TIMIRTTE 51
Ne Haasayan Yihoowa Waata Ufayssana Danddayay?
Yihooway nuuni haasayana danddayiyo alˈˈo imotaa immidi nuna medhdhiis. Nuuni he imotaa goˈettiyo hanotay A qofissii? Ee, qofissees! (Yaaqooba 1:26 nabbaba.) Yaatin nuuni haasayiyo imotaa Yihoowa ufayssiya hanotan waati goˈettana danddayiyoo?
1. Haasayiyo imotaa waati goˈettana koshshii?
Geeshsha Maxaafay nuna, “Issoi issuwaa minttettitenne maaddite” yaagees. (1 Tasalonqqe 5:11) Neeni minttettana koshshiyo amaridaageeta qoppana danddayay? Eti minettanaadan ay oottana danddayay? Neeni eta keehi nashshiyoogaa yoota. Geella nena etaban ufayssiyaabay aybakko yootana danddayaasa. Neeni eriyo ura minttettana xiqisiyaa qoppana danddayay? Neeni etappe doorana danddayiyo daro xiqiseti deˈoosona. Qassi, neeni issibaa yootiyo hanotay harata keehi minttettana danddayiyoogaa hassaya. Yaatiyo gishshawu, ubbatoo kehanne liiqo qaalan haasaya.—Leemiso 15:1.
2. Nuuni haasayana koshshennabay aybee?
Geeshsha Maxaafay, ‘Iita qaalay mulekka intte doonaappe kiyoppo’ yaagees. (Efisoona 4:29 nabbaba.) Hegaa giyoogee, nuuni iitabaa woy qassi issi ura yiilloyanawu qoppidi A qohiya borssobaa haasayokko giyoogaa. Qassi, nuuni harata zigirananne eta sunttaa moorana koshshenna.—Leemiso 16:28 nabbaba.
3. Harata minttettiya haasaya haasayanaadan nuna aybi maaddanee?
Nuuni haasayiyoobay darotoo nu wozanaabaanne nuuni qoppiyoobaa qonccissees. (Luqaasa 6:45) Yaatiyo gishshawu, nuuni ‘loˈˈobaa, galatissiyaabaa, tuma gidiyaabaanne bonchchissiyaabaa’ waati qoppanaakko meezetana koshshees. (Piliphphisiyuusa 4:8) Nuuni hegeeta qoppanawu, ufayttanawu giidi siyiyoobata, beˈiyoobatanne hegaa malabata, hegaadankka laggeta akeekan doorana koshshees. (Leemiso 13:20) Nuuni haasayanaappe kase qoppiyoogeekka maaddees. Neeni haasayiyooban harati waananaakko qoppa. Geeshsha Maxaafay, “Akeekennan haasayiyo haasayai cuphedan caddees; shin aadhdhida eranchchaa inxxarssai pattees” yaagees.—Leemiso 12:18.
LOYTTA AKEEKA
Yihoowa ufayssiyaanne harata minttettiya haasaya waata haasayanaakko akeeka.
4. Haasayiyooban naagetta
Nuuni ubbaykka issi issitoo guyyeppe zilˈˈettiyoobaa haasayeettees. (Yaaqooba 3:2) Galaatiyaa 5:22, 23 nabbabite; yaatidi ha oyshata tobbite:
-
Neeni haasayiyooban naagettana mala ha eeshshatuppe awugeeti deˈanaadan Xoossaa woossanawu koyay? Ha eeshshati nena waati maaddana danddayiyoonaa?
Koyro Qoronttoosa 15:33 nabbabite; yaatidi ha oyshaa tobbite:
-
Neeni allaxxiyoobatinne ne laggeti ne haasayaa waati moorana danddayiyoonaa?
Ne haasayaa moorana danddayiyaabay aybee?
Eranchchaa 3:1, 7 nabbabite; yaatidi ha oyshaa tobbite:
-
Neeni coˈˈu giyaakko woy issibaa yootanawu injjetiya wodiyaa naagiyaakko keha gidana danddayiya hanotati aybee?
5. Haratubaa loˈˈobaa haasaya
Harata qohiyaabaa woy kehennabaa haasayennaadan ay oottana danddayiyoo? BIIDUWAA beˈite; yaatidi kaallidi deˈiya oyshata tobbite.
-
Biiduwan beˈido ishay ba haasayiyo ogiyaa laammana koyidoy aybissee?
-
Hegawu I ay oottidee?
Eranchchaa 7:16 nabbabite; yaatidi ha oyshaa tobbite:
-
Issi ura qohiyaabaa haasayanawu paacettiyo wode ay hassayana koshshii?
Eranchchaa 7:21, 22 nabbabite; yaatidi ha oyshaa tobbite:
-
Issi uri nena qohiyaabaa haasayiyo wode yiillotennaadan, ha xiqiseti nena waati maaddana danddayiyoonaa?
6. Intte so asaara kehiyaabaa haasaya
Yihooway nuuni nu so asaara kehatettaaninne siiquwan haasayanaadan koyees. BIIDUWAA beˈite; yaatidi kaallidi deˈiya oyshaa tobbite.
-
Neeni intte so asaara kehabaa haasayanawu maaddanabay aybee?
Efisoona 4:31, 32 nabbabite; yaatidi ha oyshaa tobbite:
-
Nu so asaa ufayssiyaabaa haasayanawu waatana danddayiyoo?
Yihooway ba Naˈaa Yesuusa siiqiyoogaa yootiis. Maatiyoosa 17:5 nabbabite; yaatidi ha oyshaa tobbite:
-
Neeni intte so asaara haasayiyo haasayan Yihoowa milatanawu waatana danddayay?
Harata galatana danddayiyoobaa koya
ISSI ISSI ASAY HAGAADAN GEES: “Taani qoppido aybanne haasayaagays. Hegaa asay dosin aggin tana qofissenna.”
-
Neeni hegaa maayay? Aybissi?
AY AKEEKADII?
Nuuni haasayiyoobay asaa maaddana woy qohana danddayees. Nuuni ay haasayanaakko, awude haasayanaakkonne waati haasayanaakko loytti qoppana koshshees.
Zaaretuwaa
-
Neeni haasayiyooban harata maaddana danddayiya amarida ogeti aybee?
-
Nuuni ay mala haasaya haasayana bessennee?
-
Nuuni ubbatoo kehiyaabaanne minttettiyaabaa haasayanaadan aybi maaddana danddayii?
PILGGA
Nuuni loˈˈobaa haasayanaadan aybi maaddanee?
Neeni iitabaa haasayennaadan aybi maaddana danddayiyaakko akeeka.
Neeni balada zigirennaadan waatana danddayiyaakko akeeka.
Yihooway iitabaa haasayiyoogaa agganawu baaxetiya bitaniyaa waati maaddidaakko akeeka.
“Ta Deˈoy Waaniiddi Deˈiyaakko Minttada Qoppiyoogaa Doommaas” (Wochchiyo Keelaa, Xiqimita 1, 2013)
Hageeta Beˈadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaˈissiyoy Ayba Ogiyaanee?
Yihoowa Markkati miishsha qanxxissennan xannaˈissiyo prograamiyan, Geeshsha Maxaafaa birshshettaa awugaakka goˈettana danddayaasa. Ne so asa ubbaynne ne laggetikka nenaara xannaˈanaadan shoobbana danddayaasa.
