À séín ɖɛ̀ɓɛ̀ ɓɛ́ à ké kà à ké bɛ̃̀ìn nyɛɛ gã. Ɔ jù ké à dyi Baɓo hwìè-da-zàìn-wùɖù gbɛ̀i-gbɛ̀i fɛ̃́ìn xwa ɓè kíɖíí sí ní, à mu ɖɔ à mɔ́ mú poɛ dyiɛɛ gãa ɓɛ́ìn, ké à mu Jɛhova hwòɖò dyi dèìn. Ɓèà cɛ̃ hwìè-da-zàìn-wùɖù ɓèa ɖíɛ́ ɓè jè.

1. Baɓo hwìè-da-zàìn-wùɖù ɓèɔ̀ nyɛ́ mɛ gmɔ̀ à dyí ɓá kà à nyu bɛ̃̀ìn nyɛɛ jè dyíɛ́?

À mɛ ‘po ɖɔún nɔ̀mɔ̀ dyíin, ké à ní ɖá à ké ɖɔún po múàùn-vò-kà, kɛɛ à mɛ fɔ̀nɔ̀ hwòɖò ɓó à ɖɔún po jè,’ ɓɛ́ à bɛ̃̀ìn-kà ké nyɔ ɓè ɓɛ́ wa “ɓiè Geɖepɔɔ kɛɛ” hwɔìn. (1 Tímétè 2:9, 10) Poìn hwìè-da-zàìn-wùɖù hĩinyɛ ɓè nìà kɛ jè hwìɖìi: (1) À mɛ po ɖɔún “nɔ̀mɔ̀ dyíin.” Kà m̀ nyuà dyéɛ ɖé dyí-poìn-poìn ɓèɔ̀ múɛɛ, Jɛhovaa nyɔ ɓèɔ̀ ɖɔún-po-kà kpa kòɛ̀, kɛɛ à mú-po-ɖɔ̀ kè à mí-nyu-kà ɓè dè Geɖepɔɔ à ɓièà kɛɛ dya. (2) À nììn ké se ɖɔún po “múàùn-vò-kà” kɛɛ xwíníín mɔ̀, à mɛ ɓɔ́ ɖɔún poɛ ɓɛ́ ɔ ké à vìè-dà ɓè tɛ̀mɛ̀ìn, mɔɔ ɓɛ́ nyɔ ɓè dyéɖé ké à dya nì. (3) À tɛ̀mɛ̀ìn kà à “fɔ̀nɔ̀ hwòɖò” ɓó ɖɔún po jè ɔ jù ké à se dyáá-ɖɔ̀ séín mu dyiìn nyɛɛ kíɖíí kpá ní. (4) Kà à nyu bɛ̃̀ìn nyɛɛ mɛ tɛ̀mɛ̀ìn ti séín kà à mɔ̀ nyɔ ɓè ɓɛ́ wa “ɓiè Geɖepɔɔ” kɛ, ké ɔ mɛ tɛ̀mɛ̀ìn nyɔ tɔ̀ɔ̀ ɓè dyí kà à nì jàà Geɖepɔɔ ɓièɛ̀n nyɛ.—1 Kɔ̀ɖéíntĩ̀ɔ̀ 10:31.

2. Ðɛ́ à bɛ̃̀ìn-kà ɓɛ́ìn à mùè jàà-po-nyɔ̀ ɓè bũ̀ nyuɛ kɛ́?

