NGUDO 51
Ni Nga Takadza Hani Yehova Nga Nḓila Ine Na Amba Ngayo Na Vhaṅwe?
Musi Yehova a tshi ri sika, o ri ṋea tshifhiwa tshavhuḓi tshine tsha vha u amba. Naa u na ndavha na nḓila ine ra shumisa ngayo tshenetshi tshifhiwa? Ee u na ndavha nazwo! (Vhalani Yakobo 1:26.) Zwino ri nga amba hani nga nḓila ine ya ḓo takadza Yehova?
1. Ri fanela u shumisa hani tshifhiwa tsha u amba?
Bivhili i ri vhudza uri ri bvele phanḓa ri “tshi ṱuṱuwedzana” na u “fhaṱana.” (1 Vhathesalonika 5:11) Naa hu na vhathu vhane na vha ḓivha vhane vha ṱoḓa u khuthadzwa? Ni nga ita mini uri vha ḓipfe vha khwine? Vha vhudzeni uri ni na ndavha navho. Khamusi ni nga vha vhudza nga ha zwithu zwine na zwi funa nga havho. Naa hu na vese ine na nga i shumisa u itela u khuthadza muthu ane na mu ḓivha? Hu na vese nnzhi dzine na nga dzi shumisa. Ni songo hangwa uri nḓila ine na amba ngayo i nga kwama vhaṅwe nga maanḓa. Nga zwenezwo, tshifhinga tshoṱhe ni ambe nga vhulenda, no dzika.—Mirero 15:1.
2. Ndi zwifhio zwine a ro ngo tea u zwi amba?
Bivhili i ri: “Ni songo amba zwo sinaho.” (Vhalani Vhaefesa 4:29.) Zwenezwi zwi amba uri a ro ngo fanela u semana kana u amba maipfi a si avhuḓi ane a ḓo vhaisa muṅwe muthu. Zwiṅwe hafhu, a ro ngo tea u sola vhaṅwe na u vha tshinya madzina.—Vhalani Mirero 16:28.
3. Ndi mini zwine zwa ḓo ri thusa u amba nga nḓila ine ya fhaṱa?
Kanzhi zwithu zwine ra zwi amba zwi dzumbulula zwi re mbiluni dzashu kana zwithu zwine ra humbula nga hazwo. (Luka 6:45) Nga zwenezwo, ri tea u ḓigudisa u humbula nga ha zwithu zwo lugaho, zwo kunaho, zwi funeaho na zwi ṱhonifheaho. (Vhafilipi 4:8) Uri ri kone u ita zwenezwo, ri tea u khetha zwavhuḓi zwithu zwine ra ḓimvumvusa ngazwo na u khetha dzikhonani zwavhuḓi. (Mirero 13:20) Zwi a thusa uri ri thome ri humbule nga ha zwine ra khou ṱoḓa u zwi amba na nḓila ine ra ḓo zwi amba ngayo. Ni humbule nga ha uri zwine na ḓo zwi amba zwi ḓo kwama hani vhaṅwe. Bivhili i ri: “U sokou amba zwi ṱhavha sa banga, fhedzi lulimi lwa wa vhuṱali lu a fhodza.”—Mirero 12:18.
GUDANI ZWO ENGEDZEAHO
Gudani u amba nga nḓila ine ya takadza Yehova na ine ya ṱuṱuwedza vhaṅwe.
4. Langani nḓila ine na amba ngayo
Nga zwiṅwe zwifhinga ri a amba zwithu zwine nga murahu ra ḓisola. (Yakobo 3:2) Vhalani Vhagalata 5:22, 23, ni kone u fhindula mbudziso dzi tevhelaho:
-
Kha zwi re kha idzi vese, ndi zwifhio zwine na nga rabelela uri ni vhe nazwo u itela u ni thusa u langa nḓila ine na amba ngayo? Zwenezwo zwithu zwi nga ni thusa hani?
Vhalani 1 Vhakorinta 15:33, ni kone u fhindula mbudziso i tevhelaho:
-
Khonani dzaṋu na zwine na ḓimvumvusa ngazwo, zwi nga ṱuṱuwedza hani nḓila ine na amba ngayo?
