OCIPAMA 51
O Sanjuisa Ndati Yehova Lolondaka Viove?
Eci Yehova a tu lulika, wa tu ĩha ombanjaile yimue yi komõhisa okuti,—uloño woku vangula. Anga hẽ eye wa kapako onjila ndomo tu talavaya lombanjaile yaco? Ocili okuti, wa kapako! (Tanga Tiago 1:26.) Omo liaco, tu talavaya ndati luloño wetu woku vangula lonjila yi sanjuisa Yehova?
1. Tu talavaya ndati lombanjaile yoku vangula?
Embimbiliya li tu sapuila okuti tu sukila oku ‘amamako oku li vetiya pokati loku li pamisa pokati.’ (1 Va Tesalonike 5:11) O pondola hẽ oku sokolola komanu vamue va sukila evetiyo? Nye o linga oco va liyeve ciwa? Lekisa kokuavo okuti, wa va kapako. Pamue o va sapuila ovina o sole kokuavo. O tẽla hẽ oku sokolola kocisonehua cimue ci ka vetiya omunu umue wa kũlĩha? Kuli ovisonehua vialua o pondola oku nõla. Ivalukavo okuti, onjila ndomo o popia ondaka yimue, ci pondola oku pamisa calua vakuetu. Omo liaco, otembo yosi likolisilako oku vangula locisola kuenda lumbombe.—Olosapo 15:1.
2. Olondaka vipi tu sukila oku yuvula?
Embimbiliya liti: “Vomẽla wene ka mu ka tunde ondaka yĩvi.” (Tanga Va Efeso 4:29.) Eci ci lomboloka okuti, tu sukila oku yuvula olondaka via vĩha, viukãlu kuenda olondaka vi sumuisa omunu umue. Tu sukilavo oku yuvula olombonde kuenda alundi.—Tanga Olosapo 16:28.
3. Nye ci tu kuatisa oku vangula lonjila yimue yi pamisa vakuetu?
Ovina tu vangula, olonjanja vialua vi situlula eci ci kasi vutima wetu, ale vovisimĩlo vietu. (Luka 6:45) Omo liaco, tu sukila oku li pindisa oco tu tiamisile utima kovina viwa—kovina viosi via sunguluka, viosi via pua etondelo, viosi vi sivayiwa kuenda viosi vi pandiyiwa. (Va Filipoi 4:8) Oco tu tiamisile utima kovina evi, tu sukila oku nõla olomapalo kuenda akamba vetu lolondunge. (Olosapo 13:20) Ci tu kuatisavo oku sokiya otembo yoku sokolola lutate kueci tu popia kuenda onjila ndomo tu popia. Kũlĩhĩsa ndomo omanu vakuavo va ka liyeva lovina o ka popia. Embimbiliya liti: “Olondaka ka via sokoluiwile vi kasi ndoku toma kuosipata, pole, elimi liukualondunge li sakula.”—Olosapo 12:18.
LILONGISA ONDONGOSI
Lilongisa ndomo o vangula lonjila yi sanjuisa Yehova, haiyo yi vetiya omanu vakuavo.
4. Kuata utate lolondaka viove
Vosi yetu olonjanja vimue, tu vangula ovina okuti, noke tu livela. (Tiago 3:2) Tanga Va Galatia 5:22, 23, noke konomuisa apulilo a kuãimo:
-
Pokati kovituwa evi, vipi o pondola oku pinga vohutililo oco vi ku kuatise oku kuata utate lolondaka viove? Ovituwa viaco vi ku kuatisa ndati?
Tanga 1 Va Korindo 15:33, noke konomuisa epulilo li kuãimo:
-
Akamba vove kuenda olomapalo vi vetiya ndati onjila ndomo o vangula?
Nye ci pondola oku vetiya onjila ndomo o vangula?
Tanga Ukundi 3:1, 7, noke konomuisa epulilo li kuãimo:
-
Epuluvi lipi nda lia sunguluka oku ũha, ale oku kevelela epuluvi liwa lioku popia ocina cimue?
5. Vangula ovina viwa viatiamẽla ku vakuene
Ndamupi tu yuvula oku sumuisa vakuetu ale oku vangula ovina ka via sungulukile? Tala OVIDEO, noke konomuisa apulilo a kuãimo.
-
Manji wa lekisiwa vovideo, momo lie a nõlelapo oku pongolola onjila ndomo a popia catiamẽla ku vakuavo?
-
Nye a linga oco a pongoloke?
Tanga Ukundi 7:16, noke konomuisa epulilo li kuãimo:
-
Nye tu sukila oku ivaluka eci tu setekiwa oku popia ovina vĩvi viatiamẽla komunu umue?
Tanga Ukundi 7:21, 22, noke konomuisa epulilo li kuãimo:
-
Ovinimbu evi vi ku kuatisa ndati oku yuvula onyeño eci umue a vangula ovina vĩvi viatiamẽla kokuove?
6. Kala ukuacisola poku vangula lepata liove
Yehova o yongola okuti tu sapela lepata lietu lonjila yiwa kuenda locisola. Tala OVIDEO, noke konomuisa epulilo li kuãimo.
-
Nye ci ka ku kuatisa oku sapela locisola lepata liove?
Tanga Va Efeso 4:31, 32, noke konomuisa epulilo li kuãimo:
-
Olondaka vipi vi pamisa epata?
Yehova wa lekisa ndomo a kapako Omõlaye, Yesu. Tanga Mateo 17:5, noke konomuisa epulilo li kuãimo:
-
O setukula ndati Yehova konjila ndomo o sapela lepata liove?
Sanda apuluvi oku pandiya vakuene
OMANU VAMUE VA POPIA VATI: “Mopia eci nda seya. Nda vakuetu ka va sole eci ndi popia, ocitangi hacangeko.”
-
O tava kocisimĩlo caco? Momo lie?
NYE WA LILONGISA?
Ovina o popia, vi pondola oku kuatisa ale oku sumuisa omanu vakuavo. Tu sukila oku sokolola lutate ovina tu popia, otembo tu popia kuenda ndomo tu popia.
Oku Pitulula
-
Vipi vimue pokati kolonjila o kuama poku vangula oco o kuatise vakuene?
-
Olondaka vipi o yongola oku yuvula?
-
Nye ci tu kuatisa otembo yosi oku kala vakuacisola loku pamisa vakuetu lolondaka vietu?
OCO O KŨLĨHE OVINA VIKUAVO
Nye ci tu kuatisa oku popia olondaka vi pamisa vakuetu?
Lilongisa eci ci ku kuatisa oku yuvula upopi ka wa sungulukile.
“Anga hẽ Oku Popia Olondaka Vioku Tukãla Cĩvi?” (Ocipama ci sangiwa lika vo Internet)
Tala ndomo o yuvula oku kupukila veyonjo lioku popia olombonde.
Limbuka ndomo Yehova a kuatisa ulume umue oku siapo oku tukãla.
“Nda Fetika Oku Kũlĩhĩsa Lutate Ekalo Liomuenyo Wange” (Utala Wondavululi 1 Wenyenye 2013)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