À ɓéɖé kpé ɓɛ́ à ké ɖɔ à ké mú poɛɛ gã dyɛo, kɛɛ à mɛ poìn ɖɛ à bɛ̃̀ìn-kà mu nyɔ tɔ̀ɔ̀ ɓè bũ̀ nyuùn wɛ̃ɛ jè hwìɖìi. À vɔ̃ kóɖó-kóɖó ɓɛ́ à ní kɔ̃̀ ɖà dyí-gbò-ɖɛ̀ ɖò nyɔ ɖò hwìi po, kɛɛ “à séín mɛ dè à mùè ɖòɛ̀ hwòɖò dyi ɖé hwìè ɓɛ́ ɔ nɔ̀mɔ̀ dyíin ɓó ɔ bììɛɛ mú, ɓɛ́ ɔ kéɛ nyu ɓɛ́ ɔ ké dyi ku.”—Zà Wóɖómà 15:1, 2 wuɖuún.

3. Xwɛ̀ à bɛ̃̀ìn-kà ɓɛ́ìn nyuɛ ɓɛ́ nyɔ tɔ̀ɔ̀ ɓè ké jààɔ̀ mú ɖɛ̀ɓɛ̀ kɛ́?

À vɔ̃ ɓɛ́ à ké bɛ̃̀ìn nɔ̀mɔ̀ dyíin ɓó ti séín ɓaɖa dyɛo, kɛɛ à màìn à ɖɔún-po-kà mú kóɖó-kóɖó ɔ jù ké à dyi dyí-poìn-poìn ɓèɔ̀ mú muɛń nì, mɔɔ à dyi Geɖepɔɔ-wùɖù wáɖáa mu ní. À se mɔ́ ɓɛ́ à kéɛ nyu ɓɛ́ bɔ̃̀ à kpaà nyɔ ɓè gboɛɛ ké se ɖɛ kpa ɖé wa dyéɖéín. Kɛɛ, à mɛ nyuɛ ɓɛ́ nyɔ ɓè ké jààɔ̀ mú ɖɛ̀ɓɛ̀, ɓɛ́ wa ké “ɖɛ nɔ̀mɔ̀ dyíin ɓá tɛ̀mɛ̀ìn-ɖɛ̀ ɓɛ́ ɔ ɓá Geɖepɔɔ mɔ̀à à Póìn-nyɔ̀ɔ̀ kɛ dyíɛɛ jè cɛ̃.”—Tátɔ̀ 2:10.

 ÐE ÐƐ MÚIN CÁ

4. Bɛ̃̀ìn-kà nɔ̀mɔ̀ dyíin dè Jɛhova dya

Ðɛ́ mɔ̀ xwíníín kpa ɖɛ ɖò kɔ̃̀ jè à mɛ màìn kà à nyu bɛ̃̀ìn nyɛɛ jè múɛ́? Zà Wɛ́ɖɛ́ 47:2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Sepoɛɖe à mɔ̀ Jɛhova kɛ́-ɓaɖa-nyɔ̀ ɓè jèɛɛ, xwɛ̀ à bɛ̃̀ìn-kà mɛ nyu nìɛ̀ kɛ́?

• Nì hwòɖò ɖá ɔ nyu fɔ̀nɔ̀-hwòɖò ɓɛ́ à ké mú ma ɓó kà à nyu bɛ̃̀ìn ɔ jù ké à dyi dyí-poìn-poìn ɓèɔ̀ mú muɛń nì mɔɔ Geɖepɔɔ-wùɖù wáɖáa muín nyɛ jèè? Xwíníínɔ̀ nyɛ́ kɔ̃̀ jè ɔ nìà ná, mɔɔ ɔ seà ná nì kɛ́?

 5. Kà à ké ɖɛ nɔ̀mɔ̀ dyíin ɓè gbɔ poɛ nyu ɓá bɛ̃̀ìn jè dyíɛ

Po VÍÐÒƆ̀ kũ̀à gbo.

