KAPITE 51
He ʼu Palalau ʼe Fakakololiaʼi Ai Sehova
ʼI totatou fakatupu ʼae e Sehova, neʼe ina foaki mai he meʼa ʼofa taulekaleka ko te palalau. Koia ʼe maʼuhiga kia te ia ia tatatou faʼahiga fakaʼaogaʼi ia te meʼa ʼofa ʼaia. (Lau ia Sakopo 1:26.) Tou vakaʼi pe ʼe feafeaʼi hatatou fakakololiaʼi ia Sehova ʼaki ʼatatou palalau.
1. ʼE feafeaʼi hatatou fakaʼaogaʼi lelei totatou ʼalelo?
ʼE ui ʼi te Tohi-Tapu “kotou haga fefakalotomalohiʼaki pea mo fetokoniʼaki.” (1 Tesalonika 5:11) ʼE ke iloʼi koa he tahi ʼe ʼaoga ki ai he fakalotomalohi? ʼE feafeaʼi hau fakalotomalohiʼi? ʼE feala pe hau ui age ʼe maʼuhiga ia ia kia koe pea mo fakaha age te meʼa ʼae ʼe ke leleiʼia ia ia. ʼE ke iloʼi koa he vaega ʼe feala ke ke fakalotomalohiʼi ʼaki he tahi? ʼE mahino ia, ʼe lahi ia. Manatuʼi ʼe feala ki tau faʼahiga fai te ʼu palalau ke ke fakalotomalohiʼi ai ʼihi. Koia, ke ke palalau tuʼumaʼu ʼaki he agamalū mo he agalelei.—Taʼaga Lea 15:1.
2. Kotea te ʼu palalau ʼe tonu ke tou liʼaki?
ʼE ui ʼi te Tohi-Tapu: “ʼAua naʼa haʼu mai ʼokotou gutu he palalau ʼe kovi.” (Lau ia Efeso 4:29.) Koia ʼe tonu ai ke tou liʼaki te ʼu palalau kovi fuape peʼe ko te ʼu palalau ʼe feala ke mamahi ai he tahi. Pea ʼe tonu ke tou toe liʼaki te fatufatu mo te fasituʼu.—Lau ia Taʼaga Lea 16:28.
3. ʼE feafeaʼi hatatou fai he ʼu palalau fakalotomalohi?
ʼI te agamahani ka tou fai he ʼu palalau, pea ʼe ko te meʼa pe ʼaia ʼe tou manatu ki ai mo logoʼi. (Luka 6:45) Koia ʼe maʼuhiga ai ke tou maʼu he ʼu manatu ʼe lelei mo faitotonu, mo maʼa, mo tuha mo te ʼofa pea mo tuha ke vikiʼi. (Filipe 4:8) Ke feala ke tou fai te faʼahi ʼaia, ʼe lelei ke tou filifili lelei ʼotatou fakafiafia mo ʼotatou kaumeʼa. (Taʼaga Lea 13:20) ʼE toe lelei ke tou fakakaukau ʼi muʼa ʼo tatatou palalau peʼe feuiʼaki pe ʼe malave feafeaʼi anai ʼatatou palalau ki ʼihi. ʼE ui ʼi te Tohi-Tapu: “ʼE hage he heleta te ʼu palalau ʼae ʼe mole fakakaukauʼi, kae ʼe fakamalolo te ʼu palalau ʼa te kau popoto.”—Taʼaga Lea 12:18.
TA FAKALOLOTO
Ta vakaʼi he tahi ʼu manatu ʼe ha ʼi ʼatatou faʼahiga palalau ʼe fakakololiaʼi ai ia Sehova mo fakalotomalohiʼi ai ʼihi.
4. ʼE feafeaʼi hatatou lolomi totatou ʼalelo?
ʼE tou fai fuli he ʼu palalau ʼe tou fakahemala ai ki ʼamuli. (Sakopo 3:2) Lau ia Kalate 5:22, 23, pea fai te ʼu fehuʼi ʼaeni:
-
Kotea la te ʼu kalitate ʼe feala tau kole kia Sehova ke ke gaueʼi moʼo lolomi tou ʼalelo? Ko te ʼu aluʼaga fea ʼe tokoni atu anai te ʼu kalitate ʼaeni kia koe? Kotea tona tupuʼaga?
