SAMBIRU 51
Kumbi Mungachita Wuli Kuti Mukondwesengi Yehova Asani Mulongoro ndi Anyinu?
Yehova wakutilenga ndi mphasu yapade ukongwa yakulongoro. Kumbi iyu wadandawula asani titiyigwiriskiya ntchitu uheni mphasu yeniyi? Hinya! (Ŵerengani Yakobe 1:26.) Sonu kumbi tingachita wuli kuti Yehova wakondwengi ndi vo tilongoro?
1. Kumbi tingachita wuli kuti tiyigwiriskiyengi ntchitu umampha mphasu yakulongoro yo Yehova wakutipaska?
Bayibolu likamba kuti: “Lutirizgani kuchiskana ndi kuzengana.” (1 Atesalonika 5:11) Kumbi pe munthu munyaki yo muwona kuti mungamuchiska? Kumbi mungachita wuli kuti mumuchiski? Mungamukambiya kuti mutimuŵanaŵaniya ukongwa. Kweniso mungamuwonga chifukwa cha mijalidu yinyaki yamampha yo wenayu. Kumbi pe lemba lelosi lo mungagwiriskiya ntchitu kuti muchiski munthu? Hinya, pe malemba nganandi ngo mungagwiriskiya ntchitu. Kweniso mutenere kukumbuka kuti munthu wangachiskika ukongwa chifukwa cha mo mungakambiskiyana nayu. Mwaviyo, nyengu zosi mukambiskanengi mwaulemu kweniso mwakuzika ndi anyinu.—Nthanthi 15:1.
2. Kumbi ndi vinthu nivi vo tikhumbika cha kulongoro?
Bayibolu likamba kuti: “Mazu ngakuvunda, ngangatuwanga cha pamulomu pinu.” (Ŵerengani Aefeso 4:29.) Ivi ving’anamuwa kuti tikhumbika cha kutuka pamwenga kukamba mazu ngaheni ndipuso ngakunyoza ngo ngangapweteka anyidu. Titenere so cha kukamba vinthu viheni vakukwaskana ndi anyidu pamwenga kukamba boza lakunanga mbiri yawu.—Ŵerengani Nthanthi 16:28.
3. Kumbi ndi vinthu wuli vo vingatiwovya kuti tikambengi vinthu vakuchiska?
Kanandi titanja kulongoro vinthu vo vazaza mumtima ndi mumaŵanaŵanu ngidu. (Luka 6:45) Mwaviyo, tikhumbika kuyesesa kuti nyengu zosi tiŵanaŵaniyengi vinthu vaurunji, vakutowa, vakwanjika, ndipuso vakuthamikika. (Afilipi 4:8) Kuti tifiski kuchita venivi, tikhumbika kusankha umampha vakukondwesa ndipuso mabwezi. (Nthanthi 13:20) Tikhumbika so kuŵanaŵaniyapu dankha vo tikhumba kukamba ndipuso mo tivikambiyengi. Muŵanaŵaniyengi mo anyinu akwaskikiyengi ndi vo mukhumba kukamba. Bayibolu likamba kuti: “Mazu ngakukambika mwambula kuŵanaŵana umampha, ngagwaza nge lipanga, kweni lilimi la munthu wazeru lichizga.”—Nthanthi 12:18.
SAMBIRANI VINANDI
Wonani vo mungachita kuti mukondwesengi Yehova asani mulongoro ndi anyinu kweniso mo mungaŵachiskiya.
4. Muphweriyengi pakulongoro
Nyengu zinyaki tosi tilongoro vinthu vo tidandawula navu pavuli paki. (Yakobe 3:2) Ŵerengani Agalatiya 5:22, 23, pavuli paki kambiskanani mafumbu yanga:
-
Kumbi ndi mijalidu niyi pa mijalidu iyi, yo mungapempha Yehova kuti mulongorongi vinthu vamampha? Kumbi mijalidu yeniyi yingakuwovyani wuli?
Ŵerengani 1 Akorinto 15:33, pavuli paki kambiskanani fumbu ili:
-
Kumbi mabwezi ndipuso vakukondwesa vo mungasankha vingakuchitiskani kuti mulongorongi vinthu va mtundu wuli?
