Kan dihlak in zeidah kan i hrukaih lai i zeitindah kan i ṭamh lai ti kha thim kan duh cio. Asinain a sawhsawhte a simi Baibal phunglam cheukhat kha kan zulh ahcun kan duhmi thilpuan kha kan i thim khawh lai lengah Jehovah lung zong kan lawmhter lai. Mah phunglam cheukhat kong kha i ruah hna u sih.

1. Thilhruk ning le i ṭamh ning kong ah zei Baibal phunglam dah kan zulh awk a si?

“[Zohremmi, NW] aa za tawk le aa dawh tawk in i thuam” awkah kan i thim awk a si i “biaknak a ṭanhmi” kan si kha an hngalh nakhnga thiang tein kan um peng awk a si. (1 Timote 2:9, 10) Mah phunglam pali kong hi ruathmanh: (1) “Zohremmi” thil kha kan i thuam awk a si. Pumhnak ah Jehovah miphun pawl nih thilpuan a phunphun an i hrukmi kha na hmuh men ko lai. Asinain kan i hrukaih ning le kan sam kan i ṭamh ning nih Pathian kan upat kha a langhter zungzal. (2) “Aa za tawk” in kan i hrukaih tikah kan thilhrukmi nih midang kha a ṭhalomi ruahnak a ngeihter hna lo asiloah kanmahle kanmah cung zongah a hleihluat tukin lungthin a kan pekter lo. (3) A laarmi thilpuan asiloah style pawl kip kan i hrukaih lonak thawngin “aa dawh tawk” in kan i hrukaih ti kha kan langhter. (4) Midang nih kan biakmi cu a hmaanmi Pathian a si ti kha fawi tein an hngalh nakhnga lenglei kan i ṭamh ning nih “biaknak a ṭanhmi” kan si kha a langhter zungzal awk a si.—1 Korin 10:31.

2. Kan i hrukaih ning nih zumtukhat unau pawl kha zeitindah a hnorsuan khawh hna?

Kan i hrukaih dingmi thil kha zalong tein thimnak nawl kan ngei ko nain mah nih midang a hnorsuang hna lai maw ti kha kan ruah a hau. Midang tlukrilhter awkah si loin ‘kan unau hna an ṭhatnak ding kha kan tuah i zumhnak ah an ṭhan khawh nakhnga’ kan si khawh chungin kan i zuam.—Rom 15:1, 2 rel.

3. Kan i hrukaih ning nih midang kha a hmaanmi biaknak ah zeitindah a hnuh khawh hna?

Aa tlakmi thil i hrukaih awkah kan i zuam peng ko nain Khrihfabu pumhnak le phungchim rianṭuannak i kan i tel tikah a hleiin kan i ralring. Kan i hrukaih ning ruangah kan chimmi a biapimi thawngṭha cungah mi nih lungthin an pek lo dingmi kha kan duh lo. Mah canah kan i hrukaih ning nih midang kha biatak ah hnuk hna sehlaw ‘kan Khamhtu Pathian kha a thang ṭhatter’ hna seh ti kan duh.—Titas 2:10.

 TAM DEUH IN HLATHLAI

4. Zohdawh tein kan i hrukaihmi nih Jehovah kan upat kha a langhter

Hrukaih ning kan i ralrinnak a biapi bikmi a ruang cu zeidah a si? Salm 47:2 rel law mah biahalnak hna hi i ruah u:

• Kan i hrukaih ning cu mi nih Jehovah an hmuh ning cungah huham a ngeih caah zeitindah kan i hrukaih awk a si?

• Kan i pumh tik le phungchim kan kal tikah kan i hrukaih ning cu kan i ralrin a hau tiah na ruat maw? Zeicah na ruah asiloah zeicah na ruah lo?

 5. Kan i hrukaih ning le kan i ṭamh ning kong he aa tlaiin zeitindah a ṭhami biakhiahnak kan tuah khawh?

VIDEO kha piah.

Kan thilpuan cu a man a fah ah siseh, a fawi ah siseh a thiangmi le thil sining he aa tlakmi a si awk a si. 1 Korin 10:24 le 1 Timote 2:9, 10 rel. Cun mah bantuk thilhruk hi zeicah kan hrial awk a si ti kha i ruah u . . .

• zoh aa dawh lomi le aa tlak lomi.

• aa tet tukmi, a bak tukmi asiloah nupa sual duhnak lungthin a ngeihter khomi.

Khrihfa hna cu Moses Nawlbia tangah kan um ti lo nain mah nih Jehovah ruahnak kha a langhter. Deuteronomi 22:5 rel law mah biahalnak hi i ruah u:

• Nu nih pa bantukin le pa nih nu bantukin i hrukaih le i ṭamh kha zeicah kan hrial awk a si?

1 Korin 10:32, 33 le 1 Johan 2:15, 16 rel law mah biahalnak hna hi i ruah u:

• Kan i ṭamh ning nih kan umnak sang asiloah Khrihfabu i mi cheukhat kha a tlukrilhter hna nakhnga lo zeicah kan i ralrin awk a si?

• Na umnak hmun ah zei bantuk thilpuan le i ṭamh ning dah a laar?

• Zei bantuk phun style dah Khrihfa hna caah aa tlak lo tiah na ruah? Zeicah na ruah asiloah zeicah na ruah lo?

 A TAWINAK

Kan i hrukaih ning le kan i ṭamh ning nih Jehovah le midang kan upat hna kha a langhter.

I Ruahṭi Ṭhannak

• Kan i hrukaih ning le kan i ṭamh ning cu Jehovah caah zeicah a biapit?

• Hrukaih ning kong he aa tlaiin zei Baibal phunglam dah kan zulh awk a si?

• Kan i hrukaih ning le kan i ṭamh ning cu midang nih a hmaanmi biaknak an hmuh ning cungah zeitindah huham a ngeih khawh?