Wan ceke watie ku gin ma wamaru i lembe m’uneno kendi man ruko kumwa. Re ka wabelubo cik mir ukungu mi Biblia, wabing’iyo ngo kit kendi ku ruko m’ufoyo wang’wa kendwa, ento bende ma bifoyo i Yehova. Wakenen cik mir ukungune moko.

1. Cik mir ukungu m’ucikere nitelo wiwa i lembe mi kendi man ruko

Wacikara ning’iyo “kendi m’umaku piny, ma cuu man mi woro,” man niruko kumwa ubed ma leng’, i ayi m’unyutho nia ‘wabeworo Mungu’ andhandha. (1 Timoteo 2:9, 10) Wakenen cik mir ukungu moko 4 ma romo telo wiwa: (1) Kendi mwa ucikere nibedo “m’umaku piny.” Copere idaru neno nia i coko mwa wa dhanu pa Yehova, ng’atuman bekendo kit bongu m’ufoyo iye; ento kendi mwa man kite ma wayiko ko wiwa nyutho saa ceke woro ni Mungu ma wabetimo ire. (2) Nikendo “cuu” kunoke nikadhu ngo mukero. Niwacu, kendi ku ruko mwa ucikere ngo nicewo ava mi ribiri i kum ju m’ubenenowa, man ecikere ngo nitelo wang’ dhanu akeca i kumwa. (3) Wanyutho nia kendi ku ruko mwa utie “mi woro” nwang’u wabelubo ngo kwa kit piny ma julwong’o nia “ng’om ukelo.” (4) Ruko mwa kunoke ayi ma wabenen ko yo woko ucikere nituco kamaleng’ i wang’ dhanu ceke nia ‘wabeworo Mungu’ mandha.​—1 Jukorintho 10:31.

2. Ka wabeng’iyo kendi mwa, pirang’o ukwayu wapar bende pir umego mwa?

Kadok watie agonya ning’iyo wan giwa piny ma wabikendo de, re wacikara niparu cuu nia jumange ke bineno kendine nenedi. Ukwayu watim kero mwa ceke kara kud wakier ng’atu moko, ento ‘wanyay anyong’a i wadwa, man watim ire lembe ma ber pi niteng’e.’​—Som Jurumi 15:1, 2.

3. Kendi ku ruko mwa copo telo jumange i dilo pa Yehova

Ukwayu watim kero nikendara saa ceke i ayi m’umaku piny, asagane ke ka wan’i coko mwa man ka waberweyo lembanyong’a. Wacikara ngo niketho kendi ku ruko mwa uwing wi dhanu kud i kum lemkwenda ma ber ma wabetero igi. Ento, ayi ma wabenen ko yo woko ucikere nitelo dhanu i kum lemandha man ‘niruko ponji pa Mungu ma Jalar mwa.’​—Tito 2:10.

 MED NYANG’ PERI

4. Ka wabenen ma leng’, wabinyutho woro ni Yehova

Thelembe ma kani ma pire tek akeca m’ucikere nicwaluwa niketho kendi ku ruko mwa ubed ma leng’ saa ceke? Som Lembanyutha 4:11, man i ng’eye wuwec iwi penji m’ulubo e:

• Ning’eyo nia kendi mwa utie ku matoke iwi ayi ma dhanu copo neno ko Yehova Mungu mwa ucikere nicwaluwa nikendara nenedi?

• Nyo pire tie tek andha nidieng’ i kum kendi ku ruko mwa ka wabecidho i coko man waberweyo lembanyong’a? Pirang’o iparu kumeno?

 5. Ang’o ma copo konyowa ning’iyo kit kendi ku ruko ma cuu?

Nen VIDEO.

Bongu ku wara mwa ucikere nibedo ma leng’ man m’urombo ku lembe ma wabekende pire, nik’ebed nia etie mi bei ma lee kunoke ngo, mi karathasi kunoke mi mulonde. Som 1 Jukorintho 10:24 man 1 Timoteo 2:9, 10. I ng’eye, wuwec iwi penji m’ulubo e: Pirang’o ukwayu ngo wakend kendi . . .

• m’ucido, m’ujung’ kunoke ma nya kumeno kumeno?

• m’urido kumwa ndang’ ndang’, m’ukubo wat­kumwa, kunoke ma romo cewo ava mi timo ribiri i kum jumange?

Kadok Jukristu gitie ngo i the Cik pa Musa de, re nikum Cikne, wabenyang’ i kum paru pa Yehova. Som Poi mi Cik 22:5, man i ng’eye wuwec iwi penji m’ulubo e:

• Pirang’o wacikara ngo nikendara kunoke nirukara i ayi ma ketho co nen ve mon, mon ke ve co?

Som 1 Jukorintho 10:32, 33 man 1 Yohana 2:​15, 16, man i ng’eye wuwec iwi penji m’ulubo e:

• Pirang’o wacikara nidieng’ ka nyo kendi kunoke ruko mwa ubekiero dhanu kaka ma wakwo i iye kunoke i cokiri?

• Kaka m’ikwo i iye, kit kendi, kit lielowic, kit kiedowic, man kit rukiri ma nenedi ma dhanu maru akeca?

• Nyo iparu nia moko tie ma copo maku piny ungo ni Jakristu? Pirang’o iparu kumeno?

 I ADUNDO

Ka wabeng’iyo kendi man ruko ma cuu, wabinyutho woro mwa ni Yehova man ni dhanu mange.

Penji mi poyowic

• Pirang’o kendi ku ruko mwa pigi tie tek lee i wang’ Yehova?

• Cik mir ukungu moko ma kani m’ucikere nitelo wiwa i lembe m’uneno kendi man ruko mwa?

• Kendi ku ruko mwa copo cwalu jumange nineno dilo pa Yehova nenedi?