Kɛbì à mú-po-ɖɔ̀ ɓè mɛ kpa wíɖí pàɖà mɔɔ wa mɛ kpá wíɖí tííwè kɛɛ, wa mɛ hwɛ̀ mú ɓɛ́ wa ké dyíin nɔ̀mɔ̀ ɓó dɛ̀ à mu nììn nyɛɛ jè. Zà 1 Kɔ̀ɖéíntĩ̀ɔ̀ 10:24 kè 1 Tímétè 2:9, 10 wuɖuún. Nìí, ɓɛ́ ɓè ké xwíníín kɔ̃̀ jè à mɛ ɓàɖàìn mú-po-ɖɔ̀ ɓè nì kà kɛ dyíɛɛ jè dɔ́ɔ́ kɔ̃in dèìn. Wa mɔ̀  . . . 

• ɖɔ gbɛ̀ìn gbɛìn mɔɔ ɔ se mú hwɛ̀.

• ɖɔ nɛ́ɛ-nɛ́ɛ mɔɔ ɔ tɛ̀mɛ̀ìn nyɔ vìè-dà.

Kɛ́ɖɛ́ì ɖeín-sí-nyɔ̀ ɓè se Mózèɛ̀ gmaɔ̀ xwíɖíi nì dyɛo, kɛɛ gmaɔ̀ tɛ̀mɛ̀ìn ɖɛ mɔ̀ Jɛhova hwìɖìi-poìn-ɖɛ̀ kɛ. Zà Dìtɔ̀wáɖánámɛ̀ 22:5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè à mɛ ɓɔ́à bɛ̃̀ìn-bɛ̃̀ìn ɓɛ́ ɔ nyuɛ ké gàa hwɔìn màa mɔɔ màa hwɔìn gàa kɛɛ nyuɛ kɛ́?

Zà 1 Kɔ̀ɖéíntĩ̀ɔ̀ 10:32, 33 kè 1 Jɔ̃́ɔ́ 2:15, 16 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè kà à bɛ̃̀ìn-kà mu nììn ɖé nyɔ ɓè tã́ìn à ɖeɛ, mɔɔ nyɔ ɖíɛ́ ɓè nì ɖé dyí-poìn-kpòòɔ̀ múɛ dyéɖéín nyɛɛ jè mɛ kpɔ̃à à hwòɖò kɛ́?

• Ðɛ́ mɔ̀ bɛ̃̀ìn-kà ɓɛ́ ɔ hwɔ dyi ɖé dɛ̀ m̀ tã́ìn nyɛ́?

• Nì hwòɖò ɖá bɛ̃̀ìn-kà ɓè nìà wɛ ɖíɛ́ ɓè ɓɛ́ìn ɖɛ se dyí sɛ́ɖɛ́ìn nyɛ jùɛ ɓó Kɛ́ɖɛ́ì ɖeín-sí-nyɔ̀ ɖò bìì? Xwíníínɔ̀ nyɛ́ kɔ̃̀ jè ɔ ɓɛ́àìn ná nìɛ̀, mɔɔ ɔ seà ná nìɛ̀ ɓɛ́ìn nyɛ́?

 SṸÌN-XWÍNÍÍN

À dyi ɖɛ nɔ̀mɔ̀ dyíin ɓè gbɔ po ɓá kà à ké bɛ̃̀ìn nyɛ jè dyí ní, à tɛ̀mɛ̀ìn kà à dyé Jɛhova kè nyɔ tɔ̀ɔ̀ ɓè kpéín nyɛ.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè kà à nyu bɛ̃̀ìn nyɛɛ jè kpaà ɖɛ ɖé Jɛhova gbo kɛ́?

• Ðɛ́ mɔ̀ hwìè-da-zàìn-wùɖù ɖíɛ́ ɓè ɓɛ́ wa mɛ zàìn à hwìè da ɖé ɖɛ ɓè à po gbɔ ɓá à bɛ̃̀ìn-kà jè dyíɛɛ mú kɛ́?

• Ðɛ́ à bɛ̃̀ìn-kà ɓɛ́ìn kà nyɔ tɔ̀ɔ̀ ɓè nyu jàà ɓiè-ɓiè dya gmɔ̀ɔ̀ kɛɛ bũ̀ nyuɛ kɛ́?