re lokela ho qoba ho seba le ho senya batho ba bang lebitso.—Bala Liproverbia 16:28.
3. Keng e tla re thusa ho bua le batho ba bang ka tsela e kgothatsang?
Hangata dintho tseo re di buang di bontsha hantle se ka pelong kapa dintho tseo re di nahanang. (Luka 6:45) Ka hoo re lokela ho itlwaetsa ho nahana ka dintho tse ntle e leng dintho tse lokileng, tse hlwekileng, tse ratehang le tse lokelwang ke thoriso. (Bafilipi 4:8) E le hore re kgone ho etsa sena, re lokela ho kgetha ka hloko metswalle le dintho tseo re di mamelang le ho di shebella. (Liproverbia 13:20) Ntho e nngwe e ka re thusang ke ho nahana pele re bua. Nahana ka hore na mantswe a hao a tla ama batho ba bang jwang. Bibele e re: “Ho na le ya buang a sa nahane jwalo ka ha eka ke ka ho hlaba ha sabole, empa maleme a ba bohlale ke phodiso.”—Liproverbia 12:18.
ITHUTE DINTLHA TSE DING
Ithute ho bua ka tsela e tla thabisa Jehova le e tla kgothatsa batho ba bang.
4. Laola tsela eo o buang ka yona
Ka dinako tse ding re bua dintho ebe ha morao re ikwahlaela tsona. (Jakobo 3:2) Bala Bagalata 5:22, 23 ebe le buisana ka dipotso tsena:
-
Makgabaneng aa o ka rata ho rapella afe a tla o thusa hore o laole dintho tseo o di buang? Makgabane ao a tla o thusa jwang?
Bala 1 Bakorinthe 15:33 ebe le buisana ka potso ena:
-
Metswalle ya hao le dintho tseo o di mamelang le ho di shebella di ka ama tsela eo o buang ka yona jwang?
Keng e ka amang tsela eo o buang ka yona?
Bala Moeklesia 3:1, 7 ebe le buisana ka potso ena:
-
Ke neng ho ka bang bohlale hore o thole kapa o emele nako e nepahetseng e le hore o bue ntho e itseng?
5. Bua dintho tse ntle ka batho ba bang
Ke jwang re ka qobang ho bua ka tsela e seng mosa kapa ho hlaba batho ba bang ka mantswe? Bapala VIDEO ebe le buisana ka dipotso tse latelang.
-
Videong ee, ke hobaneng ha ntate eo a ne a batla ho fetola tsela eo a buang le batho ba bang ka yona?
-
O ile a e fetola jwang?
Bala Moeklesia 7:16 ebe le buisana ka potso ena:
-
Re lokela ho hopolang ha re tlelwa ke monahano wa ho bua motho e mong hampe?
Bala Moeklesia 7:21, 22 ebe le buisana ka potso ena:
-
Ditemana tsee di ka o thusa jwang hore o se ke wa utlwa bohloko ha batho ba bang ba o bua hampe?
6. Eba mosa ha o bua le ba lelapa
Jehova o batla hore re buisane le ditho tsa lelapa ka tsela e mosa le e lerato. Bapala VIDEO ebe le buisana ka potso e latelang.
-
Keng e tla o thusa hore o bue ka mosa le ditho tsa lelapa?
Bala Baefese 4:31, 32 ebe le buisana ka potso ena:
-
Re lokela ho bua jwang le ditho tsa lelapa e le hore di ikutlwe di ratwa ebile di ananelwa?
Jehova o ile a hlalosa hore na o ikutlwa jwang ka Mora wa hae Jesu. Bala Matheu 17:5 ebe le buisana ka potso ena:
-
O ka etsisa Jehova jwang ha o buisana le ditho tsa lelapa?
Batla ditsela tsa ho babatsa batho ba bang
BATHO BA BANG BA RE: “Ke bua ntho eo ke e batlang. Ha se taba ya ka ha batho ba bang ba sa e rate.”
-
Na o dumellana le batho bao? Ke hobaneng ha o tjho jwalo?
KAKARETSO
Mantswe a na le matla a ho thusa batho kapa a ho ba utlwisa bohloko. Re lokela ho nahana ka hloko hore na re bua eng, re e bua neng le hore na re e bua jwang.
Re Ithutileng?
-
Ke jwang re ka buang le batho ka tsela e tla ba thusa?
-
O lokela ho qoba ho bua dintho tse jwang?
-
Keng e ka re thusang hore re dule re bua ka tsela e mosa le e kgothatsang batho ba bang?
BATLA
Keng e ka re thusang ho bua ka tsela e kgothatsang batho ba bang?
Ithute hore na o ka thuswa keng ho qoba ho rohakana.
Hlokomela hore na o ka etsang e le hore o qobe ho bua batho ba bang hampe.
Hlokomela hore na Jehova o thusitse ntate e mong jwang hore a tlohele ho rohakana.
“Ke ile ka Qala ho Nahana ka Botebo Hore na ke Phelelang” (Molula-Qhooa, August 1, 2013)