SAMBIRO 51
Kasi Mungachita Wuli Kuti Ivyo Mukuyowoya Vikondweskenge Yehova?
Apo Yehova wakalenganga taŵanthu, wakatilenga na chawanangwa cha kuyowoya. Kasi Yehova vikumukhwaska umo tikugwiliskira ntchito chawanangwa ichi? Nkhanira kwali! (Ŵazgani Yakobe 1:26.) Ipo kasi tingachita wuli kuti ivyo tikuyowoya vikondweskenge Yehova?
1. Kasi tingagwiliskira wuli ntchito mwamahara chawanangwa cha kuyowoya?
Baibolo likuti “lutilirani kukhwimiskana na kuzengana.” (1 Ŵatesalonika 5:11) Kasi ŵalipo awo mukuwona kuti ŵakukhumbikwira kukhwimiskika? Kasi mungachita wuli kuti ŵajipulikengeko makora? Ŵaphalirani kuti mukuŵawona kuti mbakuzirwa chomene. Panji mungaŵawonga pa vinthu viwemi ivyo ŵakuchita makora. Ghanaghanirani lemba ilo mungakhozgera munyinu. Pali malemba ghanandi chomene agho tingasankha kuti tikhozgere ŵanyithu. Manyani kuti umo mukuyowoyera mungakhozga munthu panji kumukhuŵazga. Ntheura nyengo zose mukwenera kuyowoya mwakuzika kweniso mwalusungu.—Zintharika 15:1.
2. Kasi tikwenera kugega kayowoyero wuli?
Baibolo likuti: “Pa mulomo winu pangafumanga mazgu ghakuvunda yayi.” (Ŵazgani Ŵaefeso 4:29.) Ichi chikung’anamura kuti tikwenera yayi kuyowoya mazgu gha msinjiro, ghakutuka, panji ghakulasa agho ghangakhuŵazga ŵanyithu. Tikweneraso kugega kusesa panji kupusikizgira ŵanyithu.—Ŵazgani Zintharika 16:28.
3. Kasi ntchivichi chingatovwira kuti tiyowoyenge mazgu ghakukhozga?
Kanandi ivyo tikuyowoya vikuvumbura ivyo vili mu mtima withu panji kuti ivyo tikughanaghana. (Luka 6:45) Ntheura tikwenera kujisambizga kuti nyengo zose tighanaghanenge vinthu viwemi, vyaurunji, vituŵa, vyakutemweka na vyakulumbika. (Ŵafilipi 4:8) Kuti tighanaghanire vinthu ivi, tikwenera kusankha mwamahara vyakusanguluska kweniso ŵabwezi. (Zintharika 13:20) Tikweneraso kughanaghanirapo dankha pambere tindayowoye. Ghanaghanirani umo ŵanyinu ŵajipulikirenge na ivyo muyowoyenge. Baibolo likuti: “Kayowoyero kawakawaka kali nga nkhulasa kwa lupanga, kweni lulimi lwa wavinjeru lukuchizga.”—Zintharika 12:18.
MANYANI VINANDI
Wonani ivyo mungachita kuti muyowoyenge vinthu ivyo vingakondweska Yehova na kukhozga ŵanyinu.
4. Mujikorenge pakuyowoya
Kanandi taŵanthu tikuyowoya vinthu ivyo paumaliro tikudandawura navyo. (Yakobe 3:2) Ŵazgani Ŵagalatiya 5:22, 23, kufuma apo dumbiskanani mafumbo agha:
-
Kasi ni mikhaliro wuli iyo mungalomba kwa Yehova kuti yimovwirani kujikora pakuyowoya? Kasi mikhaliro iyi yingamovwirani wuli?
Ŵazgani 1 Ŵakorinte 15:33, kufuma apo dumbiskanani fumbo ili:
-
Kasi ŵabwezi kweniso vyakusanguluska ivyo mukusankha vingakhwaska wuli umo mukuyowoyera?
Kasi ni vinthu wuli vingapangiska kuti muyowoyenge makora panji yayi?
Ŵazgani Mupharazgi 3:1, 7, kufuma apo dumbiskanani fumbo ili:
-
Kasi mphawuli apo mukwenera kukhala chete na kulindilira nyengo yiwemi yakuti muyowoye?
5. Muyowoyenge viwemi vya ŵanyinu
Kasi tingachita wuli kuti tileke kunena panji kuŵayowoyera viheni ŵanyithu? Wonelerani VIDIYO, kufuma apo dumbiskanani mafumbo agha.
-
Kuyana na ivyo mwawona mu vidiyo, chifukwa wuli mubali uyu wakeneranga kusintha umo wakayowoyeranga vinthu vyakukhwaskana na ŵanyake?
-
Kasi wakachita wuli kuti wasinthe?
Ŵazgani Mupharazgi 7:16, kufuma apo dumbiskanani fumbo ili:
-
Kasi tikwenera kukumbuka vichi para tayezgeka kuti tiyowoye viheni vyakukhwaskana na ŵanyithu?
Ŵazgani Mupharazgi 7:21, 22, kufuma apo dumbiskanani fumbo ili:
-
Kasi mavesi agha ghangamovwirani wuli kuti muleke kukwiya chomene para munthu wakumuyowoyerani viheni?
6. Muyowoyenge mwalusungu na ŵa mu banja linu
Yehova wakukhumba kuti tiyowoyenge mwachitemwa kweniso mwalusungu na ŵa mu banja lithu. Wonelerani VIDIYO, kufuma apo dumbiskanani fumbo ili.
-
Kasi ntchivichi chingamovwirani kuti muyowoyenge mwalusungu na ŵa mu banja linu?
Ŵazgani Ŵaefeso 4:31, 32, kufuma apo dumbiskanani fumbo ili:
-
Kasi ni mazgu wuli agho ghangakhozga ŵa mu banja linu?
Yehova wakalongora umo wakajipulikiranga na Mwana wake Yesu. Ŵazgani Mateyu 17:5, kufuma apo dumbiskanani fumbo ili:
-
Kasi mungamuyezga wuli Yehova para mukuyowoyeskana na ŵa mu banja linu?
Sangani mipata yakuwongera ŵanji
IVYO ŴANYAKE ŴAKUYOWOYA: “Ine nkhuyowoya waka ivyo naghanaghana. Uyo wakukhuŵara navyo, vyake ivyo.”
-
Kasi mukukolerana navyo? Chifukwa wuli?
MWAKUDUMURA
Ivyo tikuyowoya vingakhozga ŵanyithu panji yayi. Tikwenera kughanaghanirapo chomene pa ivyo tikukhumba kuyowoya, nyengo iyo tingayowoyera kweniso umo tiyowoyerenge.
Kuweleramo
-
Kasi mungachita wuli kuti nyengo zose ivyo mukuyowoya vikhozgenge ŵanyinu?
-
Kasi ni mazgu wuli agho mukwenera kugega?
-
Kasi ntchivichi chingamovwirani kuti nyengo zose muyowoyenge mwalusungu kweniso mazgu ghakuzenga?
SANGANI FUNDO ZAKUSAZGIKIRA
Kasi ntchivichi chingatovwira kuti nyengo zose tiyowoyenge mazgu ghakukhozga?
Wonani ivyo vingamovwirani kuti muleke kuyowoya mazgu ghaheni.
Wonani ivyo mungachita kuti muleke kusesa.
Wonani umo Yehova wakawovwilira mwanalume munyake kuti waleke kayowoyero kaheni.
“Nkhamba Kughanaghanirapo Chomene uko Umoyo Wane Ukalazganga” (Gongwe la Mulinda, Ogasiti 1, 2013)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
