DYONDZO 51
U Nga N’wi Tsakisa Njhani Yehovha Hi Ndlela Leyi U Vulavulaka Ha Yona?
Loko Yehovha a hi vumba, u hi nyike nyiko leyi tsakisaka swinene, ku nga vuswikoti byo vulavula. Xana u ni mhaka ni leswaku hi yi tirhisa njhani nyiko leyi? Ina, u ni mhaka! (Hlaya Yakobo 1:26.) Xana hi nga yi tirhisa njhani nyiko leyi ya ku vulavula hi ndlela leyi nga ta tsakisa Yehovha?
1. Hi fanele hi yi tirhisa njhani nyiko yo vulavula?
Bibele yi hi byela leswaku hi “[ya] emahlweni [hi] khutazana ni ku akana.” (1 Vatesalonika 5:11) Xana va kona lava u ehleketaka leswaku va lava ku khutaziwa? U nga endla yini leswaku u va endla va titwa va antswa? Va byele leswaku i va nkoka eka wena. Kumbexana u nga va bumabumela hikwalaho ka swilo leswinene leswi va swi endlaka. Xana ku na tsalwa leri u vonaka onge ri nga khutaza munhu un’wana loyi u n’wi tivaka? Ku ni matsalwa yo tala lawa u nga ma hlawulaka. Nakambe, tsundzuka leswaku ndlela leyi u vulavulaka ha yona ni van’wana yi nga va khutaza swinene. Hikwalaho, mikarhi hinkwayo vulavula hi ndlela yo rhula ni ya musa.—Swivuriso 15:1.
2. Hi wahi mavulavulelo lawa hi faneleke hi ma papalata?
Bibele yi ri: “Rito ro bola ri nga humi enon’wini wa n’wina.” (Hlaya Vaefesa 4:29.) Leswi swi vula leswaku a hi fanelanga hi rhuketela kumbe hi tirhisa marito lama tlhavaka leswaku hi twisa van’wana ku vava. Hi fanele hi tlhela hi papalata ku hleva ni ku onha van’wana vito.—Hlaya Swivuriso 16:28.
3. I yini lexi nga hi pfunaka leswaku mavulavulelo ya hina ma aka van’wana?
Hakanyingi swilo leswi hi vulavulaka ha swona swi paluxa leswi nga etimbilwini ta hina kumbe leswi hi swi ehleketaka. (Luka 6:45) Hikwalaho hi fanele hi tidyondzisa ku anakanyisisa hi swilo leswi khutazaka, ku nga swilo leswi lulameke, leswi tengeke, leswi rhandzekaka ni leswi ku vulavuriwaka kahle ha swona. (Vafilipiya 4:8) Leswaku hi kota ku anakanyisisa hi swilo leswi, hi fanele hi hlawula vuhungasi lebyinene ni vanghana lavanene. (Swivuriso 13:20) Nakambe swa pfuna ku ehleketisisa hi nga si vulavula. Ehleketa hi ndlela leyi van’wana va nga ta titwa ha yona hi leswi u nga ta swi vula. Bibele yi ri: “Marito lama vuriwaka handle ko anakanyisisa ma tlhava ku fana ni banga, kambe ririmi ra lavo tlhariha ra horisa.”—Swivuriso 12:18.
ANAKANYISISA
Dyondza ku vulavula hi ndlela leyi tsakisaka Yehovha yi tlhela yi khutaza van’wana.
4. Lawula mavulavulelo ya wena
Hinkwerhu, ku ni mikarhi leyi hi vulaka swilo leswi hi salaka hi tisola hi swona. (Yakobo 3:2) Hlaya Vagalatiya 5:22, 23, ivi mi bula hi swivutiso leswi:
-
Hi ku ya hi leswi boxiweke eka tsalwa leri, hi swihi swilo leswi u nga swi khongelelaka leswaku swi ku pfuna u lawula mavulavulelo ya wena? Swilo sweswo swi nga ku pfuna njhani?
