FUNDO 51

Zvinyi Zvamungaita kuti Mareketero Enyu Apfadze Djehovha?

PLAY

Djehovha paakatisika, akatipasa cipo cakanakisisa—cipo ce kukwanisa kureketa. Djehovha ane basa no maseenzesere atinoita cipo icona here? Honde, ane basa nazvo! (Erengai Tiyago 1:26.) Hino tingaseenzesa kudini cipo ici nge mushobo unopfadza Djehovha?

1. Tinodikana kuseenzesa kudini cipo cekureketa?

Bhaibheri rinotibvunza kuti, “rumbwai mecibambisana uye mecibetserana.” (1 Atesaronika 5:11) Pane anhu amunorangarira anoda kubambiswa here? Zvinyi zvamungaita kuti anyaradzwe? Itai kuti aziye kuti munoada. Pamweni mungaabvunza nge zve ciro cakanaka camunosirira kaari. Pane tsamba ye Bhaibheri yamungarangarira nge zvayo ingabambisa munhu umweni wamunoziya? Pane tsamba dzakawanda dzamungaseenzesa. Edzurirai kuti mareketero amunoita masoko akhona kuti mubambise amweni anokoshawo maningi. Hino edzai kureketa zvakanaka uye no upfawi.—Zvierengo 15:1.

2. Zvinyi zvatisikadikani kureketa?

Bhaibheri rinoti: “Soko rakaora ngarisabude mu muromo menyu.” (Erengai Aefeso 4:29.) Izvi zvinoreya kuti atidikani kureketa masoko anopsverusa, akashata uye anorhwadzisa amweni. Atidikaniwo kuita mapsveda kana kuti kushaisha kureketa amweni.—Erengai Zvierengo 16:28.

3. Cinyi cingatibetsera kuti tirekete masoko anobetsera?

Kajinji zviro zvatinoreketa zvinopangidza zviri mu mwoyo medu uye zviri mu ndangariro. (Ruka 6:45) Ndiyo ndaa, tinodikana kukanda ndangariro dzedu pa zviro zvakanaka, zvakacena, zvinodikanwa uye zvinokudzwa. (Afiripi 4:8) Kuti ndangariro dzedu dzigare dziri pa zviro zvakadaro, tinodikana kungwarira paya patinosanangura zviro zvinotiwaraidza uye shamwari. (Zvierengo 13:20) Tinodikanawo kutanga tarangarira tisati tareketa. Rangarirai kuti masoko enyu acaita kuti amweni azwe kudini. Bhaibheri rinobhuya kuti: “Masoko anorekethwa asikazi kumborangarirhwa anobaya hingana supada, asi rurume re akangwara rinorapa.”—Zvierengo 12:18.

FUNDAI ZVAKAWANDA

Onai kuti mungareketa kudini nge mushobo unopfadza Djehovha uye nge mushobo unobambisa anhu amweni.

4. Ngwarirai zvamunoreketa

Tese isusu tinomboreketa zviro zvatinozotsumba. (Tiyago 3:2) Erengai Agaratiya 5:22, 23, pedzepo cedzai nge zve mibvunzo dzinoteera:

Pa zvibereko zvemwiya zvarekethwa mu tsamba ii, cibereko cipi camungada kunamata nge zvayo kuti mukwanise kudzibata muromo? Zvibereko izvi zvingamubetsera kudini?

Erengai 1 Akorinti 15:33, pedzepo cedzai nge zve mubvunzo unoteera:

Shamwari dzamunosanangura kana kuti zviro zvamunodziwaraidza nazvo zvingabata-bata kudini mareketero amunoita?

Zviro zvipi zvingabata-bata mareketero edu?

Erengai Muparidzi 3:1, 7, pedzepo cedzai nge zve mubvunzo unoteera:

Zvakanakira papi kuti tirumbwe takanyarara kana kuti timboima kureketa nge zve shwiro imweni dakara taona nguwa yakasisira kuti tirekete?

5. Reketai zviro zvakanaka nge zve anhu amweni

Tingaita kudini kuti tisarekete zviro zvinogumbura kana kureketa zviro zvakashata nge zve amweni? Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Reketai Zviro “Zvakanaka Zvinobambisa Amweni” (4:07)

Mu vhidhiyo yataona, ngei hama ii yakaona kuti yaidikana kucinja mareketero ayaiita nge zve amweni?
Yakaitei kuti icinje?

Erengai Muparidzi 7:16, pedzepo cedzai nge zve mubvunzo unoteera:

Cinyi catinodikana kuedzurira kana tikaona kuti taakuda kureketa zvakashata nge zve munhu umweni?

Erengai Muparidzi 7:21, 22, pedzepo cedzai nge zve mubvunzo unoteera:

Mavhersikuro aya angamubetsera kudini kuti musakasike kunyangadzwa kana munhu akareketa zvakashata nge zvenyu?

6. Reketai no amweni zvakanaka mu mhuri

Patinonga tecireketa no amweni mu mhuri, Djehovha anoda kuti tirekete zvakanaka uye zvinopangidza rudo. Ridzai VHIDHIYO, pedzepo cedzai nge zve mubvunzo unoteera.