Kumbi ndi vinthu wuli vo vingachitiska kuti mulongorongi vinthu vamampha pamwenga viheni?
Ŵerengani Wakutawula 3:1, 7, pavuli paki kambiskanani fumbu ili:
-
Kumbi muwona kuti ndi nyengu niyi yo mungajaliya cheti pamwenga yo mungalindizgiya kuti mukambi vo mukhumba kukamba?
5. Mukambengi vinthu vamampha va ŵanthu anyaki
Kumbi tingachita wuli kuti tileki kukamba vinthu vambula ulemu vo vingapweteka anyidu? Woneriyani VIDIYO, pavuli paki kambiskanani mafumbu ngo nge mumphata.
-
Nge mo tawone mu vidiyo, ntchifukwa wuli mubali uyu wanguwona kuti wakhumbika kusintha mo walongoloriyanga vakukwaskana ndi ŵanthu anyaki?
-
Kumbi iyu wanguchita wuli kuti wasinthi?
Ŵerengani Wakutawula 7:16, pavuli paki kambiskanani fumbu ili:
-
Kumbi tikhumbika kukumbukanji asani mumtima mwaza maŵanaŵanu ngakukhumba kukamba vinthu viheni vakukwaskana ndi ŵanthu anyaki?
Ŵerengani Wakutawula 7:21, 22, pavuli paki kambiskanani fumbu ili:
-
Kumbi lemba ili lingakuwovyani wuli kuti muleki kukwiya asani munthu munyaki wakamba vinthu viheni vakukwaskana ndi yimwi?
6. Mulongorongi mwaulemu ndi ŵanthu a mubanja linu
Yehova wakhumba kuti tikambiskanengi mwaulemu ndipuso mwachanju ndi ŵanthu a mubanja lidu. Woneriyani VIDIYO, pavuli paki kambiskanani fumbu lo le mumphata.
-
Kumbi ndi vinthu wuli vo vingakuwovyani kuti mukambiskanengi mwaulemu ndi ŵanthu a mubanja linu?
Ŵerengani Aefeso 4:31, 32, pavuli paki kambiskanani fumbu ili:
-
Kumbi mungachita wuli kuti mulongorongi mwaulemu ndi ŵanthu a mubanja linu?
Yehova wangulongo mo wayanjiyanga Mwana waki Yesu. Ŵerengani Mateyu 17:5, pavuli paki kambiskanani fumbu ili:
-
Kumbi mungalongo wuli kuti muyezga Yehova asani mulongoro ndi ŵanthu a mubanja linu?
Muyesesengi kuwonga anyinu
ŴANTHU ANYAKI AKAMBA KUTI: “Ini ndikamba vo ve mumtima wangu. Ndilivi navu ntchitu asani vo ndikamba anyaki vitiŵakondwesa cha.”
-
Kumbi namwi mukoliyana navu? Ntchifukwa wuli muwona viyo?
KUMBI MWASAMBIRANJI?
Vo tingakamba vingachiska anyidu pamwenga vingaŵapweteka. Tikhumbika kuŵanaŵaniyapu dankha vo tikhumba kukamba, nyengu yo tikambiyengi ndipuso mo tivikambiyengi.
Kuweriyamu
-
Kumbi mungachita wuli kuti mukambengi vinthu vakuchiska anyinu?
-
Kumbi ndi vinthu nivi vo tikhumbika cha kulongoro?
-
Kumbi ndi vinthu wuli vo vingatiwovya kuti tilongorongi mwaulemu ndipuso vinthu vakuchiska?
FUFUZANI
Kumbi ndi vinthu wuli vo vingatiwovya kuti tikambengi vinthu vakuchiska?
Wonani vo vingakuwovyani kuti muleki kutuka.
Wonani vo mungachita kuti muleki kukamba maboza ngo ngangananga mbiri ya ŵanthu anyaki.
Wonani mo Yehova wanguwovye munthu munyaki kuti waleki kutuka.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