Ndi mini zwine zwa nga kwama nḓila ine na amba ngayo?
Vhalani Muhuweleli 3:1, 7, ni kone u fhindula mbudziso i tevhelaho:
-
Ndi lini hune na tea u fhumula kana u lindela tshifhinga tsho teaho tsha uri ni ambe?
5. Ambani zwithu zwavhuḓi nga ha vhaṅwe
Ri nga iledza hani u amba zwithu zwine zwa vhaisa vhaṅwe kana u ṱhavha vhaṅwe nga maipfi? Ṱalelani VIDIO, ni kone u fhindula mbudziso dzi tevhelaho.
-
Ndi ngani munna we ra mu vhona kha vidio o vha a tshi khou ṱoḓa u shandula nḓila ye a vha a tshi amba ngayo nga ha vhaṅwe?
-
O ita mini u itela u shandula nḓila ye vha a tshi amba ngayo?
Vhalani Muhuweleli 7:16, ni kone u fhindula mbudziso i tevhelaho:
-
Ri fanela u humbula mini musi ri tshi lingea u amba zwithu zwi si zwavhuḓi nga ha muṅwe muthu?
Vhalani Muhuweleli 7:21, 22, ni kone u fhindula mbudziso i tevhelaho:
-
Idzi vese dzi nga ni thusa hani uri ni si sinyuwe musi muṅwe muthu a tshi amba zwithu zwi si zwavhuḓi nga ha inwi?
6. Ivhani na vhulenda musi ni tshi amba na vha muṱa wahaṋu
Yehova u ṱoḓa uri ri ambe na vha muṱa washu nga vhulenda na nga lufuno. Ṱalelani VIDIO, ni kone u fhindula mbudziso i tevhelaho.
-
Ndi mini zwine zwa ḓo ni thusa uri ni ambe nga vhulenda na vha muṱa wahaṋu?
Vhalani Vhaefesa 4:31, 32, ni kone u fhindula mbudziso i tevhelaho:
-
Ri nga amba hani na vha muṱa washu nga nḓila ine ya ḓo ita uri vha pfe vha tshi funiwa?
Yehova o amba nḓila ye a vha a tshi ḓipfa ngayo nga Murwa wawe, Yesu. Vhalani Mateo 17:5, ni kone u fhindula mbudziso i tevhelaho:
-
Ni nga edzisa hani Yehova musi ni tshi amba na vha muṱa wahaṋu?
Wanani nḓila dza u khoḓa vhaṅwe
VHAṄWE VHATHU VHA AMBA URI: “Ndi amba zwine nda funa. A thi na ndavha na uri vhaṅwe vha zwi dzhia hani.”
-
Naa ni a tendelana na zwenezwo? Ndi ngani ni tshi ralo?
NO GUDA MINI?
Zwine ra zwi amba zwi nga thusa kana zwa vhaisa vhaṅwe. Ri tea u thoma ra humbulisisa ri sa athu amba. Ri humbule nga ha zwine ra ḓo zwi amba, uri ri ḓo zwi amba lini na nḓila ine ra ḓo zwi amba ngayo.
Ni Kha Ḓi Zwi Humbula?
-
Ni nga amba hani nga nḓila ine ya nga thusa vhaṅwe?
-
Ndi zwifhio zwine a no ngo tea u zwi amba?
-
Ndi mini zwine zwa nga ri thusa uri ri dzule ri tshi amba nga vhulenda na u amba zwi fhaṱaho?
WANANI ZWO ENGEDZEAHO
Ndi mini zwine zwa nga ni thusa uri ni ambe nga nḓila ine ya ṱuṱuwedza vhaṅwe?
Gudani zwine zwa nga ni thusa uri ni si ambe nga nḓila i si yavhuḓi.
Gudani nḓila ine na nga iledza ngayo u amba vhaṅwe nga nḓila i si yavhuḓi.
Gudani nḓila ye Yehova a thusa ngayo muṅwe munna uri a litshe u semana.
“Ndo Thoma U Humbula Nga Ho Dzikaho Nga Hune Vhutshilo Hanga Ha Khou Ya Hone” (Tshiingamo, 1 September 2013)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
