A ka di an kelen-kelen bɛɛ ye ka an ka finidontaw ani an kundilancogo sugandi. Ni an tugura Bibulu sariyakolo damadɔw kɔ minnu man gɛlɛn, an bɛna se ka an diyanye finiw sugandi ani ka an kodiya Jehova ye fana. An ka o sariyakolo dɔw lajɛ.

1. Sariyakolo jumɛnw de ka kan ka an ɲɛminɛ an ka finidontaw ani an kundilancogo sugandili la?

An ka kan ka an “masiri ni fini bɛnnenw ye, ni maloya ni kuncɛ dɔgɔya ye” ani an saniyalen ka kɛ tuma bɛɛ walasa tɔw k’a ye ko an bɛ “Ala sira taama.” (1 Timote 2:9, 10, Bible Senuma 1961) An ka o sariyakolo naani ninnu lajɛ: (1) An ka finidontaw ka kan ka kɛ fini “bɛnnenw” ye. Iko i y’a jateminɛ cogo min na jɛkulu ka lajɛw la, Jehova ka jamakulu diyanyekow tɛ kelen ye, nka o bɛɛ n’a ta an ka finidontaw ani an kundilancogow bɛ bonya da an ka Ala kan an bɛ o min bato. (2) Ka finiw don ni “maloya” ye, o kɔrɔ ye ko, an tɛ finiw don cogo la min bɛ cɛnimusoyako nege don mɔgɔw la, walima k’u don cogo la min b’a to mɔgɔw bɛɛ ɲɛ ka jɔ an na kojugu. (3) An bɛ finiw don ni “kuncɛ dɔgɔya” ye, ni an tɛ tugu sangawuliw bɛɛ kɔ finiw ani kundilancogo ta fan fɛ. (4) An yecogo ka kan k’a jira tuma bɛɛ ko an bɛ “Ala sira taama”, o la, tɔw b’a ye o fɛ, ko an bɛ ka Ala lakika de bato.​—1 Kɔrɛntekaw 10:31.

2. An yecogo bɛ se ka nɔ jumɛn bila an krecɛn ɲɔgɔnw na?

Hali k’a sɔrɔ an ka finidontaw ko sugandili bɛ an yɛrɛ bolo, an yecogo bɛ se ka nɔ min bila tɔw la, an ka kan ka miiri o la. An bɛ an seko bɛɛ kɛ walasa an kana don mɔgɔ si gasi la, nka an bɛ “an mɔgɔ ɲɔgɔn diyaɲekow kɛ a nafa kama, walisa dɔ ka fara a barika kan.”​—Romɛkaw 15:1, 2 kalan.

3. An yecogo bɛ mɔgɔ wɛrɛw sama cogo jumɛn na ka na bato lakika kɔnɔ?

Hali ni an bɛ ko bɛɛ kɛ walasa ka fini bɛnnenw don waati bɛɛ, an bɛ an janto an ka finidontaw la kɛrɛnkɛrɛnnenya la ni an bɛ taa jɛkulu ka lajɛw la ani ni an bɛ taa waajulibaara la. An b’a fɛ ka an janto a la, an yecogo kana mɔgɔw hakili sama ka bɔ kibaru duman kan an bɛ ka min lase u ma. An yecogo bɛ se ka tiɲɛ kodiya mɔgɔ wɛrɛw ye ani ka “an Kisibaa . . . ka kalan bonya ko bɛɛ la.”​—Tite 2:10.

 DƆ FARA I KA DƆNNIYA KAN

4. An yecogo ɲuman bɛ bonya da Jehova kan

Kun bɛɛ la nafama jumɛn de kama an ka kan ka an janto an yecogo la? Zaburu 47:3 kalan, o kɔ aw ka baro kɛ nin ɲininkaliw kan:

• Ikomi Jehova tɔgɔ bɛ an kan, o ka kan ka nɔ jumɛn bila an yecogo la?

• Yala e hakili la, nafa b’a la an ka an janto an yecogo la ni an bɛ taa lajɛw la ani ni an bɛ taa waajuli la wa? Mun na e sɔnnen bɛ o ma walima mun na e ma sɔn o ma?

 5. Latigɛli ɲumanw kɛcogo finidontaw ani kundilancogo ta fan fɛ

A’ye WIDEYO lajɛ.

A kɛra ko an ka finiw da ka gɛlɛn walima ko u da ma gɛlɛn, u saniyalen ka kan ka kɛ ani u bɛrɛbɛnnen ka kɛ ka kɛɲɛ ni kow ye an bɛ minnu kɔnɔna na. 1 Kɔrɛntekaw 10:24; ani 1 Timote 2:9, 10 kalan. O kɔ, aw ka baro kɛ nin kan: Kun minnu na an bɛ an yɛrɛw tanga finiw donni ma . . .

• minnu piriparalen bɛ walima minnu nɔgɔlen bɛ.

• minnu bɛ nɔrɔ mɔgɔ la kojugu walima minnu tɛ mɔgɔ fari sutura walima yɛrɛ minnu bɛ cɛnimusoyako nege don mɔgɔw la.

Hali ni krecɛnw tɛ Musa ka sariya kɔrɔ, Jehova hakilina ye min ye, o sariya bɛ se ka u kalan fɛn caman na o ko la. Dutɛrɔnɔmɛ 22:5 kalan, o kɔ aw ka baro kɛ nin ɲininkali kan:

• Mun na an man kan ka finiw don walima ka an kun dilan cogo la min b’a to cɛw bɛ kɛ iko musow walima musow bɛ kɛ iko cɛw?

1 Kɔrɛntekaw 10:32, 33, ani 1 Yuhana 2:15, 16 kalan, o kɔ aw ka baro kɛ nin ɲininkaliw kan:

• Mun na an ka kan ka an janto a la, an yecogo kana an sigiɲɔgɔnw walima jɛkulu kɔnɔmɔgɔw degun?

• Fini sugu jumɛnw ani kundilan sugu jumɛnw de ka ca kosɛbɛ aw ka yɔrɔ la?

• Yala i hakili la, olu suguya dɔw bɛnnen tɛ krecɛn ma wa? Mun na e sɔnnen bɛ o ma walima mun na e ma sɔn o ma?

 BAKURUBAFƆLI

Ni an bɛ latigɛli ɲumanw kɛ an ka finidontaw ani an yecogo ko la, an b’a jira o fɛ ko an bɛ bonya da Jehova ani mɔgɔ tɔw kan.

Seginnkanni

• Mun na nafa bɛ an ka finidontaw ani an kundilancogo la Jehova bolo?

• Sariyakolo minnu ka kan ka an ɲɛminɛ an ka latigɛliw la an yecogo ta fan fɛ, olu dɔw ye jumɛnw ye?

• Mɔgɔ wɛrɛw bɛ bato lakika ye cogo min na, an yecogo bɛ se ka nɔ jumɛn bila o la?