Tãi Ziova e ku kpɛtɛ lai, e ɓɛlɛ-see-sɛŋ lɛlɛɛ tɛɛ kupɔ​—nya ɓa a gɛɛ ku pɔri lonoi. I laai la Ziova kpaaŋɔɔi a pa berei ma kwa tii kɛ la a mɛlɛ-see ŋi? Oowei gbaaŋɔɔi! (Zĩi 1:​26 lono.) Mɛni ma, kwa pɔri lonoi leŋ a pere sii nyii pai Ziova lii laai?

1. Kwa pɔri tii kɛi leŋ a mɛlɛ-see ŋi a nɛlɛɛ?

Ŋala-kɔlɔi e mo kua a gɛɛ ‘ku kukie-ni lii-kpele, ku kukie-ni kponoi kpanaŋ.’ (1 Tɛsɛloniɛŋ 5:​11) Ya pɔri ikili-ŋa siai e pilaŋ nuu ta ma nyii ya pɔri vɔrɔi? Le ɓe ya pɔri gɛi a gɛɛ I vɔrɔ? Nɛ dia a gɛɛ I kpaaŋɔɔi dimɛni ma. Tãi ta, ya pɔri mɛni lɛlɛɛ-ŋai da gɛi ɓoi dia. Ya pɔri ikili-ŋa siai e pilaŋ ɣala-kɔlɔ-kpua ta ma nyii a pɔri nuu ta fɔrɔi? Ɣala-kɔlɔ-kpua tamaa kaa naa nyii ya pɔri tii kɛi la. E lɛɛ ikili-ŋa a gɛɛ berei ya lono lai a pɔri nuu ta fɔrɔi a ŋanaa. Mɛni ma, kɔ a gɛɛ I lono a nɛlɛɛ, a ɓaa-kɛ-maa pere a tãi kelee.​—Tare-woo-ŋa 15:1.

2. Pere sii kɛɛ leŋ ɓe maa fe nɛ̃ɛ ni ku lono la?

Ŋala-kɔlɔi e mo nyɛɛi: “Kafe nɛɛ naa lono nyɔmɔɔ e kula kala.” (Ifisiɛŋ 4:​29 lono.) Nyiŋi sukulai ɓa, kufe lono nyɔmɔɔ-ŋa kɛ kpaa ku woya woo-ŋa ɓo nyii pai nuu ta lii tooi polu. Maa fe nɛ̃ɛ ni ku laa-ɓo nyɔmɔɔ kɛ kpaa ku lɛɛ kɛ a nua laa.​—Tare-woo-ŋa 16:​28 lono.

3. Le ɓe pai kpɔnii kua a gɛɛ ku lono a bere sii nyii pai nua fɔrɔi?

Tãi tamaa, mɛni-ŋai kwa moi a kulii su mɛni lɛ kpaa mɛnii kwa kukili-ŋa siai e pilaŋ mai. (Luu 6:​45) Mɛni ma, maa nɛ̃ɛi ku kɔ a gɛɛ kukɛ kukili-ŋa sia mɛni lɛlɛɛ-ŋa dia​—yɛɛ tɔ̃ya mɛni-ŋa, zɛŋ nyii kelee maa waai, zɛŋ nyii kelee nɛlɛɛi da zɛŋ nyii kelee laa-maa-tɛ kaa mai. (Felepiɛŋ 4:8) A gɛɛ ku mɛni-ŋai ŋi kɛ, maa nɛ̃ɛi ku nĩa-kɛ mɛni-ŋa da kulaoi-ni siɣe zu a tare pere. (Tare-woo-ŋa 13:​20) Nɛlɛɛi ŋɔnɔ a gɛɛ ku kukili-ŋa sia e pilaŋ mɛnii ma kwa pai moi da berei kwa pai moi lai. Ikili-ŋa sia e pilaŋ berei ma nua da pai dikili-ŋa siai la e pilaŋ mɛnii ma ya moi. Ŋala-kɔlɔi e mo nyɛɛi: “Ɓoo-woo a soli yɛɛ ɓoa-sɔkpɔ, kɛlɛ tare-woo a nuu ɓalo.”​—Tare-woo-ŋa 12:​18.

 MƐNI TAMAA MAA-KƆRI

4. Ilono pere maa kpɛɛ

Tãi taŋa, kulii a too polu e pilaŋ mɛni-ŋai dia kwa moi. (Zĩi 3:2) Galesiɛŋ 5:​22, 23 lono, gɛ ni ka lono e pilaŋ mare-kɛɛ-ŋai ŋi dia:

• Dua-pere-ŋai ŋi nenɛ ɓe ya pɔri Ziova fɛlii mɛni ma a gɛɛ e kpɔŋ ya I ilono pere maa kpɛɛ? Dua-pere-ŋai ŋi da pɔri kpɔnii leŋ ya?

1 Kɔleŋtiɛŋ 15:​33 lono, gɛ ni ka lono e pilaŋ mare-kɛɛ ŋi ma:

• Le ɓe ilaoi-laai da inĩa-kɛ mɛni-ŋai da pɔri gɛi a ilono pere?

Ikilisiati 3:​1, 7 lono, gɛ ni ka lono e pilaŋ mare-kɛɛ ŋi ma:

• Mi tãi ɓe nɛlɛɛi la a gɛɛ ku lɛɛ a kumɛi saa kpaa ku tãi lɛlɛɛ maa kpɛŋ a gɛɛ ku lono?

 5. Lono a nɛlɛɛ e pilaŋ nua dia

6. Lono a ɓaa-kɛ-maa pere ikaayɔɔi su-ɓela pɔ

 MƐNI-ŊUŊ-ŊAI YAA MAA-KƆRII

Mɛnii kwa moi, a pɔri kpɔnii nua dia kpaa e dilii too polu. Maa nɛ̃ɛi ku kukili-ŋa sia e pilaŋ mɛnii kwa moi ma, tãi kwa mo lai da berei kwa pai moi lai.

Gili-too-ŋa mare-kɛɛ-ŋai

• Pere sii-ŋa kɛɛ leŋ ɓe ya pɔri kpɔŋ maa tɛɛi la nua pɔ a berei ya lono lai?

• Pere sii kɛɛ leŋ ɓe ife pai ŋwɛlii I lono lai?

• Le ɓe a pɔri kpɔnii kua a gɛɛ ku lono a ɓaa-kɛ-maa pere, ku nua fɔrɔ?