ITYOUGH 51
Lamen a Mbagenev sha Gbenda u A Doo Yehova Yô
Yehova yange gba se, na se iyua igen i doon tsung. Iyua shon yô, ka iliam. Nahan kwagh gba un sha gbenda u se lamen laa? Een, kwagh gba un. (Ôr Yakobu 1:26.) Nahan se er nan ve se lamen a mbagen sha gbenda u a doo Yehova?
1. Se er kwagh a iyua i Yehova a ne se i lamen ne sha inja nena?
Bibilo kaa a vese ér “taver nen hanmô wen ishima shi wasen nen hanmô wen.” (1 Mbatesalonika 5:11) U fa ior mba u nenge wer doo u ma i taver ve ishima yôô? Nahan ka nyi u fatyô u eren sha u wasen ve? Tese ve wer kwagh ve gba u ishima. U fatyô u ôron ve kwagh u a doo u ken a ve yô. U fa ma ivur Bibilo i ia taver or u u fe nan ishima yôô? Avur a Bibilo nga kpishi a u fatyô u tsuan yô. Shi umbur kpaa wer gbenda u u lamen a mbagenev la, ua fatyô u taver ve ishima kpishi. Nahan nôngo lamen a ior kundu kundu hanma shighe cii.—Anzaakaa 15:1.
2. Ka iliam i nyi nahan i doo u se palegha?
Bibilo kaa ér: “Ma iliam i dang i de dugh ken zwa wen ga.” (Ôr Mbaefese 4:29.) Kwagh ne tese ér gba u se palegh iliam i dang shin u lamen côu côu gayô lamen a mbagenev sha icihi sha u i vihi ve la. Shi gba u se palegh u lamen sha mbagenev shin eren angereke.—Ôr Anzaakaa 16:28.
3. Ka nyi ia wase se u lamen a mbagenev sha gbenda u ishima ia taver ve?
Ashighe kpishi akaa a se ôron la, ka a tese er i lu se ken ishima la, shin a tese kwagh u se lu henen sha mi la. (Luka 6:45) Sha nahan yô, gba u se kighir iyol yase se henen sha akaa a injaa, ka akaa a a lu a vough man akaa a a lu a wang man akaa a van a dooshima man akaa a a kom iwuese je la. (Mbafilipi 4:8) Aluer se soo u eren akaa ne yô, gba u se wa ikyo sha anumbe a se eren kua akaa a se nengen shin se ungwan sha u zuan a msaanyol la, shi se fa ior mba se kôr azende a ve yô. (Anzaakaa 13:20) Shi kwagh ugen yô, gba u se henen sha kwagh cii ve se ôron ye. Hen sha gbenda u iliam you ia na a lu mbagen ken ishima la kpaa. Bibilo kaa ér: ‘Orgen ka nan gba ôron kwagh gagh er mkuma u sanker yô, kpa nombor u orfankwagh yô, ngu ne mkpeyol.’—Anzaakaa 12:18.
HEN KWAGH I ZA SHIMI
Hen er u lam a mbagenev sha gbenda u a doo Yehova shi iliam you la ia taver ve ishima yô.
4. Wa ikyo sha iliam you
Se cii ashighe agen ka se ôr akaa a shighe a karen yô, se vaa afanyô yô. (Yakobu 3:2) Ôr Mbagalatia 5:22, 23, maa lam nen sha mbampin mban:
-
Ka hanma ieren ken aeren a i ter ken avur ne u fatyô u eren msen wer Aôndo a wase u u lu a mi, sha er iliam you ia hemba doonoo? Aeren ne aa wase u nena?
Ôr 1 Mbakorinte 15:33, maa lam nen sha mpin ne:
-
Alaghga azende a ou kua akaa a u eren sha u zuan a msaanyol la aa bende a gbenda u u lamen la nena?
Ka nyi ia fatyô u benden a iliam youwe?
Ôr Orpasenkwagh 3:1, 7, maa lam nen sha mpin ne:
-
Ka hanma shighe nahan i hembe doon u u lu ving shin u tamber cii ve u ôr kwagha?
5. Ôron akaa a dedoo sha mbagenev
Se er nan ve se palegh u lamen a mbagenev sha icihi shin ôron akaa a aa vihi ve? Nenge VIDIO i i lu heen ne, maa lam nen sha mbampin mba ve dondo ne.
-
Ken vidio la, er nan anmgbian u nomso la a soo u geman gbenda u a lamen sha mbagenev laa?
-
Ka nyi a er ve i wase un u den ieren laa?
Ôr Orpasenkwagh 7:16, maa lam nen sha mpin ne:
-
Ka nyi i doo u se umbur shighe u i lu se ape lamen sha or dang-na?
Ôr Orpasenkwagh 7:21, 22, maa lam nen sha mpin ne:
-
Avur ne aa wase u, u palegh u vihin ishima kpishi shighe u or lam sha a we dang nena?
6. Lamen a mba hen tsombor wou kundu kundu
Yehova soo ér se lamen a mba hen tsombor wase kundu kundu man sha dooshima. Nenge VIDIO i i lu heen ne, maa lam nen sha mpin u a dondo ne.
-
Ka nyi ia wase u u lamen a mba hen tsombor wou kundu kundu?
Ôr Mbaefese 4:31, 32, maa lam nen sha mpin ne:
-
Se lamen a mba hen tsombor wase nena ve a doo ve?
Yehova yange pase er lu un ken ishima a Wan na Yesu yô. Ôr Mateu 17:5, maa lam nen sha mpin ne:
-
U dondo ikyav i Yehova la sha gbenda u u lamen a mba hen tsombor wou la nena?
Keren aan a u fatyô u wuese mbagen yô
IOR MBAGENEV KA VE KAA ÉR: “Mo yô ka m ôr kwagh u m soo cii, a doo or ga yô, nana de.”
-
U lumun a kwagh nee? Er nan u ôr nahana?
KA NYI U HENE?
Kwaghôron wase una fatyô u wasen mbagenev shin una na ishima ia vihi ve ker. Ka nahan ve i doo u se lamen sha inja shi se fa shighe u se lam kua gbenda u se ôr kwagh ve a doo ye.
Mbampin mba umbur kwagh u i hen yô
-
Ka sha igbenda i nyi nahan u fatyô u wasen mbagen sha iliam youwe?
-
Ka iliam i nyi nahan i doo u u palegha?
-
Ka nyi ia wase se ve se lamen a ior kundu kundu man sha gbenda u ishima ia taver ve?
SEER HENEN KWAGH
Ka nyi ia wase se u lamen sha gbenda u ua taver mbagen ishima?
Hen fa kwagh u una wase u u palegh iliam i dang yô.
Nenge er u fatyô u palegh hôn u lamen dang sha ior la yô.
Nenge er Yehova yange wase orgen de iliam i dang yô.
“M Hii u Henen sha Kwagh u M Lu sha Mi Jim Yô” (Iyoukura, Setemba 1, 2013)
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
