CIIYO 51
Mbuti Mbomukonzya Kumukkomanisya Jehova Muŋambawido Yanu?
Ciindi Jehova naakatulenga, wakatupa cipego cibotu kapati, icipego cakwaambaula. Sena Jehova ulabikkila maano kujatikizya mbotucibelesya cipego eeci? Inzya! (Amubale Jakobo 1:26.) Aboobo, ino mbuti mbotukonzya kubelesya cipego eeci munzila iimukkomanisya Jehova?
1. Mbuti mbotweelede kucibelesya cipego cakwaambaula?
Bbaibbele litwaambila kuti “amuzumanane kukulwaizyanya akuyakana umwi amweenzinyina.” (1 Batesalonika 5:11) Sena kuli mbomukonzya kuyeeya ibayandika kukulwaizya? Ncinzi ncomukonzya kucita kutegwa mubagwasye kulimvwa kabotu? Amubaambile kuti mulababikkila maano. Ambweni mulakonzya kubaambila zintu nzyobacita kabotu. Sena inga mwayeeya lugwalo lumwi ilukonzya kukulwaizya muntu umwi ngomuzyi? Manji magwalo ngomukonzya kusala. Alimwi amuyeeye kuti, mbomwaamba cintu cimwi amajwi ngomubelesya kulakonzya kubajatikizya kapati bamwi. Aboobo lyoonse amusoleke kwaambaula caluzyalo alimwi acabubombe.—Tusimpi 15:1.
2. Niŋambawido iili buti njotweelede kweeleba?
Bbaibbele lyaamba kuti: “Kutazwi jwi libolede neliba lyomwe mukanwa lyanu.” (Amubale Baefeso 4:29.) Eeci caamba kuti tatweelede kubelesya majwi mabi naa kwaamba cintu cimwi icitali kabotu calo cikonzya kunyemya muntu umwi. Alimwi tatweelede kuvwiya naa kubejekezya bamwi.—Amubale Tusimpi 16:28.
3. Ncinzi cikonzya kutugwasya kwaamba majwi aayaka?
Kanji-kanji, zintu nzyotwaamba ziyubununa izili mumoyo wesu naa nzyotuyeeya. (Luka 6:45) Aboobo tweelede kuliyiisya kuyeeya zintu zili kabotu, nkokuti zintu ziluleme, zisalala, ziyandwa alimwi azyeelede kutembaulwa. (Bafilipi 4:8) Kutegwa tucite oobo, tweelede kusala zyakulikondelezya zili kabotu alimwi abalongwe bali kabotu. (Tusimpi 13:20) Alimwi akwalo kuzinzibala kuyeeya katutanaambaula kulagwasya. Amuyeeye majwi aanu mbwaakonzya kubajatikizya bamwi. Bbaibbele lyaamba kuti: “Majwi aambwa cakutayeeya alayasa mbuli panga, pele mulaka wabasongo ulaponya.”—Tusimpi 12:18.
AMWIIYE ZINJI
Atwiiye kujatikizya mbotukonzya kwaambaula munzila iimukkomanisya Jehova alimwi iikulwaizya bamwi.
4. Kamulijata kwaambaula
Zimwi ziindi, toonse tulaamba zintu zikonzya kutupa kulimvwa bubi twamana kuzyaamba. (Jakobo 3:2) Amubale Bagalatiya 5:22, 23, akubandika mibuzyo eeyi:
-
Mbube nzi mbomuyanda kupailila kutegwa kabumugwasya kweendelezya mulaka wanu? Mbuti bube oobo mbobukonzya kumugwasya?
Amubale 1 Bakorinto 15:33, akubandika mubuzyo ooyu:
-
Mbuti balongwe mbomusala alimwi azyakulikondelezya mbozikonzya kwiijatikizya ŋambawido yanu?
Ncinzi cikonzya kupa kuti ŋambawido yanu icince?
Amubale Mukambausi 3:1, 7, akubandika mubuzyo ooyu:
-
Ndilili nocikonzya kuba cabusongo kuumuna naa kulindila kwaciindi cili mbocibede kamutanaamba cili coonse?
5. Kamwaamba zintu zibotu kujatikizya bamwi
Mbuti mbotukonzya kweeleba kunyemya bamwi naa kwaamba zintu zibyaabi? Atweebelele VIDIYO, akubandika mibuzyo iitobela.
-
Muvidiyo, nkaambo nzi mukwesu ooyu ncaakayanda kucinca nzyaakali kwaamba kujatikizya bamwi?
-
Ino wakacita buti kutegwa acince?
Amubale Mukambausi 7:16, akubandika mubuzyo ooyu:
-
Ncinzi ncotweelede kuyeeya ciindi notwasunkwa kwaamba zintu zibyaabi kujatikizya muntu umwi?
Amubale Mukambausi 7:21, 22, akubandika mubuzyo ooyu:
-
Mbuti tupango ootu mbotukonzya kumugwasya kutanyema ciindi umwi naamba zintu zibyaabi kujatikizya ndinywe?
6. Kamutondezya luzyalo ciindi nomubandika abanamukwasyi
Jehova uyanda kuti katubandika caluzyalo alimwi acaluyando abanamukwasyi. Atweebelele VIDIYO, akubandika mubuzyo uutobela.
-
Ncinzi cikonzya kumugwasya kubandika caluzyalo abanamukwasyi?
Amubale Baefeso 4:31, 32, akubandika mubuzyo ooyu:
-
Majwi aali buti aayaka mukwasyi?
Jehova wakatondezya mbwaakali kulimvwa kujatikizya Mwanaakwe, Jesu. Amubale Matayo 17:5, akubandika mubuzyo ooyu:
-
Mbuti mbomukonzya kumwiiya Jehova munzila njomubandika abanamukwasyi?
Amujane nzila mbomukonzya kubalumbaizya bamwi
BAMWI BAAMBA KUTI: “Mebo ndaamba buyo zili kumoyo. Tandikwe ndaba ambobalimvwa bamwi.”
-
Sena mulaazumina makani aaya? Nkaambo nzi?
MUBUFWAAFWI
Mbwaanga majwi alaanguzu, tweelede kubikkila maano kuzintu nzyotwaamba, notweelede kuzyaamba alimwi ambotweelede kuzyaamba.
Ncinzi Ncomwaiya?
-
Muunzila nzi momukonzya kubelesya majwi aanu kugwasya bamwi?
-
Niŋambawido iili buti njomuyanda kweeleba?
-
Ncinzi cikonzya kumugwasya kutegwa lyoonse kamwaambaula caluzyalo alimwi munzila iiyaka?
AMUZYIBE ZINJI
Ncinzi cikonzya kutugwasya kubelesya majwi aali kabotu?
Amwiiye cikonzya kumugwasya kweeleba kwaamba majwi mabyaabi.
“Sena Kwaamba Majwi Mabyaabi Makani Masyoonto?” (Cibalo caaintaneti)
Amubone mbomukonzya kweeleba kakole kakuvwiya.
Amubone Jehova mbwaakagwasya mwaalumi iwakali kulwana penzi lyakuleka kwaamba majwi mabyaabi.