የሆዋ ኺፈጥረና ኸሎ፡ ሓደ ዜደንቕ ውህበት፡ ማለት ናይ ምዝራብ ክእለት ሂቡ እዩ ፈጢሩና። እሞ ደኣ ብዛዕባ ኣጠቓቕማ እዚ ውህበት ይግደስዶ፧ ብርግጽ ይግደስ እዩ! (ያእቆብ 1:26 ኣንብብ።) እሞ ደኣ ንናይ ምዝራብ ክእለትና ንየሆዋ ባህ ብዜብል መገዲ ኸመይ ጌርና ኽንጥቀመሉ ንኽእል፧

1. ንውህበት ዘረባ ብኸመይ ክንጥቀመሉ ይግባእ፧

መጽሓፍ ቅዱስ፡ “ንሓድሕድኩም ተተባብዑን ተሃናነጹን” እዩ ዚብለና። (1 ተሰሎንቄ 5:11) እዚ መተባብዒ እዚ ዜድልዮም ሰባትዶ ትፈልጥ፧ እሞ ደኣ ኸመይ ጌርካ ኸተተባብዖም ትኽእል፧ ከም እትሓልየሎም ንገሮም። ምናልባት ብዛዕባኦም እትፈትዎ ነገር ክትነግሮም ትኽእል ትኸውን። ንሓደ እትፈልጦ ሰብ ኬተባብዖ ዚኽእል ጥቕሲ ትዝክርዶ፧ ብዙሕ ምርጫ ኣሎካ። ኣዘራርባኻ እውን ማዕረ ቓላትካ ኣብ ሰባት ዓሚቝ ጽልዋ ኼሕድር ከም ዚኽእል ኣይትረስዕ። ስለዚ፡ ወትሩ ብለውሃትን ብልእመትን ክትዛረብ ጽዓር።—ምሳሌ 15:1።

2. እንታይ ዓይነት ዘረባ ኢና ኽንዛረብ ዘይብልና፧

መጽሓፍ ቅዱስ፡ “ሕማቕ ቃል . . . ካብ ኣፍኩም ኣይውጻእ” ይብል። (ኤፌሶን 4:29 ኣንብብ።) ከምዚ ኺብሃል ከሎ፡ ንስምዒት ሰብ ዚጐድእ ጽዩፍ ዘረባ፡ ተሪር ቃላት፡ ወይ ሃሳዪ ዘረባ ኣይንዛረብን ማለት እዩ። ካብ ሕሜትን ጸለመን እውን ክንርሕቕ ኣሎና።—ምሳሌ 16:28 ኣንብብ።

3. ሃናጺ ዘረባ ንምዝራብ ዚሕግዘና እንታይ እዩ፧

መብዛሕትኡ ግዜ፡ ብዛዕባ እቲ ብሓቂ ኣብ ልብና ወይ ኣብ ኣእምሮና ዘሎ ኢና እንዛረብ። (ሉቃስ 6:45) ስለዚ፡ ኣብ ኣወንታዊ ነገራት፡ ማለት ኣብ ጽድቂ ዘበለን ንጹህ ዘበለን ተፈታዊ ዘበለን ዚንኣድ ዘበለን ንምትኳር፡ ገዛእ ርእስና ኸነሰልጥን ኣሎና። (ፊልጲ 4:8) ኣብዚ ነገራት እዚ ምእንቲ ኸነተኵር፡ መዘናግዒናን ኣዕሩኽናን ተጠንቂቕና ኽንመርጽ ኣሎና። (ምሳሌ 13:20) ብዛዕባ እቲ እንዛረቦ ነገር፡ ግዜ ወሲድና ምሕሳብ እውን ኪሕግዘና ይኽእል እዩ። ቃላትካ ንሰባት ብኸመይ ኪጸልዎም ከም ዚኽእል ሕሰብ። መጽሓፍ ቅዱስ፡ “ብዘይ ሓልዮት ዚዝረብ ዘረባ ኸም ሰይፊ ይወግእ፣ ልሳን ጥበበኛታት ግና የሕዊ” ይብል።—ምሳሌ 12:18።

 ኣዕሚቝካ ዅዓት

4. ዘረባኻ ተቘጻጸር

ኵላትና ጸኒሑ ዜጣዕሰና ነገር ንዛረብ ኢና። (ያእቆብ 3:2) ገላትያ 5:22, 23 ኣንብብ፡ ድሕሪኡ በዚ ሕቶታት ተመያየጡ፦

• ዘረባኻ ንምቍጽጻር፡ ካብዚ ባህርያት እዚ ብዛዕባ እንታይ ክትጽሊ ትኽእል፧ እዚ ባህርያት እዚኸ ብኸመይ ኪሕግዘካ ይኽእል፧

ቀዳማይ ቈረንቶስ 15:33 ኣንብብ፡ ድሕሪኡ በዚ ሕቶ ተመያየጡ፦

• ናይ ኣዕሩኽን ናይ መዘናግዕን ምርጫኻ ኣብ ዘረባኻ እንታይ ጽልዋ ኺህልዎ ይኽእል፧

መክብብ 3:1, 7 ኣንብብ፡ ድሕሪኡ በዚ ሕቶ ተመያየጡ፦

• ስቕ ምባል ወይ ንዝሓሸ ኣጋጣሚ ምጽባይ ግቡእ ዚኸውን መዓስ ኪኸውን ይኽእል፧

 5. ብዛዕባ ሰባት ኣወንታዊ ነገር ተዛረብ

6. ንስድራ ቤትካ ብለውሃት ተዛረቦም

 ጽማቝ

ቃላት ሓይሊ ኣለዎ። ብዛዕባ እቲ እንዛረቦ ቓላት፡ ብዛዕባ እቲ እንዛረበሉ እዋን፡ ከምኡ ድማ ብዛዕባ እቲ እንዛረበሉ መገዲ ኽንሓስብ ኣሎና።

ክለሳ

• ገለ ኻብቲ ብዘረባኻ ጌርካ ንሰባት እትሕግዘሉ መገድታት እንታይ እዩ፧

• እንታይ ዓይነት ዘረባ ኢኻ ኽትዛረብ ዘይብልካ፧

• ኣብ ዘረባና ወትሩ ለዋሃትን ሃነጽትን ንምዃን እንታይ ኪሕግዘና ይኽእል፧