Jéeobaeʼ tu beetoʼon yéetel u páajtalil k-tʼaan. Lelaʼ junpʼéel regalo jach táaj jatsʼuts. ¿Ku yilik wa Jéeoba bix táan u meyajtoʼon le regalo u tsʼaamajtoʼonoʼ? Jaaj ku yilik (xok Santiago 1:26). ¿Bix túun jeʼel k-kiʼimakkúuntik u yóol yéetel le baʼaxoʼob k-aʼalikoʼ?

1. ¿Bix jeʼel u meyajtoʼon maʼalob le regalo u tsʼaamajtoʼon Jéeobaoʼ?

Le Bibliaoʼ ku yaʼalik: «Seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex» (1 Tesalonicenses 5:11). ¿Yaan wa máax a kʼaj óol kʼaʼabéet u líiʼsaʼal u yóol? ¿Baʼax jeʼel u páajtal a beetik utiaʼal a wáantikeʼ? Maʼ xaaneʼ jeʼel u páajtal a waʼaliktiʼ jach a yaabiltmeʼ yéetel a waʼaliktiʼ le baʼaloʼob maʼalobtak ku beetkoʼ. ¿Baʼax tekstoil jeʼel u meyajtech utiaʼal a líiʼsik u yóol wa máaxeʼ? U jaajileʼ jach yaʼab tekstoʼob jeʼel u meyajtecheʼ. Tsʼoʼoleʼ maʼ u tuʼubultecheʼ kʼaʼabéet a kanáantik bix a tʼaan utiaʼal u páajtal a líiʼsik u yóol. Tʼaanen xan yéetel yaabilaj bey xan yéetel utsil (Proverbios 15:1).

2. ¿Baʼaxoʼob maʼ unaj k-aʼalikiʼ?

Le Bibliaoʼ ku yaʼalik: «Maʼ u jóokʼol mix junpʼéel kʼaakʼas tʼaan ta chiʼex» (xok Efesios 4:29). Leloʼ u kʼáat u yaʼaleʼ maʼ unaj k-poochʼiliʼ mix k-aʼalik baʼaloʼob jeʼel u beetik u yaatal u yóol u maasileʼ. Tsʼoʼoleʼ maʼ unaj xan k-chismeariʼ mix k-aʼalik baʼaloʼob maʼ jaajtak tu yoʼolal u maasiliʼ (xok Proverbios 16:28).

3. ¿Baʼax kʼaʼabéet k-beetik utiaʼal k-líiʼsik u yóol u maasil?

U suukileʼ le baʼaxoʼob k-aʼalikoʼ ku yeʼesik bix k-uʼuyikba yéetel baʼax k-tuklik (Lucas 6:45). Le oʼolal mantatsʼ kʼaʼabéet k-tuukul tiʼ baʼaloʼob maʼalobtak. Le Bibliaoʼ ku yaʼalik ka tuukulnakoʼon tiʼ jeʼel baʼalak toj tu táan Dioseʼ, tiʼ jeʼel baʼalak limpioeʼ, tiʼ jeʼel baʼalak ku lúubul utsileʼ yéetel tiʼ jeʼel baʼalak ku náajmatik u alabartaʼaleʼ (Filipenses 4:8). Utiaʼal leloʼ kʼaʼabéet k-yéeyik tubeel baʼax yéetel ken k-náays k-óol bey xan yéetel máax k-bisikba (Proverbios 13:20). Tsʼoʼoleʼ kʼaʼabéet xan k-tuklik antes baʼax ken k-aʼale. Máans xan ta tuukul bix ken u afectartil u maasil le baʼax ken a waʼaloʼ. Le Bibliaoʼ ku yaʼalik: «Le máax chéen ku jáajan tʼaanoʼ bey táan u loʼolomik máak yéetel junpʼéel espadaeʼ, pero u yaakʼ le máax yaan u naʼatoʼ ku tsʼakik le tuʼux uchaʼan looboʼ» (Proverbios 12:18).

 UTIAʼAL A MAAS NAʼATIK

4. Kanáant baʼax ka waʼalik

U jaajileʼ tuláakloʼon k-jáan aʼalik wa baʼax, pero ken tsʼoʼokkeʼ k-arrepentir yoʼolal le baʼax t-aʼaloʼ (Santiago 3:2). Xokeʼex Gálatas 5:22, 23, kéen tsʼoʼokkeʼ ka tsikbaltikeʼex lelaʼ:

• Utiaʼal a kanáantik baʼax ka waʼalikeʼ, ¿máakalmáak tiʼ le jatsʼuts modos jeʼel a kʼáatik tiʼ Jéeobaoʼ? ¿Bix jeʼel u yáantkech le jatsʼuts modos ku yaʼalik le tekstooʼ?

Xokeʼex 1 Corintios 15:33, kéen tsʼoʼokkeʼ ka tsikbaltikeʼex lelaʼ:

• ¿Jeʼel wa u kʼaskúuntik bix a tʼaan a amigoʼob bey xan le baʼaxoʼob ka yéeyik utiaʼal a náaysik a wóoloʼ? ¿Bix jeʼel u beetkoʼobeʼ?

Xokeʼex Eclesiastés 3:1, 7, kéen tsʼoʼokkeʼ ka tsikbaltikeʼex lelaʼ:

• ¿Baʼax súutukil maʼalob ka tʼaanak máak yéetel baʼax súutukil maas maʼalob maʼ u yaʼalik mix baʼal?

 5. Tʼaanen maʼalob yoʼolal u maasil

6. Eʼes utsil kéen tʼaanakech yéetel a familia

 BAʼAX TSOʼOLI

Le baʼaxoʼob k-aʼalikoʼ jeʼel u líiʼsik u yóol u maasileʼ wa jeʼel u beetik xan u lúubul u yóoloʼobeʼ. Kʼaʼabéet k-tuklik tubeel baʼax ken k-aʼale, baʼax hora ken k-aʼale yéetel bix ken k-aʼalil.

Baʼax ta kanaj

• ¿Baʼaxoʼob jeʼel k-aʼalik utiaʼal k-líiʼsik u yóol u maasileʼ?

• ¿Baʼaxoʼob maʼ unaj k-aʼalikiʼ?

• ¿Baʼax jeʼel u yáantkoʼon utiaʼal k-eʼesik utsil kéen tʼaanakoʼoneʼ?