Bela anmar na emarbi mor yoedbisurmalad, bela anmar na emarbi gwiisurmarbalid. Anmar daggedba nabir anmar na mor yoe inigwale, auggi Jehova sogedba anmar igar imagged abelebalid. Dagmaloena, ibu igarmar Jehova anmarga Bibliagi mesisa.

1. ¿Igi anmar mor yoed abelesurye Bibliagi soglenai?

Anmala, Cristo sordagana, “yogasaar mor yoed abelesulid, nue nudaggaggwa mor yoed abeleged, dagge daggesur mor yoed abelesulid”. Ar anmar sunnasur gudisurdaele, dulemar mag dagmaloed, anmar, “Bab Dummad sordagana” (1 Timoteo 2:9, 10, TNM). We versiculogine we ibmar sogbaggegi sunmaglesad. 1) Anmar “yogasaar mor yoed abelesulid”. Igar iddogedse nader be dagsa daer gebed, bela anmar na emarbi mor yosurdamar inigwale, auggi, anmar yogasaar mor yosurdamarbalid, anmar yogasaar gwiisurmarbalid. 2) Nabir anmar ‘nudaggaggwa mor yoegala’, mer anmar doggus mor daddara yoer gebed, mer anmar doggus mor dassag yobalir gebed, dulemar mer anmargi issaggwa binsaega. 3) Anmar ‘dagge daggesur mor yobisulile’, ibu mor agnidagoe, ibu morsan agnidagoe, mer anmar yogasaar emarba yomogar gebed. 4) Anmar mor yoedbali, anmar gwiiedbali, dulemar mag dagmaloed, anmar, Bab Dummad sunsogedga arbae, anmar, “Bab Dummad sordagana” (1 Corintios 10:31).

2. Anmar mor yoedba, ¿sun igi dulemar iddodamala?

Anmar abegedba nabir anmar mor yoe inigwale, auggi, wis anmar emargi binsaed abelebalid, anmar mor dassag yodaele, igi dulemar anmarba iddomaloe. Ar anmar abesulid, dulemar anmarba bingeggusi gued. Ar anmardi weyob Bibliag ibmar soglenaidba igar imagbied: ‘Yeer gwenagan oiddomar, gwenagan ogannomar’ (Romanos 15:1, 2 absogo).

3. ¿Ibu anmar imagger gebe, anmar mor yoedba dulemar Jehova igar durdagbi gudamalaga?

Mor soggwenna nigsursoggua, agnesig nasoggalir anmar dagdaoed, bidii mor bur anmar yoi nader nuedile. Degsoggu, igar iddogedse nasoggardibe, Bab igargi sunmagnasoggardibe, anmar nueggwa dagged abeleged, biddi mor anmar yoi naoe, mer yogasaar mor yoi naega. Ar anmar abesulid, anmar mor yoedba dulemar Jehova igargi issaggwa sunmagged. Bur anmar abeged, anmar mor yoedba dulemar Jehova igar durdagbi gudamarmogad, geb dagmarbalid, ‘Bab Dummad igar, igar nuedi’ (Tito 2:10).

 NUEGGWA WE IBMAR DURDAGMARGOLO

4. Anmar mor yoedba mag daglegoed anmar Jehova sordagana

¿Ibigala anmar yogasaar mor yoed abelesuli? Salmo 47:2 absomalo, we ibmargi sunmagmarbalo:

• Anmar, Jehova nug sedisoggua, ¿ibigala anmar yogasaar mor yoed abelesuli?

• ¿Ibigala nue abelege, mer anmar igar iddogedse yogasaar mor yoi naed, Bab igargi sunmagnasoggalirdibe?

 5. Mor igiid yoed abelege, igi sagla sigged abelebali

VIDEO dagmalo.

Aggarsulid, be mor garged nigdibe, be mor mani bibbigwad nigdibe. Auggi, nueggwa mor enuggar yoed abeleged. 1 Corintios 10:24 geb 1 Timoteo 2:9, 10 (TNM) absomalo. Sorba we ibmargi sunmagmarbalo:

• ¿Ibigala mor sunnasur yoed abelesuli, assirmaggardibe?

• ¿Ibigala mor daddara yoed abelesuli, dassagdibe, meeddedibe?

Anmardi, Moisesga igar uglesadba bar igar imagsur inigwale, auggi, aa igarmar anmar bendagmogad, anmar wisguega, igi ibmar imagleged Jehova abedae. Deuteronomio 22:5 absomalo, we ibmargi sunmagmarbalo:

• ¿Ibigala nuedsuli, omegan, massergan mor yoed, masserganyob gwiieddibe, geb massergana, omegan mor yomogad, omeganyob gwiieddibe?

1 Corintios 10:32, 33 geb 1 Juan 2:15, 16 absomalo, we ibmargi sunmagmarbalo:

• Dulemar, be mor yoedbardibe, be gwiiedbardibe, bingedar beb iddodamalale, ¿ibu be imasale? ¿Ibigala deyob be soge?

• Be neggweburgi, ¿igi dulemar mor yogusmala, igi sagla siggusmarbali?

• ¿Nuedirdibe we dulemaryob be mor yomogar, we dulemaryob be sagla sigmogardibe? ¿Ibigala be deyob soge?

 WE IGARGI SUNMAGLESAD

Anmar yogasaar dagge daggesur mor yosurdaele, yogasaar anmar sagla sigsurdabalile, mag daglegoed anmar Jehova sogedba igar imagnai, geb anmarginbi anmar na binsasurbali.

Ibu be durdasa

• ¿Ibigala Jehova abesuli, anmar yogasaar mor yoed?

• ¿Bia Bibliagi soglenai, igi anmar mor yoed abelege?

• ¿Anmar mor yoedba sun dulemar igi Jehova igargi binsaarmalale?