Lau ia 1 Kolonito 15:33, pea fai te fehuʼi ʼaeni:
-
Ka ke fakatahi mo ʼou kaumeʼa mo fai ni meʼa ʼe ke leleiʼia, kotea anai ʼona fua ki tau faʼahiga palalau?
Kotea te ʼu aluʼaga ʼe feala ke ʼi ai hona ʼu fua ki tau faʼahiga palalau?
Lau ia Ekelesiasi 3:1, 7, pea fai te fehuʼi ʼaeni:
-
Ko te ʼu aluʼaga fea ʼae ʼe lelei ai ke kita fakalogologo peʼe ke kita atali ki te temi tonu ʼae ke kita palalau ai?
5. Fai he ʼu palalau lelei ʼo ʼuhiga mo ʼihi
Kotea ʼe tonu ke tou fai ke mole tou fai he ʼu palalau ʼe lave kovi peʼe mole lelei? Vakaʼi te ʼATA VITEO, pea fai te ʼu fehuʼi ʼae ʼe hoa mai.
-
Kotea te aluʼaga neʼe tokagaʼi e te tehina?
-
Kotea neʼe ina fai moʼo fetogi tana aga?
Lau ia Ekelesiasi 7:16, pea fai te fehuʼi ʼaeni:
-
Ka kita kamata palalau kovi ʼo ʼuhiga mo he tahi, kotea ʼe tonu ke kita manatuʼi?
Lau ia Ekelesiasi 7:21, 22, pea fai te fehuʼi ʼaeni:
-
ʼE tokoni feafeaʼi atu te ʼu vaega ʼaeni ke ʼaua naʼa ke ita moka palalau kovi he tahi kia koe?
6. Ka ke palalau ki tou famili fai ʼaki he agalelei
ʼE loto e Sehova ke tou palalau ʼaki he agalelei ʼi te loto famili. Vakaʼi te ʼATA VITEO, pea fai te fehuʼi ʼae ʼe hoa mai.
-
Kotea ʼe tokoni atu anai ke ke palalau ki tou famili ʼaki he agalelei?
Lau ia Efeso 4:31, 32, pea fai te fehuʼi ʼaeni:
-
Ko te ʼu faʼahiga palalau fea ʼae ʼe lelei anai ki tou famili?
Neʼe fakaha tuʼumaʼu e Sehova te ʼu meʼa ʼae neʼe ina logoʼi ʼo ʼuhiga mo tona ʼAlo ko Sesu. Lau ia Mateo 17:5, pea fai te fehuʼi ʼaeni:
-
ʼE feafeaʼi hau faʼifaʼitakiʼi ia Sehova ʼi tau faʼahiga palalau mo tou famili?
Kumi ia faigamalie fuli ke ke vikiʼi ai ʼihi
ʼE UI E ʼIHI: “Kehe pe ke ʼavatu taku manatu pe ʼe ke loto ki ai peʼe kailoa, pea faʼifaʼitaliha tau ia ita.”
-
ʼE feia koa tau manatu? Kotea tona tupuʼaga?
MANATU TAFITO
ʼE feala ki te ʼu palalau ʼae ʼe tou fai ke tou fakalotomalohiʼi peʼe fakalotomamahiʼi he tahi. Koia ʼe tonu ke tou fakakaukauʼi ʼatatou palalau, mo filifili te temi ʼae ke tou palalau ai pea mo tona faʼahiga ui age.
Fehuʼi Fakamanatu
-
Fakaha he ʼu aluʼaga ʼe ke fakaʼaogaʼi lelei ai tou ʼalelo.
-
Kotea te ʼu faʼahiga palalau ʼe tonu ke ke liʼaki?
-
Kotea ʼe tokoni atu anai ke ke fai he ʼu palalau lelei mo fakalotomalohi?
TE TAHI ʼU MANATU
He ʼu tokoni ʼe tolu ke kita maʼu he ʼu manatu ʼe lelei.
ʼE feafeaʼi hau tuku te gutu tauvele?
“ʼE Kovi Moʼoni Koa Te Gutu Tauvele?” (Alatike ʼi te jw.org)
He ʼu tokoni ke mole kita faifatufatu.
Neʼe tokoni feafeaʼi ia Sehova ki he tagata ke ina lolomi tona ʼalelo?