Hlaya 1 Vakorinto 15:33, ivi mi bula hi xivutiso lexi:
-
Vanghana lava u va hlawulaka ni vuhungasi bya wena swi nga ma khumba njhani mavulavulelo ya wena?
I yini lexi nga khumbaka mavulavulelo ya wena?
Hlaya Eklesiasta 3:1, 7, ivi mi bula hi xivutiso lexi:
-
Hi le ka swiyimo swihi laha ku nga vaka vutlhari ku miyela kumbe u rindzela nkarhi lowunene wa leswaku u vula swo karhi?
5. Vulavula kahle hi van’wana
Hi nga swi papalata njhani ku vula swilo leswi twisaka vanhu van’wana ku vava? Tlanga VHIDIYO, ivi mi bula hi swivutiso leswi landzelaka.
-
Eka vhidiyo leyi, hikwalaho ka yini makwerhu loyi a a lava ku cinca ndlela leyi a a vulavula ha yona hi van’wana?
-
U endle yini leswaku a cinca?
Hlaya Eklesiasta 7:16, ivi mi bula hi xivutiso lexi:
-
I yini leswi hi faneleke hi swi tsundzuka loko hi ringeka ku vula swo biha hi munhu wo karhi?
Hlaya Eklesiasta 7:21, 22, ivi mi bula hi xivutiso lexi:
-
Tindzimana leti ti nga ku pfuna njhani leswaku u nga hlundzuki loko munhu wo karhi a vulavula ku biha hi wena?
6. Vana ni musa loko u vulavula ni ndyangu wa wena
Yehovha u lava leswaku hi vulavula ni ndyangu wa hina hi ndlela ya musa ni ya rirhandzu. Tlanga VHIDIYO, ivi mi bula hi xivutiso lexi landzelaka.
-
I yini lexi nga ku pfunaka leswaku u vulavula ni ndyangu wa wena hi musa?
Hlaya Vaefesa 4:31, 32, ivi mi bula hi xivutiso lexi:
-
Hi wahi mavulavulelo lama akaka swirho swa ndyangu?
Yehovha u vule ndlela leyi a titwaka ha yona hi N’wana wakwe, Yesu. Hlaya Matewu 17:5, ivi mi bula hi xivutiso lexi:
-
Xana ndlela leyi u vulavulaka ni ndyangu wa wena ha yona yi nga swi kombisa njhani leswaku u tekelela Yehovha?
Lava tindlela ta ku bumabumela van’wana
VAN’WANA VA RI: “Ndzo vulavula, a ndzi hlawuli. A ndzi na mhaka leswaku van’wana va titwa njhani hi leswi ndzi swi vulaka.”
-
Xana na wena u ri tano? Hlamusela.
NKATSAKANYO
Marito ma ni matimba. Hi fanele hi ehleketisisa hi leswi hi swi vulaka, nkarhi lowu hi swi vulaka ha wona ni ndlela leyi hi swi vulaka ha yona.
Mpfuxeto
-
U nga va pfuna njhani van’wana hi ndlela leyi u vulavulaka ha yona?
-
Hi wahi mavulavulelo lawa u lavaka ku ma papalata?
-
I yini leswi nga hi pfunaka ku vulavula hi ndlela ya musa ni leyi akaka mikarhi hinkwayo?
KUMA LESWI ENGETELEKEKE
I yini leswi nga hi pfunaka ku vulavula kahle ni van’wana?
Twana leswi nga ku pfunaka ku papalata ku rhuketela.
“Xana Hakunene Ku Rhuketela Swi Bihile?” (Nhlokomhaka leyi kumekaka eka website)
Vona ndlela leyi u nga swi papalataka ha yona ku hleva.
Twana ndlela leyi Yehovha a n’wi pfuneke ha yona wanuna un’wana leswaku a tshika ku rhuketela.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
